Ягона нафаре, ки метавонад Ҷони Ҷонсро шикаст диҳад, ин худи Ҷони мебошад. 

Дана Уайт

Таърихи UFC ба мисли Ҷон Ҷонс ҷавонтарин чемпион байни сангинвазнонро шояд ёд надорад. Ҷанговаре, ки ҳатто мағлубият аз ӯ ҳарос дорад ва дар 10 соли охир касе ба ӯ баробар шуда намевонад, ана инро муваффақият мегӯянд.

ЗИНДАГИИ САХТТАР АЗ МАРГ

Ҷон Дуайт Ҷонс 19-уми июли соли 1987 дар шаҳри Рочестери Ню-Йорки Амрико таваллуд шудааст. Падараш Артур Ҷонс дар Калисо ба сифати назифкунанда фаъолият дошт, модари вазишгар Камила бошад, дар яке аз беморхонаҳои Рочестер ҳамшираи шафқат шуда кор мекард.

Падару модари варзишгар чор фарзандашонро дар доираи қонунҳои калисоӣ тарбия мекарданд ва кӯшиш менамуданд, ки фарзандонашон ҳамчун диндор ба воя расанд. Зиндагии душвори оилавӣ хоҳарбузурги Ҷон Корменро маҷбур сохт, то барои таъмини оила донишгоҳро раҳо намуда, кор кунад ва ба падару модараш барои таъмини оила кӯмак намояд.

Ба бахти бади Ҷон, бародаронаш Артури хурдӣ ва Чандлер таъмингари асосии оила, яъне, хоҳарбузургашон дар синни 18 - солагӣ аз бемории саратони сар вафот мекунад ва зиндагии баъдии ин оила сангинтар мешавад.

Дар хурдӣ аз сабаби сиёҳпӯст будани оилаи Ҷон онҳо ба хусумати нажодпарас-тони сафедпӯст гирифтор мешуданд. Ин ҳолат ба дигар шудани шахсияти Ҷони хурдсол бетаъсир намемонд. Ӯ аз хурдӣ кӯшиш мекард, то дар оянда ба нафари муваффақ табдил ёбад ва бо ин роҳ аз нажодпарастон интиқом гирад.

Аз сабаби он ки оилаи Ҷон хело камбизоату нодор буд, орзуи фарзандонашонро бароварда карда наметавонистанд. Ба ҳамин хотир ягона роҳи муваффақ шуданро Ҷон дар варзишгари хубу бомаҳорат шудан медид.

Ҷон нахусттамрини худро аз зербинои Калисое, ки падараш кор мекард, оғоз кардааст. Дар ин бинои валангор якчанд асбобҳои куҳнаву зангзадаи варзишӣ мехобид, ки андаке ҳам бошад ин асбобҳо дархӯри кори Ҷони наврас гардид. Нобиғаи ояндаи UFC ин маконро барои худ тамрингоҳ қарор дода, шабу рӯз ба варзиш машғул мешуд. Ҳангоми дар синфи ҳафтум таҳсил намуданаш бо роҳнамоии дӯсти падараш дар толори варзишии “Юнион-Эндикот” ба гӯштини тарзи юнону-римӣ машғул мешавад. Соли 2004 дар Чемпионати “JUCO” аз ин намуди гӯштин сазовори ҷойи аввал мегардад ва ин нахустин муваффақияти Ҷони наврас дар риштаи варзиш ба ҳисоб мерафт.

ШОҲИ UFC

Ҷонс аввалин бор дар MMA-и касбӣ моҳи апрели соли 2008 баромад намуда, дар се моҳ 6 ғалаба ба даст овард, ки аксари набардҳояшро пеш аз муҳлат бо нокаут анҷом дода, роҳашро барои мусобиқаҳои минбаъда рӯшан мекард. Бо шарофати ғолибиятҳои пайиҳам ташкилоти UFC ба ин варзишгари фавқулода мароқ зоҳир карда, худи ҳамон сол ба ӯ шартномаи ҳамкорӣ пешниҳод мекунад.

Нахустин муборизаи Ҷонс дар UFC 9 августи соли 2008 баргузор шуд. Вай дар UFC-87 бо устоди варзиш дар риштаи “Капоейра” Андре Гусман аз Бразилия рӯ ба рӯ шуд. Рақобат тезутунд давом мекард, ҳеҷ кадоме нияти таслим шудан надошт, аммо зарбаҳои Ҷони сахттару бехато ба ҳадаф мехӯрд, аммо Гусман низ туҳфа набуд ва бо як ду зарбаи обдор аз худ бехуд намешуд.

