Тайсон Фюри муштзани сангинвазни бритониёӣ дар рақобат муқобили муштзани украинӣ Александр Усик, ки барои унвони қаҳрамони мутлақи ҷаҳон дар вазни вазнин мубориза мебарад маблағи зиёд хоҳад гирифт.

Муборизаи Усик ва Фюри рӯзи 18 май дар пойтахти Арабистон Сауди шаҳри Риёз баргузор мешавад. Муштзанон дар майдони “Кинг Арена” байни ҳам рақобат намуда, камарбандҳои WBA, WBO, IBF, IBO ва WBC –ро ҳимоя мекунанд.

Гуфта мешавад, ки Фюри барои ворид шудан ба ринг 69 миллион доллар дарёфт хоҳад кард. Рақиби ӯ муштзани украинӣ ҳамагӣ 34 миллион доллар дастмузд хоҳад гирифт. Маблағҳои ба муштзанон пешниҳод шуда, дар корномаи ҳарду рекорди хоҳад буд.

Қаблан матбуоти бритониёӣ тақсими боҷҳоро дар таносуби 70/30 ба фоидаи Фюри пешгӯӣ карда буд. Маблағи ҷоизаи ӯ ҳатто метавонад ба 100 миллион доллар бирасад. Муштзани украинӣ ба ҷоизаи камтаре розӣ шуд ва пеш аз рақобат ваъда дод, ки аз маблағи ба даст омада ба яке аз фондҳои дастгирии Украина 1 миллион фунт хайр хоҳад кард.

Яҳё МАҲМАДНАБИЕВ, “ҶТ”