Шоми дирӯз, 6 ноябр тими мунтахаби ҷавонони 19-солаи Тоҷикистон оид ба футбол бозии сеюми худро дар доираи рақобатҳои интихобии Ҷоми Осиё-2018 дар гурӯҳи “В” бо ҳамсолонашон дастаи якачини Молдив баргузор намуд.

Ин дидор дар Варзишгоҳи марказии шаҳри Ҳисор ҷараён ёфта, футболбозони тоҷик ба дарвозаи ҳариф 5 голи беҷавод ворид намуданд. Дар ин набард ниммуҳофизатгари тими кишвар Шервон Мабатшоев (14,80) ду голро ба номи худ сабт намуда, дублро анҷом дод. Голҳои дигари дастаи мунтахби ҷавонони кишварро Эҳсони Панҷшанбе (45+1), Шериддин Бобоев (73) ва Шаҳром Самиев (88) ба ҳадаф расонданд.

Дар бозии дигари ин гурӯҳ тими мунтахаби Ӯзбекистон дастаи Бангладешро бо ҳисоби 1:0 шикаст дод. Голи ҳалталабро ҳимоятгари мунтахаби Бангладеш Муҳаммад Атикуззамон дар дақиқаи 90+4 вориди дарвозаи худ намуд.

Рақобатҳои даври ҷамъбастии мусобиқоти интихобии қаҳрамонии Осиё-2018 дар гурӯҳи “В” рӯзи 8-уми ноябр дар Варзишгоҳи марказии Ҳисор барузор мешавад. Дар ин рӯз дастпарварони Мубин Эргашев бо мунтахаби Ӯзбекистон бозии тақдирсози худро баргузор менамоянд.

Дар ҳоли ҳозир мунтахаби ҷавонони Ӯзбекистон бо 9 хол садрнишини ҷадвали гурӯҳи “В” буда, дастаи якачини Тоҷикистон бо 7 имтиёз дар мақоми дуюм қарор гирифтаанд. Дидори охирин барои мақоми аввалро касб намудан барои ҳарду ҳалталаб мебошад.

Ёдовар мешавем, ки марҳилаи ниҳоии қаҳрамонии футболи Осиё-2018 миёни дастаҳои мунтахаби ҷавонони 19-сола дар Малайзия барпо мегардад. Роҳхатро ғолибони 10 гурӯҳи интихобӣ ва 5 дастае, ки дар гурӯҳҳои худ мавқеҳои дуюмро касб намуданд, аз рӯи нишондодҳои беҳтарин ба даст меоранд.

Мусобиқоти қаҳрамонии футболи осиё-2018 миёни дастаҳои мунтахаби ҷавонони 19-сола

Даври 5-ум, 8 ноябр (чоршанбе):

14:00. Шри-Ланка – Бангладеш. Ҳисор, Варзишгоҳи марказӣ
17:00. Ӯзбекистон – Тоҷикистон. Ҳисор, Варзишгоҳи марказӣ