Дар доираи ҳамкориҳои Раёсати кор бо ҷавонон ва варзиши вилояти Суғд ва Раёсати ВКД Ҷумҳурии Тоҷикистон дар вилояти Суғд аз 20-ум то 25-уми декабри соли равон бахшида ба “Соли рушди сайёҳи ва ҳунарҳои мардумӣ” мусобиқаҳои варзишӣ аз рӯи намудҳои бокс, байни ҷавонписарон ва волейбол, байни ҷавондухтарон доир карда шуд.

Дар мусобиқа оид ба намуди бокс варзишгарони соли таваллудашон 2002 - 2003 аз рӯи 10 вазн аз шаҳру ноҳияҳои Хуҷанд, Истаравшан, Бӯстон, Исфара ва Бобоҷон Ғафуров, дар мусобиқаи волейбол байни бонувон даҳ даста аз шаҳру ноҳияҳои вилояти Суғд дар ҳайати зиёда аз 100 нафар варзишгар ширкат варзиданд.

Дар мусобиқа аз рӯи намуди волейбол ҷойи аввал насиби бонувони Коллеҷи тиббии ноҳияи Бобоҷон Ғафуров, ҷойи дуюм насиби дастаи ноҳияи Ҷаббор Расулов ва ҷойи сеюм ба дастаи шаҳри Истаравшан муяссар гардид.

Санаи 25-уми декабри соли равон дар толори варзишии "Ҷавонӣ" - и ноҳияи Бобоҷон Ғафуров маросими пӯшидашавии мусобиқаҳо баргузор гардид ва дар ҷараёни он намояндагон аз Раёсати Вазорати корҳои дохилӣ дар вилояти Суғд ва Раёсати кор бо ҷавонон ва варзиши вилояти Суғд иштирок ва суханронӣ намуда, ғолибони мусобиқаро бо ҷом, медал ва сипосномаҳо қадрдонӣ намуданд.

Чунин тадбир метавонад, баҳри солимгардонӣ ва аз ҷониби дигар барои пешгирӣ намудани кирдорҳои зидиҳуқуқӣ мусоидат намояд.