Суҳроб Боқиев яке аз ҷудочиёни муваффақи кишвар буда, давоми фаъолияти варзишии хеш дастовардҳои назаррасро соҳиб гаштааст. Ӯ намояндаи вазни сабук буда, дар дастаи мунтахаби ҷудои Тоҷикистон шуруъ аз соли 2016 баромад мекунад. Баробари пайвастан ба дастаи мунтахаб маҳорати хуб нишон дода, дар фурсати кӯтоҳтарин натиҷаҳои назаррасро соҳиб гаштааст. Суҳроб дорандаи медали тиллои Ҷоми Осиё, байни ҷавонон (2016), медали нуқраи Ҷоми Аврупо, байни калонсолон (2017), Чемпиони Осиё, байни калонсолон (2018) ва медали биринҷии Чемпионати ҷаҳон байни хизматчиёни ҳарбӣ мебошад. Се карат қаҳрамони Тоҷикистон байни калонсолон аст. Мо бо ӯ перомуни фаъолияти варзишӣ ва нақшаҳои ояндааш суҳбате оростем, ки ба таври фишурда пешкаши хонанда мегардад.

- Суҳроб каме дар бораи худ бигӯед. Кӣ шуморо ба варзиш роҳнамоӣ кард?

- Ман дар оилаи варзишгар ба дунё омадаам. Падару амакҳоям варзишгаранд. Онҳо маро роҳнамоӣ кардаанд. Аз 3-солагӣ бо онҳо толори варзишӣ рафта, тамрин мекардам. Шӯру шавқи варзиш аз ҳамон лаҳзаҳо дар дили ман ҷой гирифта буд. Аз 5-солагӣ ба тамрин ҷиддӣ машғул шудам. Айни замон дар давлати Баҳрайн машқ карда истодаам.

- Аз чандсолагиатон нахустин маротиба дар мусобиқаҳои дохилӣ иштирок намудед?

- Нахустин маротиба дар 18-солагиам дар Чемпионати Ҷумҳурии Тоҷикистон иштирок кардам. Барои ин мусобиқа ҳамроҳи падарам тайёрии ҷиддӣ дида будам. Хушбахтона, сазовори ҷойи аввал гаштаам. Аз соли 2016 дар дастаи мунтахаби ҷудо фаъолиятамро шурӯъ намудам.

- Барои мо аз беҳтарин дастоварду беҳтарин хотиротатон бигӯед. Дар тӯли фаъ-олияти варзишиятон хотирмонтарин дастовардатон кадом буд?

- Бароям тамоми дастовардҳоям боарзишанд. Чун ҳамаи онҳоро бо арақи ҷабину заҳматҳои бешумор ба даст овардаам.

- Вақте ки ба майдони рақобат мебароед, чӣ шуморо барои расидан ба ғолибият таҳрик медиҳад?

- Дар майдони рақобат бештари вақт маро суханони Пешвои миллат муҳтарам Эмомалӣ Раҳмон қувват мебахшанду барои ғолибият таҳрик медиҳанд. Чун дар яке аз вохӯриҳояшон ба варзишгарон гуфта буданд, ки: “Шумо варзишгарон вақте дар майдони рақобат ҳастед, фикр накунед, ки танҳоед. Шумо ҳеч гоҳ танҳо нестед, кулли Тоҷикистон бо шумо ҳаст”. Воқеан ин суханҳо ҷон доранд. Дар мусобиқаҳо ҳатман гуфтаҳои Пешвои миллат пеши назарам меояду худро баҳодур меҳисобам.

- Дар вақтҳои холӣ ба чӣ корҳо машғул мешавед? Боз чӣ ҳунар доред- сурудхонӣ, ошпазӣ ва ё чизи дигар?

- Ғайр аз маҳорати варзишиям таомҳои бомазза омода карда метавонам. Ин шуғлро дӯст медорам. Дар вақтҳои холигӣ ба омода кардани ягон таом машғул мешавам. Ва баъдан ба тиловати Қуръон мепардозам.

- Ҳар ҷода душвориҳои худро дорад. Вақте равонаи роҳи ҷудо гардидед, бо чӣ гуна мушкилиҳо дучор шудед ва ҳангоми дучор шудан бо онҳо оё андешаи тарки ин пеша боре дар зеҳнатон пайдо шуда буд?

- Шебу фарозҳои роҳи варзишро бисёр тай намудаам. Дар яке аз мусобиқаҳоям китфам сахт зарб хурда буд. Зиёд тамрин карда наметавонистам. Бисёр азоб кашидам. Ҳатто ҳолатҳое шуд, ки хостам аз роҳи варзиш баргардам. Аммо натавонистам. Чун вақте самараи коратро мебинӣ, вақте парчами кишварат баланд бардошта мешаваду Суруди миллии меҳан дар байни кишварҳои зиёд садо медиҳад, он вақт тамоми ранҷу азобҳоят худ ба худ фаромӯш мешаванд. Бо вуҷуди ҳамаи дардҳо ман тамринҳоямро давом дода истодаам, зеро мақсад дорам, ки медали тиллои Бозиҳои олимпиро ба даст орам.

- Ба варзишгарони ҷавон ва ҳаводорони гӯштини ҷудо чӣ гуфтаниҳо доред?

- Ба варзишгарони ҷавон гуфтаниам, ки ба ягон мушкилӣ нигоҳ накарда, тамринҳои худро идома диҳанд. Ноумед нашаванд. Худо хоҳад рӯзе ба мақсад мерасанд. Ба мухлисону ҳаводорони варзиш гуфтаниам, ки аз мо натиҷаҳои хубро интизор шаванд.

- Чӣ нақшаҳо доред?

- Барои мусобиқаҳои дарпешистода омодагии ҷиддӣ дида истодаем. Аз Чемпионати ҷаҳон, Чемпионати Осиё ва Бозиҳои осиёӣ инчунин Гран При, Гран Слам медали тиллоро бояд соҳиб шавам.