Санаи 19 май, бахшида ба Рӯзи ҷавонони Тоҷикистон дар маркази вилояти Суғд чорабинии варзишии Дави миллӣ баргузор гардид, ки дар он раиси вилоят Раҷаббой Аҳмадзода низ ширкат варзид.

Раиси вилоят Раҷаббой Аҳмадзода, дар ҳузури иштирокдорони чорабинӣ суханронӣ карда, аз дастгириҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбати рушди соҳаи варзиш ва фароҳамсозии шароити мусоид барои ҷавонон ёдовар шуд.

Сипас, Дави миллӣ ва марафони велосипедронӣ оғоз ёфт ва қариб 30 000 нафар сокинони маркази вилоят, кормандони ташкилоту идораҳо, соҳаҳои фарҳангу маориф, тандурустӣ ва ҷавонону варзишгарон дар он иштирок карданд. 

Маросими ҷамъбастии чорабинии варзишӣ дар назди майдони Парчами давлатии Ҷумҳурии Тоҷикистон сурат гирифт ва ба иштирокчиёни фаъол туҳфаҳои хотиравӣ тақдим гардид.