Мусобиқаи ҷумҳуриявӣ оид ба шоҳмот, ки ҳафтаи пеш миёни 43 нафар шоҳмотбозони Ҷумҳурии Тоҷикистон дар ноҳияи Рӯшон оғоз шуда буд, бомуваффақият ҷамъбаст гардид.

Ҳамин тавр, ҷойи аввалро номзад ба устоди варзиш кишвар Юнусов Аъзам аз дастаи «Хатлон -1», зинаи дуюм устоди варзиши дараҷаи  байналмилалӣ Каримов Алишер аз  дастаи «Душанбе» ва   ҷойи сеюмро номзад ба  устоди варзиш Юнусов Муҳаммад аз  тими «Душанбе»  ишғол намуда, ба  лигаи  олии кишвар оид ба шоҳмот роҳхат гирифтанд. 

 Дар  байни калонсолон бошад устоди  варзиш Саъдиев Олуча сазовори  зинаи аввал  шуд. 

 Ба ғолибон медалу ифтихорномаҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон тақдим гардид.
Инчунин раиси ноҳия Фаррух Додхудоев ба ягона иштирокчии мусобиқа аз байни бонувон, намояндаи шаҳри Душанбе, устоди варзиш Мутриба Ҳотамӣ мӯҳра, тоқӣ ва ҷӯроби Бадахшонӣ ҳадя намуд.

Тавре мудири Бахши кор бо ҷавонон ва варзиши ноҳия зикр кард, мусобиқа  дар сатҳи баланд доир шуда, аксарияти иштирокдорон  бори аввал ба ноҳия ва дар умум ба вилоят ташриф оварда, аз манзараҳои дилкаши ноҳия ва ҷойҳои сайёҳӣ бархурдор гардиданд.
Ёдрас мешавем, ки мусобиқа бо ташаббуси кумита миёни шоҳмотбозони вилоятҳои Суғду Хатлон, ВМКБ, шаҳри Душанбе ва ноҳияҳои тобеи маркази ҷумҳурӣ гузашт.