Таваҷҷуҳи довталабони макотиби олии кишвар ба ихтисосҳои варзишӣ бештар шудааст.

Дар ин бора Шодӣ Сафаров, ректори Донишкадаи тарбияи ҷисмонии Тоҷикистон ба номи С. Раҳимов зимни нишасти хабарӣ иттилоъ доданд.

Номбурда ҳамчунин қайд кард, ки имсол барои ҳар як ҷо дар ихтисосҳои соҳаи варзиш мувофиқи маълумотҳои Маркази милиии тестӣ 9 довталаб сабқат хоҳанд кард. Имсол 21 ҳазор довталаб барои шомил шудан ба ихтисосҳои соҳаи варзиши макотиби олии кишвар ҳуҷҷат супоридаанд, ки аз инҳо 9 ҳазорашон ба ДТҶТ рост меояд. Ва ин ҳам дар ҳолест, ки донишкада имкони қабули 1200 довталабро дорад.

Дар идома ректор аз таблиғ ва ба ин васила оммавӣ гаштани соҳаи варзиш изҳори хушнудӣ намуд, вале аз таблиғ бархурдор нагаштани ҷавондухтарони деҳот нигаронӣ кард. “Имрӯзҳо дар деҳот ва ноҳияҳои дурдаст ҳастанд ҷавондухтароне, ки ба навъҳои гуногуни варзиш мароқ зоҳир менамоянд, вале бинобар тафаккури нодурусти насли нисбатан калонсол ва ба таври шоиста таблиғ наёфтани варзиш миёни бонувони деҳот, онҳо дар канор мемонанд. Мо бояд дар ҳамкорӣ бо ҷомеа ин масъаларо ҳал кунем,”- афзуд Шодӣ Сафаров, ректори Донишкадаи тарбияи ҷисмонии Тоҷикистон ба номи С. Раҳимов.