Билохира вақти ҷудогардида ҳам ба итмом расид. Акнун ҳамагон хулосаи доварро интизор буданд, нохост номи ғолиб эълон гардид Ҷон Ҷонс. Ин рӯз барои Ҷон бемуболиға рӯзи тиллоӣ ба ҳисоб мерафт.

Дар рақобати оянда Ҷонро ду рақиби хавфнок: Стефана Боннара ва Джейка Брайена интизор буд. Ин рақобат соли 2009 баргузор гардид ва ӯ тавонист ҳар ду рақибро таслими бозувони худ гардонад. Баъд аз 9 рақобати бебохт билохира рӯзи шум низ фаро расид, дар рӯзи 5-уми декабр Ҷон бо Мэтт Хэмил андар майдони рақобат шуд. Бартарии комил насиби Ҷони бомаҳорат буд, ӯ метавонист баъди анҷоми вақт ғолибияти софро ба даст орад, аммо дар рафти мубориза нохост ба ҷойи мамнуи рақиб зарба зада, рақибро дар ҳолати хатарзо қарор дод ва доварон мусобиқаро манъ карда, ғолибиятро ба Мэтт доданд.

Ин нахустин бохти варзишгар аз рӯйи беэҳтиётӣ дар фаъолияти варзишиаш ба шумор меравад.

Муборизаи навбатии Ҷон баъд аз шикасти ба истилоҳ дуруғин 21-уми марти соли 2010 муқобили Брэндон Вера баргузор гардид. Рақобати варзишгарон ҳамагӣ чор дақиқа давом кард. Дар дақиқаи чоруми дидор Ҷонс бо оринҷи даст рақибро ба замин афтонида, ба гунае борони зарбаҳоро ба сару рӯйи рақиб равона кард, ки дар натиҷа Вера ба нокаут рафта, ғолибиятро барои “Устухон” таъмин намуд.

Акнун Ҷонро зарур буд барои афзудани шуҳрату шони бештари худ қувваашро муқобили баргузидагони UFC бисанҷад. Ҳамин буд, ки 1-уми августи соли 2010 дар мусобиқаи бонуфузи UFC Live - on Versus 2 Ҷон Ҷонсро муқобили рақиби сарсахти сангинвазнони ин ташкилот Матюшенко ба майдони рақобат бароварданд.

“Ман фикр мекунам, ки Матюшенкоро хелеҳо қадр намекунанд. Ман задухӯрдҳои ӯро борҳо дидаам ва гуфта метавонам, ки ӯ муборизи хело қавӣ ва ботаҷриба аст. Ба андешаи ман, Владимир нисбат ба Брэндон Вера ва Мэтт Ҳэмилл рақиби қудратмандтар ба ҳисоб меравад”, - гуфта буд Ҷон Ҷонс пеш аз оғози мусобиқа.

Аксари мухлисони UFC муборизаҳои қаблии Ҷонсро ба инобат гарифта, ба пирӯзии ӯ муқобили Матюшенко боварии комил доштанд. Шумораи ками мухлисон бошад, барои пирӯзии Матюшенко гарав баста буданд. Дар охир пешгӯиҳо дуруст баромаданд. Ҷонс дар ин рақобат низ бо боварии комил вориди ҳашткунҷа гардида, аз он бо ғолибият берун омад. Вай ин навбат ҳам рақибро дар дақиқаи 2-юм бо нокаути техникӣ мағлуб намуда, байни сангинвазнон рекорди ҷадид гузошт.

Пас аз пирӯзӣ муқобили Матюшенко Дана Уайт ба Ҷон ваъда дод, ки дар ҳолати ба даст овардани ду ғалабаи дигар инкон дорад, барои унвони қаҳрамонӣ мубориза барад. Ҳамин тавр, UFC-126 соли 2010 баргузор гардид ва рақиби Ҷон ин навбат Райан Бадер интихоб гардид, ки то ин дидор боре ҳам шикаст нахӯрда буд. Ин рақобат низ барои Ҷони беҳамто мушкил набуд, зеро ӯ ҳам дар замин ва ҳам дар муборизаи рӯ ба рӯ ҳамто надошт. Дар охири раунди дуюм Ҷонс муборизаро ба замин гузаронда, усули буғикуниро истифода бурду рақибро таслими бозувони худ гардонид.

