Шоми 9-уми октябр тими миллии футболи Тоҷикистон дар Варзишгоҳи марказии шаҳри Ҳисор дар даври сеюми марҳилаи интихобии Ҷоми Осиё-2027 дастаи мунтахаби Ҷазираҳои Малдивро бо ҳисоби 2:0 шикаст дод.

Дидори дастаҳо дар ҳузури сершумори мухлисони тоҷик баргузор гардида, аз дақиқаҳои аввал бартарӣ ҷониби мунтахаби Тоҷикистон буд. Ҳамин тавр, ҳамлагари мунтахаби Тоҷикистон Шаҳром Самиев дар дақиқаи 8-ум ҳисобро кушод. Голи дуюми мизбононро ҳамлагар Шервонӣ Муҳаббатшоев дар дақиқаи 30-юм ба самар расонд. Дар нимаи дуюми бозӣ футболбозони тоҷик чандин лаҳзаҳои хуби голзаниро аз даст доданд ва ҳисоб тағйир наёфт.

Ин аввалин бозии тими миллии Тоҷикистон таҳти роҳбарии Горан Стеванович, мутахассиси 58-солаи сербиягӣ, буд, ки шартномааш бо Федератсияи футболи Тоҷикистон то 31-уми марти соли 2026 баста шудааст.

Дар бозии дигари даври сеюм дар гурӯҳи “А” дастаи мунтахаби Тимори Шарқӣ дар майдони худ аз тими миллии Филиппин бо ҳисоби 1:4 шикаст хӯрд. Ҳамаи голҳо дар нимаи дуюми дидор зада шуд. Гали Фрейтас, бозигари мизбонон дар дақиқаи 47-ум ҳисобро боз кард. Сипас, чаҳор голи филиппиниҳоро ҳамлагар Бйорн Кристенсен ба самар расонд.

Рақибони дастаи мунтахаби Тоҷикистон дар марҳилаи интихобии Ҷоми Осиё-2027 дар гурӯҳи “А” тимҳои миллии Филиппин, Малдив ва Тимори Шарқӣ мебошанд.

Футболбозони тоҷик дар даври аввали мусобиқот, ки 25-уми марти имсол дар Варзишгоҳи марказии Душанбе доир гардида буд, бар тими миллии Тимори Шарқӣ бо ҳисоби 1:0 пирӯз шуда, дар даври дуюм 10-уми июн бозиро дар меҳмонӣ бо дастаи мунтахаби Филиппин бо ҳисоби мусовии 2:2 анҷом дода буданд.

Баъди натиҷагирии бозиҳои даври сеюми мусобиқот дар гурӯҳи “А” дастаҳои мунтахаби Филиппин ва Тоҷикистон бо 7-имтиёзӣ пешсафанд. Аз рӯи таносуби беҳтари тӯбҳо Филиппин дар ҷойи аввал, Тоҷикистон дар зинаи дуюми ҷадвали гурӯҳ қарор доранд.

Яҳё МАҲМАДНАБИЕВ, “ҶТ”