Темур Раҳимов ҷудокори сангинвазни меҳан дар вазни худ ба гирифтани нишони биринҷии Қаҳрамонии ҷудои Осиё дар Ҳонгконг даст ёфт.

Ин варзишгари маъруфу маҳбуби кишвар дар мусобиқа барои гирифтани медали биринҷӣ Азамат Чотчаев варзишгар аз кишвари Баҳрайнро бо имтиёзи иппон мағлуб намуд.

Темур Раҳимов рақобатҳои худро аз марҳилаи чаҳорякниҳоӣ оғоз кард. Ҳарифи ӯ дар ин давр Дарма Агастяи индонезӣ буд. Паҳлавони ботаҷриба ва сангинвазни кишвар бо шикаст додани ин рақиби худ роҳашро ба марҳилаи ниманиҳоӣ ҳамвор сохт.

Дар даври ниманиҳоӣ ҳарифи Темур аз кишвари Ҷопон гашт. Паҳлавони кишвар дар нерӯсанҷӣ бо Ота Ҳюогаи ҷопонӣ бо имтиёзи вазарӣ мағлуб шуда, рақобатро барои медали биринҷӣ идома дод, ки ин рақобат барояш бомуваффақият ҷамъбаст гардид.

Ин сеюмин медали биринҷии ҷудокорони кишвар аз Қаҳрамонии ҷудои Осиё ба ҳисоб меравад. Пеш аз Темур Раҳимов, ҳамчунин, Сомон Маҳмадбеков ва Ҷаҳонгир Маҷидов ба гирифтани нишони мазкур даст ёфта буданд.