28 октябр дар ноҳияи Дӯстӣ бо иштироки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон варзишгоҳи марказӣ бо 3000 ҷойи нишаст ба истифода дода шуд.

Дар ин бора Хадамоти матбуоти Президенти ҷумҳурӣ хабар медиҳад.

Варзишгоҳи марказии ноҳияи Дӯстӣ дар доираи нақшаи чорабиниҳо бахшида ба 30-солагии Истиқлолияти давлатии Ҷумҳурии Тоҷикистон бо маблағгузории Дирексияи сохтмонии иншооти ҳукуматии Дастгоҳи иҷроияи Президенти Ҷумҳурии Тоҷикистон бунёд гардидааст.

Масоҳати умумии варзишгоҳ 8,64 гектарро ташкил дода, ин ҷо дар масоҳати зиёда аз шаш ҳазор метри мураббаъ корҳои кабудизоркунӣ анҷом дода шудааст.

Дар варзишгоҳ шароити мусоид барои ҷавонону варзишгарони ноҳия дар самти ташкили тамринҳои ҳаррӯза, гузаронидани мусобиқаҳои гуногуни ноҳиявию вилоятӣ ва ташкили чорабиниҳои варзишӣ имконоти васеъ фароҳам аст.