Имрӯз дастаи мунтахаби футзали Тоҷикистон дар бозии аввалини худ дар Ҷоми Осиё-2024 тими Кореяи Ҷанубиро шикаст дод.

Вохӯрии мазкур дар маҷмааи варзишии “Бангкок Арена”-и кишвари Тайланд баргузор шуда, футзалбозони тоҷик бо ду голи беҷавоби худ ба муқобили ҳарифонашон зафар ёфтанд. Аз ҳайати тими мунтахаби кишвар дар ин рақобат Файзалӣ Сардоров ва Идрис Ёров ба задани гол даст ёфтанд.

Қайд кардан ба маврид аст, ки мусобиқаи мазкур аз санаи 17-ум то 28-уми апрел дар Тайланд баргузор мегардад. Тими мунтахаби кишварро дар Ҷоми Осиё-2024 Пайрав Воҳидов роҳбарӣ мекунад.

Футзалбозони мо дар идома ҳамчунин бо дастаҳои дигари ин мусобиқа рақобат мекунанд. Ҳарифони онҳо дар даврҳои баъди тимҳои Қирғизистон ва Ҷопон мебошанд.

Тими мунтахаби мо 20 апрел бо Қирғизистон ва 22 апрел бо мунтахаби Ҷопон рақобат менамоянд.