Бо ибтикори Раёсати кор бо ҷавонон ва варзиши вилояти Суғд ва Федератсияи велосипедронии Ҷумҳурии Тоҷикистон мусобиқаи ҷумҳуриявӣ оид ба велосипедронӣ дар шоҳроҳ доир гардид.

Варзишгарон аз шаҳри Хуҷанд то назди гулгашти Парчами давлатии Ҷумҳурии Тоҷикистон дар шаҳри Бӯстон сабқат намуданд.

Нахуст дар гулгашти Парчами давлатии Ҷумҳурии Тоҷикистон дар шаҳри Бӯстон раиси шаҳри Бӯстон Раъно Ҳошимзода, раиси Федератсияи велосипедронии Ҷумҳурии Тоҷикистон Озодхон Давлатшоев ва сардори Раёсати кор бо ҷавонон ва варзиши вилояти Суғд Мирзоқосим Каримов оид ба ҳадаф ва мақсади баргузории озмун ибрози назар намуданд.

Зикр шуд, ки дар заминаи дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вобаста ба тарғибу ташвиқи тарзи ҳаёти солим, ҷалб намудани наврасон, ҷавонон ва калонсолон ба машғулияти тарбияи ҷисмонӣ ва варзиш ва мустаҳкам намудани алоқаи дӯстӣ байни варзишгарон мусобиқаи мазкур доир гардида истодааст. Яке аз ҳадафҳои дигари мусобиқаи ҷумҳуриявии мазкур муайян намудани узви дастаи мунтахаби Ҷумҳурии Тоҷикистон оид ба велосипедронӣ барои иштирок дар Чемпионати Осиё маҳсуб меёбад.

Сипас, дар фазои тантанавӣ ба беҳтарин иштирокчиён сипосномаву туҳфаҳо тақдим гардид.