Дар яке аз шоҳроҳҳои асосии ноҳияи Данғараи вилояти Хатлон рӯзи 29 ноябр маросими ифтитоҳи мусобиқаи ҷумҳуриявӣ оид ба велосипедронӣ бо иштироки масъулони сатҳи ҷумҳурӣ, варзишгарон ва дӯстдорони ин намуди варзиш баргузор гардид. Ин чорабинӣ, ки дар доираи сиёсати давлатии ҷавонон ва рушди варзиш роҳандозӣ мешавад, аҳамияти хоссаи иҷтимоӣ ва тарбиявӣ дошта, дар ташвиқи тарзи ҳаёти солим миёни ҷавонони кишвар нақши муҳим мебозад.

Дар маросими кушодашавӣ Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Сиҷоудин Саломзода, раиси ноҳияи Данғара ва Озодхон Давлатшоев, раиси Федератсияи велосипедронии Тоҷикистон ва намояндагони дигар сохтору мақомоот ва ҷавононону варзишгарон иштирок намуданд.

Раиси Кумитаи кор бо ҷавонон ва варзиш зимни суханронии худ иброз дошт, ки Ҳукумати Ҷумҳурии Тоҷикистон дар самти рушди инфрасохтори варзишӣ, бунёди майдонҳои муосир, ташкил ва густариши чорабиниҳои оммавии варзишӣ таваҷҷуҳи махсус зоҳир мекунад. Ба гуфтаи ӯ, дастгирии варзишгарони ҷавон, таъмин бо таҷҳизоти зарурӣ ва ҷалби мутахассисони варзида аз самтҳои афзалиятноки сиёсати давлатӣ маҳсуб мешавад. Ӯ изҳор дошт, ки бо чунин ташаббусҳо дар солҳои наздик рушди минбаъдаи велосипедронӣ дар кишвар бо суръати бештар идома хоҳад ёфт.

Таъкид карда шуд, ки баргузории чунин мусобиқаҳо имконият медиҳад, то ҷавонон бештар ба варзиш ҷалб гардида, муҳити солими иҷтимоӣ таҳким ёбад.

Бино ба иттилои масъулон, мусобиқаи ҷумҳуриявӣ бо чанд ҳадафи аслии рушди минбаъдаи велосипедронӣ, ҷалби ҷавонон ба тарзи ҳаёти солим, муайяну дастгирии чеҳраҳои нав, таҳкими дӯстӣ миёни варзишгарони минтақаҳои гуногун ва баланд бардоштани сатҳи омодагии онҳо ба мусобиқаҳои минтақавию байналмилалӣ ташкил гардидааст. Мутахассисони соҳа бар он назаранд, ки чунин мусобиқаҳо миёни варзишгарон имкони мубодилаи таҷриба, санҷиши имкониятҳои техникӣ ва мукаммал намудани омодагии ҷисмониро фароҳам меоранд.

Дар мусобиқа варзишгарон аз шаҳру ноҳияҳои гуногуни кишвар ширкат доштанд. Онҳо дар чанд масир рақобат намуда, маҳорати ронандагӣ, устувории ҷисмонӣ ва сатҳи омодагии худро ба намоиш гузоштанд. Рақобати ҷолиб миёни иштирокчиён нишон дод, ки велосипедронӣ дар Тоҷикистон дар ҳоли рушд қарор дошта, таваҷҷуҳи ҷавонон ба ин ришта афзоиш ёфтааст. Дар канори роҳ ҳаводорон ва сокинони маҳаллӣ гирди ҳам омада, бо шавқу завқи зиёд аз рафти мусобиқа истиқбол мекарданд, ки ин ба фазои варзишӣ ва руҳияи варзишгарон неруи бештар бахшид.

Мусобиқаи ҷумҳуриявии велосипедронӣ дар Данғара як иқдоми нав дар ҷодаи густариши варзиш ва тарғиби тарзи ҳаёти солим арзёбӣ мешавад. Чорабинӣ на танҳо ба пайдоиши чеҳраҳои нав ва таҳкими дустии ҷавонони минтақаҳо мусоидат мекунад, балки заминаи муҳиме барои таҳкими иқтидори варзишии кишвар низ мегузорад. Маросими ифтитоҳии пуршукӯҳ ва ҳузури ҷавонписарону ҷавондухтарони зиёд нишон дод, ки Тоҷикистон дар самти оммавигардонии варзиш қадамҳои устувор гузошта истодааст.

Яҳё МАҲМАДНАБИЕВ, “ҶТ”