Дар маркази вилояти Суғд шаҳри Хуҷанд бо иштироки раиси вилоят Раҷаббой Аҳмадзода толори варзишии ҷашнӣ бахшида ба Рӯзи варзишгарон мавриди истифода қарор дода шуд.

Раҷаббой Аҳмадзода, раиси вилояти Суғд, зимни суханронии худ дар назди варзишгарон ва мураббиёни соҳа аз таваҷҷуҳи пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба соҳаи варзиш ёдоварӣ намуда, афзуд, ки соли ҷорӣ баҳри рушди инфрасохтори варзишӣ дар вилояти Суғд беш аз 15 миллион сомонӣ ҷудо карда шуд ва дар як муддати кутоҳ силсилаи зиёди иншооти варзишӣ сохта ба истифода дода шуданд.

Иттилоъ дода шуд, ки ифтитоҳи чунин иншооти муосири варзишӣ бахшида ба Рӯзи варзишгарон фоли нек буда, ин созандагиҳо дар оянда низ идома хоҳад ёфт. Сипас, аз тарафи раиси вилоят ба Искандар Сангинов, мураббии мактаби варзишии №3-и шаҳри Хуҷанд, ки дар “Баҳри тоҷик” 9 километрро дар муддати 1 соат шино кардааст, туҳфаи хотиравӣ ва ифтихорнома тақдим карда шуд.

Толори варзишии номбурда дар маҳаллаи “Бофанда” бо харҷи 1 миллиону 300 сомонӣ бунёд гардида, он дорои 250 ҷойи нишаст, ҳуҷраҳои маъмурӣ ва утоқи шустушӯ мебошад.