Сомон Маҳмадбеков ҷудочии маъруфи кишвар нимаи дуюми имрӯз дар финали мусобиқаи “Осиё-Уқёнусия” бо ду карат қаҳрамони ҷаҳон, ду маротиба барандаи нишони тиллои “Grand Slam” ва Чемпиони “Doha Masters 2021”, варзишгари кишвари Кореяи Ҷанубӣ – Ан Чангрим рақобат намуда, бо вуҷуди талошҳои зиёд аз рақибаш шикаст хурд.

Ӯ то даври ниҳоӣ расидан, дар даври аввал бо намояндаи Яман –Айяш Аҳмад рақобат намуда, пирӯз шуд. Дар даври дуюм варзишгари эронӣ Муҳаммадӣ Муҳаммадро мағлуб сохт ва ба даври нимниҳоӣ роҳ ёфт. Дар ин давр Маҳмадбеков бо маҳорати баланди нерусанҷии худ Жансай Самагулови Қазоқистонро мағлуб намуда буд.

Ҳамин тавр Сомон Маҳмадбеков дар мусобиқаи мазкур ҷои дуюмро ишғол намуда, сазовори медали нуқра гардид.

И. АМАКҶОНОВ "ҶТ"