ВАРЗИШ
Ҷумъа 22 Октябр 2021 02:56
8133
Ӯ духтари майдон аст. Қаҳрамони ҷабҳаи орзуҳои хеш. Бонуест, ки ҷасораташ дар истодагарӣ пайи ҳадаф аз як мард кам нест. Духтарест дар ҳифзи мақсаду орзуҳояш чун сипар устувор. Ин бонуварзишгари муваффақ Шукрона Қарчиева аст.

Шукрона 23 сол муқаддам дар Дарвоз ба дунё омадааст. Шукронае, ки дар замираш ғурури ниёгонист. Шукронае, ки варзиш зиндагиаш аст. Ҷудоро иллати сарбаландӣ медонад. Машғул шудан ба онро мояи хушбахтӣ.

Варзишро аз хурдӣ дар ҷону дилаш мепарварад. Ҳарчанд ки ӯ духтар аст, вале айёми кӯдакиву наврасии хешро ҳамеша бо писарон гузаронидаасту дар чусту чолокӣ аз онҳо болотар буд. Ҳамаи ин боис шуд, то Шукрона роҳи варзишро интихоб кунад ва ҳеҷ касбу коре дар пешгоҳи ҳадафҳояш монеа шуда натавонист. Ӯ аввалин духтаре буд дар ноҳия, ки пой ба остонаи тамрингоҳ гузошт. Ӯ аввалин ҷуръаткардае буд, ки ба заифиҳо тан додан намехост. Ӯ аввалин гулдухтаре буд, ки ба муқобили мард дар набард баромад. Барои расидан ба қуллаи мурод мубориза бурд.

Ҳарчанд ки ин қолабшикании Шукрона барои мардуми деҳа ор буд, аммо ӯ роҳашро бо вуҷуди ин ҳама давом дод. Ноумед нашуд. Суханҳои пасту баланд ва таҳқирҳои носазои мардуми деҳа ӯро то андозае рӯҳафтода намуда буд, вале ҳамоно пайи ҳифзи мақсадҳояш мекӯшид. Натиҷаи ин ҳама заҳматҳо буд, ки акнун на танҳо мардуми деҳаву ноҳия, балки Тоҷикистон бо номаш ифтихор дорад.

Натиҷаи машаққатҳо беподош нахоҳад монд. Шукрона соли 2015 пас аз касби медали тиллои мусобиқаи ҷумҳуриявӣ, бори аввал дастоварди беҳтарини худро хориҷ аз кишвар соҳиб гардид. Ӯ дар мусобиқаи бозиҳои Аврупо оид ба ҷудо миёни 27 давлати ҷаҳон медали нуқраро сазовор шуд, ки ин дастовард барои як духтари кӯҳистонӣ мояи ифтихору сарфарозии кулли ҳаммилатон буд. Ӯ ҳамзамон дар ин сол медалҳои биринҷии Чемпионати Авруосиё ва Ҷоми Осиёро оид ба ҷудо дар шаҳрҳои Алмаатои Ҷумҳурии Қазоқистон ва Чирчиқи Ӯзбекистон ба даст овард. Солҳои 2017-2018 низ Шукрона дар мусобиқаи Ҷоми Осиё бо такрори натиҷаҳои пешини худ сазовори медалҳои нуқра ва биринҷӣ гардид.

Шукрона зиндагиашро танҳо бо як мақсад пеш мебарад: “Ҳеҷ гоҳ таслим нашудан назди заифиҳо”. Сар аз имсол ӯ иштирок дар мусобиқаҳои байналмилалиро бо натиҷаи назаррас оғоз намуд. Пас аз ҷароҳати яксола дар соли 2019 ва хуруҷи бемории ҳамагири коронавирус дар соли 2021 Шукрона дар Чемпионати Осиё оид ба ҷудо сазовори мақоми панҷум гардид. Тӯли ин муддат ӯ борҳо ғолибу майдондалери мусобиқаҳои сатҳи ҷумҳурӣ буд.

Ӯ варзишро дар тани худ чун ҷон меҳисобад. Ӯ ҳамон Шукронаест, ки роҳи пурпечутобу пурмашаққати орзуҳояшро тавассути варзиш паси сар намудааст. Ҳама буду набудашро аз мактаби варзиш медонад. Ӯ аллакай ба қуллаи мурод наздик аст ва ягона мақсадаш низ касби медали тиллои Бозиҳои олимпист. Барои расидан ба орзуҳояш барор мехоҳем.

Қ.МАҲМАДҶОНОВ, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
27 28 29 30 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Октябр 2021 c.