Тими ҷавонони кишвар, бозингарони соли таваллудашон 1999 ва аз он паст, дар мусобиқа ба хотираи Валентин Гранаткин дар гурӯҳи "А" бо дастаҳои ҷавонони Юнон, Булғористон ва Эстония бозӣ мекунад.

29-ум мусобиқаи байналмилалӣ ба хотираи аввалин ноиби президенти Федератсияи байналмилалии футбол Валентин Гранаткин аз 8 то 21 январ дар шаҳри Санкт-Петербурги Русия доир мегардад. Дар мусобиқа 16 даста иштирок мекунанд.

Тибқи қуръакашӣ дастаҳо ба чор гурӯҳ тақсим шуданд. Тақвими бозиҳо баъдтар эълон хоҳад шуд.

Тибқи низомнома дар дар даври аввал бозиҳо ба таври даврӣ баргузор мешаванд. Ҳар даста бо дастаҳои дигари гурӯҳ якбозигӣ анҷом медиҳанд. Ҷойҳо аз рӯи холҳои бадастовардаи дастаҳо муайян мешаванд. Дастаҳое, ки дар гурӯҳҳо ҷойҳои якуму дуюмро ишғол мекунанд, дар даври ҳаштякфинал барои ҷойҳои 1-8-ум талош мекунанд. Дастаҳое, ки дар гурӯҳ ҷойҳои дуюму сеюмро мегиранд, барои ҷойҳои 9-16-ум муборизаро давом медиҳанд.

Тими мунтахаби ҷавонони кишвар омодагиро ба ин мусобиқа 14 декабр оғоз кард. Ситоди мураббиён ба машғулиятҳо 29 футболбозро даъват кардаанд, ки дар натиҷа 18 бозингар ба Санкт-Петербург сафар мекунанд.

Натиҷаи қуръакашии мусобиқа ба хотираи Валентин Гранаткин:

Гурӯҳи «А»: ТОҶИКИСТОН, Юнон, Булғористон, Эстония.
Гурӯҳи «В»: Латвия, Белорус, Русия, Ҳиндустон.
Гурӯҳи «С»: Литва, Озарбойҷон, Словакия, Қазоқистон.
Гурӯҳи «D»: Молдова, Словения, Санкт-Петербург, Эрон.