Акнун Ҷонро зарур буд барои баромадан ба финали мусобиқаи UFC бо Рашад Эванс рақобат намояд, вале бар хилофи нақша рақиб ҳангоми тамрин аз зонуяш захм бардошта, аз набард даст мекашад. Ҳамин тариқ, ғолибият бе рақобат насиби Ҷон гардид ва ӯ бояд барои ба даст овардани камарбанди чемпионӣ бо Морисиу Руаи бразилӣ дар UFC-128 рақобат мекард.

UFC-128 рӯзи 19-уми марти соли 2011 дар Ню-Йорк баргузор шуд, ки набарди марказии он мубориза байни қаҳрамони ду вазн Маурисиу Руа ва Ҷон Ҷонс ба ҳисоб мерафт. Ҷонс аз оғози набард бартариро ба даст гирифта, дар даври севум бо нокаути техникӣ ғолиб омада, ҷавонтарин чемпиони UFC гардид, ки ҳамагӣ 23 сол дошт.

Ҷон дар корномаи варзишии худ 27 мусобиқа дошта, аз ин миқдор як бохт як мусовӣ ва 25 бурд дорад. Варзишгари номбурда аз 25 ғолибияти хеш 10 рақибро бо нокаути техникӣ, 6 нафарро бо тарзи таслимкунӣ ва 9 нафарро тибқи хулосаи доварон мағлуб намудааст. Ӯ унвони чемпиониро муқобили рақибони сарсахт, ба мисли Мауриси Руа, Куинтон Ҷексон, Лайото Мачида, Рашад Эванс, Витор Белфорт, Александр Густаффсон, Даниэл Кормееро ва Доминик Рейес борҳо ҳимоя намудааст, ки чунин дастовард то ба ҳол ба ҳеҷ як размовари UFC даст надодааст.

Охирин рақобати Ҷонс пас аз се соли бознишастагӣ 4 марти соли 2023 дар UFC-285 зидди Сирил Ган доир гардид. Дар ин дидор, ки ҳимояи камарбанди қаҳрамонии гаронвазнҳои UFC дар миён буд, Ҷонс Ганро дар пайти якум ба нокаут равон кард ва исбот намуд, ки то ҳол пири асараш накардааст.

ПАДАРИ ХУБ

Ӯ бо ҳамсари хубу меҳрубонаш Джесси Мозес ҳанӯз ҳангоми дар Эндикотти таҳсил намуданаш шинос шуда буд. Ҳосили зиндагии онҳо се гулдухтари зебо бо номҳои Леа, Ҷесси ва Ҷона ба ҳисоб мераванд.

Ҷон аксар вақт кӯшиш мекунад, ки вақти зиёди хешро бо фарзандонаш гузаронад ва дар саҳифаи “инстаграмаш” аз ҳама зиёд расми духтаронашро дидан мумкин, ки ин амал аз падари хубу меҳрубон буданаш дарак медиҳад.

ҲАЁТИ ШАХСӢ

Дар ҳоли ҳозир ҳаёту фаъолият ва шахсияти Ҷон Ҷонс хеле баҳсталабу пурмоҷаро ба ҳисоб меравад. Чанде қабл паҳлуҳои норӯшани зиндагии мубориз ошкор шуда, маълум гардид, ки ӯ тайи солҳои охир тарзи ҳаёти нодурустро пеш гирифта, аксар вақт ба тиҷорат ва истеъмоли маводи мухаддир машғул будааст. Ба хотири чунин амалҳои ноҷо тибқи қонунҳои амалкунандаи варзишӣ ду маротиба Ҷонро аз унвони чемпионӣ ва камарбанд маҳрум кардаанд. Яке аз амалҳои номатлуби дигари варзишгар баҳори соли гузашта дар он буд, ки ӯ ҳангоми бо суръати баланд ҳаракат намудан бо автомобилаш на танҳо ба нозирони роҳ итоат накард, балки барои аз дунболи худ дур кардани милитсия тирпарронӣ низ кардааст, ки ин рафтораш мавҷи эътирозҳои мухлисони ММА-ро дар шабакаҳои иҷтимоӣ барангехт.

Ба замми ҳамаи ин, аксари намояндагони ВАО-и ҷаҳон Ҷон Ҷонсро бузургтарин муборизи тамоми давру замон дар ҳама вазни UFC медонанд.

Яҳё МАҲМАДНАБИЕВ, "ҶТ"