Бозиҳои зимистонаи паралимпӣ аз 9 то 18 март дар шаҳри Пйонгчанги Ҷумҳурии Корея баргузор гардида, дастаи Тоҷикистон дар ҳайати 5 нафар, 4 март  сафарбар шуданд.

Тавре сомонаи расмии Кумитаи миллии олимпии Тоҷикистон хабар медиҳад, дар Бозиҳои зимистонаи паралимӣ варзишгари тоҷик Сиёвуш Илёсов дар намуди лижаронӣ (кросс) қувва меозмояд. Сиёвушро дар ин сафар мураббияш Илҳомиддин Абдуллоев, президенти Кумитаи миллии паралимпии Тоҷикистон Сафар Боев, роҳбари даста Абдурауф Алимов ва ноиби президенти Ассотсиатсияи миллии намудҳои зимистонаи варзиши Тоҷикистон Зиннатулло Саидов ҳамроҳӣ менамоянд.

Сиёвуш Илёсов барои ба даст овардани роҳхат дар Ҷумҳурии Омон ба машғулиятҳои тамринӣ фаро гирифта шуда, аз 17 то 20 феврал дар ҳамон ҷо дар мусобиқаи интихобӣ иштирок кард. Ӯ, инчунин аз 20 феврал то 4 март дар Ҷоми ҷаҳон оид ба лижаронӣ ширкат намуда, бо 392 хол соҳиби роҳхат ба Бозиҳои паралимпӣ гардид.

Тоҷикистон бори аввал дар Бозиҳои зимистонаи паралимпӣ иштирок мекунад.

Барои иштирок дар бозиҳо 570 варзишгар аз 49 кишвар ба қайд гирифта шудаанд. Ба 3 дастаи калонтарин ШМА (68 варзишгар), Канада (52 варзишгар) ва Ҷопон (38 варзишгар) дохиланд.