Шодмон Ризоев, ҷудокори ҷавони тоҷик дар Чемпионати Осиё –Уқёнусия оид ба ҷудо, ки моҳи декабри соли равон дар шаҳри Бейрути Лубнон доир гашт, дар вазни 81кг иштирок намуда, соҳиби медали тилло гардид. Ин аввалин медали тиллои Шодмон дар мусобиқаи қоравӣ ба шумор меравад. Перомуни фаъолияти варзишӣ бо ӯ суҳбате оростем, ки фишурдаи онро пешкаши хонанда менамоем.

- Шодмон аввалан шуморо барои сазовори медали тилло шуданатон табрик мегӯем.

- Ташаккури зиёд!

- Ин аввалин медали тиллои шумост, ки дар Чемпионати Осиё оид ба ҷудо соҳиб гаштед. Вақте мақоми аввалро ба даст овардеду медали тиллоро ба шумо тақдим карданд ва ба ин муносибат Суруди миллӣ садо дод, он замон чӣ эҳсос доштед ва бештар ба чӣ ифтихор мекардед?

- Воқеан, дуруст қайд кардед, ин аввалин медали тиллои ман буд, ки дар мусобиқаи қоравӣ соҳиб гаштам. Бисёр як эҳсосоти фараҳбахш доштам. Ва бо худам ифтихор мекардам, ки тавонистам дар байни 127 варзишгар парчами ватани азизам - Тоҷикистонро парафшон намоям.

- Дар Чемпионати қоравии Осиё оид ба ҷудо ҳарифи пурқувват барои шумо кадом варзишгар буд?

- Ман чор ҳарифи пурқувват доштам. Онҳо аз кишварҳои Корея, Қазоқистон, Ӯзбакистон ва ҳарифи чорумам бошад, ҳамватанам буданд. Чи хеле ки ба варзишгарону устодони соҳа маълум аст, дар Ҷумҳуриҳои Карея, Қазоқистон ва Ӯзбакистон ҷудо хело пеш рафтаасту варзишгаронашон дар сатҳи олӣ гӯштин мегиранд. Фикр намекардам, ки бар онҳо пирӯз мешавам. Вале ҳамин хел шуд, ки ба ҳамаашон ғолиб омадам.

- Қувваозмоии шумо дар даври ниҳоии чемпионати мазкур бо варзишгари дигарамон Муҳаммадҷон рост омад. Рӯ ба рӯ шудан бо ҳамватани хеш дар даври ниҳоии ин мусобиқа бароятон чӣ гуна буду чӣ эҳсосот дошт?

- Албатта, ман медонистам, ки бо ҳамватани худ Муҳаммадҷон Абдуҷалилов дар даври ниҳоии ин мусобиқа қувваозмоӣ мекунем. Вақте ки қуръакашӣ шурӯъ шуд, дар гурӯҳи аввал ман ва дар гурӯҳи дуввум Муҳаммадҷон буд. Мо дар вазни 81 киллограм қувваозмоӣ мекардем. Ва ҳамин тавр ҳам шуд, мо ба майдон баромада бо ҳам рақобат намудем.

- То ба ин зинаҳои комёбӣ расиданатон саҳми киҳо бештар аст – мураббиён, аҳли оила ва ё?..

- То ба ин зинаҳо расиданам аввалан талошу кӯшишҳои пайвастаи худам буд ва баъдан саҳми амакам Хайриддин Ризоев бештар аст. Ва то ҳол аз ҷониби он кас дастгирӣ меёбам. Миннатдории худамро ба он кас мерасонам. Чун дастгириҳои ӯ буд, ки ман имрӯз комёб гаштам. Ҳамчунин аз устодам Салим Ахмедов низ сипосгузорам.

- Кӣ ва чӣ шуморо ба майдони варзиш овард?

- Ба майдони варзиш маро шавқу хоҳишам овард на чизи дигар. Аз хӯрдсолӣ ба варзиш майл доштам. Ва ҳар иду суре, ки шуда мегузашт, ман дар он ҷо иштирок менамудаму дар майдонҳо қувваозмоӣ мекардам. Махсусан, дар ҷашни Наврӯз. Аз соли 2013 амакам шавқу ҳавасамро дида, маро дастгирӣ намуду дар муассисаи мактаб-интернати варзишӣ таҳти роҳбарии устод Салим Ахмедов гузошт. Аз ҳамон сол то инҷониб ман машқу тамринҳои асосиямро сар намудам. Ва дар мусобиқаҳои ҷумҳуриявӣ ва берун аз он сазовори медали тилло ва нуқра гардидам.

