10 август бахшида ба Рӯзи варзишгарони Тоҷикистон дар бинои Кумитаи кор бо ҷавонон ва варзиши назди Ҳукумати кишвар ҷаласаи Шурои собиқадорони соҳаи тарбияи ҷисмонӣ ва варзиш баргузор гардид.

Дар ҷаласа Абдулло Раҳмонзода, раиси Кумитаи кор бо ҷавонон ва варзиш, Маликшоҳ Неъматзода, раиси Федератсияи иттифоқҳои касабаи мустақили Тоҷикистон ва дигар собиқадорони соҳа иштироку суханронӣ намуданд.

Алимаҳмад Мирзоев, раиси Шурои собиқадорони соҳаи тарбияи ҷисмонӣ ва варзиш ҷаласаи шуроро оғоз намуда, рӯзномаи онро ба аҳли нишаст шинос намуд. Ӯ иброз дошт, ки ҷаласаи имрӯзаи собиқадорони соҳа, ки дар арафаи таҷлили Рӯзи варзишгарон баргузор мегардад, барои беҳбудӣ ва баррасии мушкилоти варзишӣ, инчунин оммавияти варзиш дар кишвар бояд мусоидат кунад.

Рӯзномаи ҷаласа натиҷагирии фаъолияти шуро, инчунин рушди варзиши касбӣ, рушди оммавияти тарбияи ҷисмонӣ ва варзиш ва тасдиқи нақшаи шуро барои солҳои 2022-2023 буд, ки перомуни он маърӯзаҳо ироа гаштанд.

Баъд аз ҷаласаи Шурои собиқадорони соҳа Маликшоҳ Неъматзода, раиси Федератсияи иттифоқҳои касабаи мустақили Тоҷикистон вобаста ба Рӯзи варзишгарон баромад намуда, собиқадорони соҳаи варзишро ба ин рӯз муборакбод намуд.

- Имрӯз рӯзи диловарон ва муаррифгарони миллат аст. Маҳз ҳамин варзишгаронанд, ки миллатро дар арсаи байналмилалӣ муаррифӣ менамоянду Парчами кишварро парафшон месозанд. Ҳамин варзишгарон буданд, ки аз аввали давлатдорӣ ва ба даст овардани Истиқлолияти комили миллӣ дар бари Пешвои миллат рост истода, ватансозӣ намуданд. Барои ҳамин, Рӯзи варзишгарони Тоҷикистонро ба тамоми парчамбардорон муборакбод гуфта, барояшон пешравии аз ин беш ва дастовардҳои беназири таърихофар ва муаррифкунандаи Ватанро орзумандам, - иброз дошт Маликшоҳ Неъматзода.

Сипас, Абдулло Раҳмонзода, раиси Кумитаи кор бо ҷавонон ва варзиш вобаста ба Рӯзи варзишгарон баромад намуда, варзишгаронро ба рӯзи касбиашон шодбош гуфт.

Пас аз итмоми кори шуро бо тасмими якҷояи шаҳрдории Душанбе ва КҶВ дар тарабхонаи “Яккачинор”-и пойтахт барои собиқадорони соҳа барномаи фарҳангӣ баргузор гардид.

Пеш аз оғози чорабинии фарҳангӣ Дилбар Одилзода, муовини раиси шаҳри Душанбе баромад намуда, собиқадорону варзишгаронро аз номи раиси шаҳри Душанбе табрику муборакбод намуд.

Ӯ зимни суханронии хеш иброз дошт: “Аз ҷониби Ҳукумати Ҷумҳурии Тоҷикистон бо сарварии Пешвои миллат муҳтарам Эмомалӣ Раҳмон соҳаи варзиш сол то сол рӯ ба беҳбудӣ ниҳодааст. Таҷлили Рӯзи варзишгарон дар Тоҷикистон бесабаб набуда, моро водор месозад, ки ба гузаштаи худ назар афканда, аз рушду нумуи ин соҳа дар солҳои соҳибистиқлолӣ бохабар бошем”.

Баъд аз суханронӣ ба собиқадорону варзишгарони фаъол унвонҳои “Мураббии шоистаи Ҷумҳурии Тоҷикистон”, “Устоди варзиши Ҷумҳурии Тоҷикистон”, инчунин “Корманди шоистаи Ҷумҳурии Тоҷикистон” супорида шуд.

Дар охир барномаи рангини фарҳангӣ пешкаши ҳозирин гардонида шуд.