Темур Раҳимов паҳлавони тоҷик дар мусобиқаи ҷудои “Antalya Grand Slam 2022”, ки 1-3 апрели соли равон дар шаҳри Анталияи Туркия бо иштироки 525 варзишгар (312 мард, 213 зан) аз 63 давлати дунё доир гардид, сазовори ҷойи сеюм ва соҳиби медали биринҷӣ шуд.

Темур мусобиқаро дар вазни +100кг аз даври дуюм оғоз намуда, бар Григорий Приор аз ШМА ва Магамедумар Магамедумаров аз АМА пирӯз шуд, вале дар чорякфинал аз намояндаи Венгрия Ричард Сипоз мағлуб гардид. Ӯ сипас дар қувваозмоии тасаллобахш Ушангӣ Кокаурии озарбойҷонӣ ва дар қувваозмоӣ барои ҷои сеюм Ҷозеф Терҳеки фаронсавиро мағлуб намуд.

Дар мусобиқаи ҷудои “Antalya Grand Slam 2022” ғолибону ҷоизадорон дар баробари медал бо ҷоизапулӣ қадрдонӣ гардиданд – барои ҷои аввал 5000 евро, барои ҷои дуюм 3000 евро ва барои ҷои сеюм 1500 евро.

Ёдовар мешавем, ки ин панҷумин медали Темур Раҳимов дар мусобиқоти сайри ҷаҳонии ҷудо ба ҳисоб меравад. Ӯ соли 2019 дар Гран Прии Марокаш медали биринҷӣ, соли 2021 дар Гранд Слами Боку медали нуқра, дар Гранд Слами Абу Дабӣ медали биринҷӣ, соли 2022 дар Гранд Слами Тел Авив медали биринҷӣ ба даст оварда буд. Ҳамчунин, дар Чемпионати Осиё/Уқёнус соли 2019 сазовори медали нуқра ва соли 2021 сазовори медали биринҷӣ шудааст.