- Ба назари шумо варзиш чист ва он ба инсон чӣ манфиат дорад?

- Варзишро гарави саломатӣ мегӯянд. Воқеан чунин аст. Варзиш пеш аз ҳама ба инсон саломатӣ мебахшад. Касе, ки ба варзиш машғул аст, тану рӯҳи солим дорад. Тез пир намешавад, зебову бардам мемонад. Умуман варзиш манфиатҳои зиёд дорад.

- Идеали шумо дар варзиш кист? Ба кӣ монанд шудан мехоҳед?

- Дар ҷодаи варзиш идеал надорам. Мехоҳам, Шодмон Ризоев бошам. Бо ҳамин исм парчами кишварамро баланд бардорам. Бо ҳамин ном шиносандам.

- Ҳар соҳа талаботҳои худ-ро дорад. Варзиш чӣ талабот дорад ва як нафаре ки варзишгар аст, бояд чӣ гуна бошад?

- Варзишгар бояд пеш аз ҳама одоби хуб дошта бошад. Ҳарифашро эҳтиром намояд. Эҳтиром ва одоб дар варзиш дар ҷойи аввал меистад. Ва пайваста ба тамрин машғул шудан, реҷаи асосии ҳар варзишгар аст.

- Оё боре аз ин ки варзишро интихоб намудаед, пушаймон шудаед?

- Не! Ҳеҷ вақт эҳсоси пушаймонӣ накардаам. Баръакс хело шод ҳастам, ки ҷодаи варзишро интихоб намудаам. Чун варзиш буд, ки маро ва Парчами меҳанамро дар Осиё муаррифӣ намуд. Варзиш маро ба мардум шиносонид. Варзиш як ҷузъи асосии зиндагии ман гаштааст. Як рӯзе, ки тамрин накунам, як рӯзе, ки ба варзиш машғул нашавам, худро беҳолу бемадор эҳсос мекунам. Хаёл мекунам, ки чизеро гум кардаам.

- Хотирмонтарин лаҳзаи варзишиатон кадом аст?

- Бароям хотирмонтарин лаҳза ҳамон лаҳзае, буд, ки дар мусобиқаи Осиё – Уқёнус медали тиллоро ба гарданам овехтанд. Вақте ки медали тиллоро соҳиб гаштаму Суруди миллиамон садо дод, ҳамон лаҳза хотирмонтарин рӯйдод дар ҳаёти варзишиям мебошад.

- Ба ҷавонон ҷиҳати машғул шудан ба варзиш чӣ тавсия медиҳед?

- Ба ҷавононе, ки нав ба варзиш машғул ҳастанд, гуфтаниям, ки ҳамеша талошу кӯшиш намоянд. Чун бе талошу заҳмат ба ягон ҷода намерасанд. Фақат заҳмат кашанд, тамрини пайваста дошта бошанд.

Гоҳо вақтҳое мешавад, ки бисёр тамрин мекунӣ, аммо муваффақ намешавӣ. Дар ин ҳолат набояд рӯҳафтода шуд. Баръакс, ба хотири парафшон кардани Парчами ватани азиз талош кардан даркор. Вақте ки муваффақ шудиву дастболо гардидӣ ва заҳматҳоят самар доданд, он вақт эҳсоси хушбахтӣ мекунӣ. Он вақт бо худат меболӣ.

- Дар оянда чӣ нашқаҳо доред?

- Дар оянда нақшаҳо зиёд аст. Баъди машқҳои дастаҷамъона ба Ҷумҳурии Ӯзбекистон сафар хоҳам кард. Дар он ҷо тӯли 20 рӯз машқҳои дастаҷамъона сурат мегирад. Ва баъдан дар Португалия мусобиқа баргузор мегардад. Ман кӯшиш мекунам ва умедворам, ки дар он ҷо низ дастболо хоҳам шуд. Ва холҳои худро ба олимпиадаи Париж – 2024 ҷамъ карда, дар он иштирок хоҳам кард.

- Бароятон ҷиҳати фатҳи қуллаҳои баланди варзишӣ муваффақият хоҳонем.

- Ташаккури зиёд.

PS: Хонандаи азиз! Шумо шакли видеоии мусоҳибаро аз суроғаи зерин тамошо карда метавонед. 
https://youtu.be/8E3wjliDivc