Дар шаҳри Хуҷанди вилояти Суғд мусобиқаи байналмилалӣ оид ба камонварӣ барои дарёфти “Ҷоми Президенти Ҷумҳурии Тоҷикистон” баргузор шуд.

Дар ин чорабинии варзишӣ беш аз 100 нафар варзишгар ва мураббӣ аз Федератсияи Русия, Узбекистон, Қазоқистон, Қирғизистон, Бангладеш ва Ироқ ширкат варзиданд.

Мавриди зикр аст, ки ин мусобиқаи байналмилалӣ дар асоси нақшаи чорабиниҳои Федератсияи камонварии Тоҷикистон, Кумитаи кор бо ҷавонон ва варзиш назди Ҳукумати Ҷумҳурии Тоҷикистон ва бо дастгирии Мақомоти иҷроияи ҳокимияти давлатии вилояти Суғд аз 6 то 9 октябри соли 2025 дар Муассисаи давлатии “Мактаби махсуси варзишӣ оид ба намудҳои камонварӣ”-и вилояти Суғд баргузор гардид.

Дар маросими ифтитоҳи расмии мусобиқа намояндагони мақомоти иҷроияи ҳокимияти давлатии вилояти Суғд, роҳбарияти Кумитаи кор бо ҷавонон ва варзиш, Федератсияи камонварии Тоҷикистон ва меҳмонони хориҷӣ иштирок намуданд.

Дар рафти мусобиқа иштирокчиён дар ду намуд - камонварии классикӣ ва камонварии муосир рақобат намуданд. Варзишгарони ҷавон бо руҳияи баланди ватандӯстӣ ва иродаи қавӣ нишон доданд, ки мактаби камонварии Тоҷикистон дар роҳи пешрафт қарор дорад.

Мусобиқаи байналмилалии камонварӣ дар фазои дӯстӣ ва ҷаҳду талоши варзишгарон сурат гирифта, дар анҷоми мусобиқа беҳтарин варзишгарон бо ҷом, медал ва дипломҳои фахрӣ сарфароз гардонида шуданд.

Ҷоми Президенти Ҷумҳурии Тоҷикистон ба дастаи камонварони Тоҷикистон тақдим гардид.

Субҳиддин ҚОДИРОВ, “ҶТ”