Дар радабандӣ ё рейтинги ФИФА (Федератсияи байналмилалии футбол), ки 23-юми декабр дар сомонаи расмии ин созмон нашр шудааст, дастаи мунтахаби миллии футболи Тоҷикистон дар байни 210 кишвар бо 1152.56 имтиёз дар ҷойи 116-ум қарор гирифтааст.

Дар феҳристи мазкур Белгия бо 1828.45 имтиёз ҷойи аввалро касб карда, Бразилия бо 1826.35 имтиёз дар зинаи дувум ҷойгир шудааст. Фаронса, қаҳрамони феълии ҷаҳон, бо 1786.15 имтиёз дар зинаи севум мебошад.

Аз байни кишварҳои пасошӯравӣ зинаҳои баландро дар феҳристи ФИФА Украина (25-ум, 1535.08 имтиёз), Русия (34-ум, 1493.42 имтиёз) ва Ӯзбекистон (84-ум, 1274.58 имтиёз) ба даст овардаанд.

Тоҷикистон дар байни кишварҳои Шӯравии собиқ аз Қазоқистон (119-ум), Озарбойҷон (120-ум), Туркманистон (133-ум), Латвия (134-ум), Литва (136-ум) ва Молдова (181-ум) пеш аст.

Амони МУҲАММАД, коромӯзи “ҶТ”