Дастаи “Хуҷанд”-и шаҳри Хуҷанд дар бозии ҷавобии плей-оффи Ҷоми Конфедератсияи футболи Осиё-2019 (КФО) бо тими “Аҳал”-и Ҷумҳурии Туркманистон мусовӣ 0-0 намуда, ба даври гурӯҳӣ роҳхат гирифт.

Дидори мазкур имрӯз -13-уми март дар варзишгоҳи “20-солагии Истиқлолияти Тоҷикистон”-и шаҳри Хуҷанд баргузор шуд. Дастаи “Хуҷанд” дар бозии нахустини марҳилаи интихобӣ, ки дар меҳмонӣ бо тими “Аҳал” мусовӣ 1-1 намуда буд, аз ин ҳисоб ба даври гурӯҳӣ баромад.

Акнун, хуҷандиҳо дар марҳилаи гурӯҳии Ҷоми КФО -2019 дар гурӯҳи "D" бо дастаҳои “Истиқлол” (Тоҷикистон), "Дордой" (Қирғизистон) ва "Алтин Асир" (Туркманистон) рақобат мекунад.

Марҳилаи гурӯҳии Ҷоми КФО-2019 дар минтақаи Марказӣ 2-юми апрел оғоз ёфта, 26-уми июн ба поён мерасад. Ба марҳилаи баъдӣ танҳо ғолиби гурӯҳ роҳ меёбад.