Анҷумани рӯзноманигорони риштаи варзиши Тоҷикистон номи 10 варзишгари беҳтарини Тоҷикистон дар соли 2021-ро нашр кард.

Тибқи иттилои Нарзулло Латифов, роҳбари анҷуман, ин феҳраст дар пайи натиҷагирӣ аз назару андешаҳои хабарнигорони варзишӣ дар риштаҳои гуногун таҳия шудааст. Даҳ варзишгари беҳтарини Тоҷикистон дар соли 2021, аз нигоҳи анҷуман чунин аст:

1. Темур Раҳимов (ҷудо) – барандаи медали биринҷии Чемпионати Осиё дар вазни +100 кг дар Бишкеки Қирғизистон, медали нуқраи мусобиқаи “Тоскулоҳи бузург” (“Baku Grand Slam 2021”) дар Бокуи Озарбойҷон, медали биринҷии мусобиқаи “Abu Dhabi Grand Slam 2021” дар Абузабии Аморати Муттаҳидаи Араб, ғолиби Ҷоми президенти Тоҷикистон дар Душанбе;

2. Акмалиддин Каримов (самбо) – барандаи медали тиллои Чемпионати ҷаҳон дар вазни 58 кг дар шаҳри Тошканди Ӯзбекистон, медали нуқраи Ҷоми президенти FIAS (Федератсияи байналмилалии самбо) дар шаҳри Санкт-Петербурги Русия, медали биринҷии Ҷоми ҷаҳон дар шаҳри Маскави Русия;

3. Комроншоҳ Устопириён (ҷудо) – барандаи медали биринҷии Чемпионати Осиё дар вазни 90 кг дар Бишкеки Қирғизистон, медали нуқраи мусобиқаи “Тоскулоҳи бузург” (“Abu Dhabi Grand Slam 2021”) дар шаҳри Абузабии Имороти Муттаҳидаи Арабӣ, ғолиби Ҷоми Президенти Тоҷикистон дар Душанбе;

4. Сомон Маҳмадбеков (ҷудо) – барандаи медали нуқраи Чемпионати Осиё дар вазни 73 кг дар шаҳри Бишкеки Қирғизистон;

5. Хушқадам Хусравов (самбо) - барандаи медали нуқраи Чемпионати ҷаҳон дар вазни 64 кг дар шаҳри Тошканди Ӯзбекистон, ғолиби Ҷоми ҷаҳон дар шаҳри Маскави Русия;
6. Далер Ризозода (гуштини юнониву румӣ) – барандаи медали нуқраи Чемпионати Осиё дар вазни 77 кг дар шаҳри Алмаатои Қазоқистон;

7. Миҷгона Самадова (бокс) - барандаи медали биринҷии Чемпионати Осиё дар вазни 57 кг дар Дубайи Имороти Муттаҳидаи Араб, медали тилои Ҷоми ҷаҳон дар шаҳри Нижневартовски Русия;

8.Баҳодур Усмонов (бокс) – барандаи медали биринҷии чемпионати Осиё дар вазни 64 кг дар Дубайи Имороти Муттаҳидаи Арабӣ;

9.Шаббос Неъматуллоев (бокс) – барандаи медали биринҷии чемпионати Осиё дар вазни 81 кг дар Дубайи Имороти Муттаҳидаи Арабӣ;

10.Моҳрӯ Ҳалимова (таэквондо ВТФ) - барандаи медали биринҷии чемпионати Осиё дар вазни 67 кг дар Бейрути Лубнон.

Амони МУҲАММАД, коромӯзи “ҶТ”