Аз 19 сентябр то инҷониб дар Қасри варзиши шаҳри Хуҷанд 9-ум мусобиқаи байналмилалӣ оид ба ҷудо барои дарёфти Ҷоми Президенти Тоҷикистон доир гашта истодааст, ки дар он баробари варзишгарони Тоҷикистон, ҷудочиён аз кишварҳои ҳамсоя ширкат варзида истодаанд.

Мусобиқа аз рӯи 5 вазн миёни мардон (-66 кг, -81 кг, -90 кг, -100 кг ва +100 кг) ва 2 вазн миёни бонувон (-57 кг ва -63кг) сурат гирифтаистодааст.

Дар рӯзи якуми мусобиқа рақобатҳо аз рӯи чаҳор вазн сурат гирифт. Зери вазни -57 кг ва - 63 кг бонувон ва зери вазни -66 кг ва -81 кг мардон барои ба даст овардани нишонҳои фахрӣ сабқат карданд.

Тавре сомонаи расмии телевизиони варзиш хабар медиҳад, 31 нафар ҷудокор зери вазни то 66 килограмм барои ба даст овардани нишонҳои фахрӣ мубориза бурданд. Нишони тиллои ин вазнро ҷудокори тоҷик Муллораҷаб Халифаев соҳиб шуд. Муллораҷаб дар даври ниҳоӣ муқобили ҷудокори рус Обид Ҷебов бо се шидо зафар ёфт. Ҳамчунин дар ин вазн ҷудокорони бомаҳорат ба монанди Абубакр Шеров ва Шаҳбози Саидаброр ҳам ҳунарнамоӣ карданд. Абубакр дар даври аввал ба таври ҳангомавӣ аз ҷудокори ӯзбек Отабек Отаназаров бо имтиёзи иппон мағлуб гардид. Шаҳбоз Саидаброров бошад барои ба даст овардани нишони биринҷӣ аз ҷудкори ӯзбек Артём Штурбабин сарафканда шуд. Дилшодбек Юлдошев аз кишвари Ӯзбекистон аввалин нишони биринҷии 9-умин мусобиқаи байналмилалии Ҷоми Президенти Ҷумҳурии Тоҷикистон оид ба ҷудоро соҳиб шуд. Дилшодбек барои ба даст овардани нишони биринҷӣ ҳамватанаш Отабек Отаназаровро мағлуб кард.

Ёдовар мешавем, ки соли гузашта Дилшодбек зери вазни то 66 килограмм дар мусобиқаи байналмилалии Ҷоми Президенти Ҷумҳурии Тоҷикистон оид ба ҷудо дар шаҳри Душанбе ба гирифтани нишони тилло даст ёфта буд.

Ғолибони вазни то 66 кг
1.Муллораҷаб Халифаев (Тоҷикистон)
2.Обид Ҷебов (Русия)
3.Дилшодбек Юлдошев (Ӯзбекистон)
3.Артём Штурбабин (Ӯзбекистон)

Барои ба даст овардани нишонҳои фахрии зери вазни то 81 килограмм 28 ҷудокор мубориза бурданд. Нишони тиллои ин вазнро ҷудокори бомаҳорати тоҷик Ҳамроз Раҷабов ба даст овард. Ҳамроз дар даври ниҳоӣ ҷудокори эронӣ Меҳдӣ Фатҳиро бо имтиёзи иппон шикаст дод. Ҷудокори ӯзбек Рамазон Аллабердиев барои ба даст овардани нишони биринҷӣ ҷудокори тоҷик Ғаниҷон Ғаниевро дар сонияҳои аввали рақобат бо як маҳорати баланд шикаст дод. Ғаниҷон миёни 28 ҷудокор, ки зери вазни то 81 кг ҳунарнамоӣ карданд, 5-ум шуд. Раҳматуллобек Фарҳодов барои ба даст овардани нишони биринҷии мусобиқаи байналмилалии Ҷоми Президенти Ҷумҳурии Тоҷикистон оид ба ҷудо Субҳиддин Халилзодаро шикаст дод. Раҳматуллобек бо тахтапушт Субҳиддинро нигоҳ дошт ва ҳамин тавр бо имтиёзи иппон ғолиб гардид.

Ғолибони вазни то 81 кг
1.Ҳамроз Раҷабов (Тоҷикистон)
2.Меҳдӣ Фатҳӣ (Эрон)
3.Аллабердиев Рамазон (Ӯзбекистон)
3.Раҳматуллобек Фарҳодов (Тоҷикистон)

Миёни бонувон Шоҳида Қаландарова , Аҳлия Муминова ва Фазилат Гулбоева дар мусобиқаи байналмилалии Ҷоми Президенти Ҷумҳурии Тоҷикистон оид ба ҷудо ба гирифтани зинаҳои фахрӣ мушарраф гардиданд.

Ғолибони вазни то 57 кг
1.Шоҳида Қаландарова (Тоҷикистон)
2. Аҳлия Муминова (Тоҷикистон)
3. Фазилат Гулбоева (Тоҷикистон)

Дар вазни то 63 кг Мавлуда Одинаева дар даври ниҳоӣ Ҷононаи 16 соларо мағлуб карда нишони тиллои мусобиқаро соҳиб шуд.

Ғолибони вазни то 63 кг
1.Мавлуда Одинаева(Тоҷикистон)
2.Ҷонона Назарова (Тоҷикистон)
3.Рузафсун Бекназарова (Тоҷикистон)

Дар рӯзи дувуми мусобиқа бошад, рақобатҳо аз рӯи вазнҳои боқимонда сурат гирифта, варзишгарони мо аз рӯи натиҷаҳои пешкӣ чунин натиҷаҳоро соҳиб гаштанд.

Дар рӯзи дуюми мусобиқаи байналмилалии Ҷоми Президенти Ҷумҳурии Тоҷикистон оид ба ҷудо дар шаҳри Хуҷанд ҷудокори тоҷик Акмал Муродов зери вазни то 90 кг дар даври аввал ноком шуд. Акмал бо ду вазари аз ҷудокори эронӣ Қосим Бақчеқӣ мағлуб шуд ва аз идомаи мусобиқа бенасиб монд. Қосим Бақчеқӣ дар даври дуюм ҳамакнун бо ҷудокори дигари тоҷик Парвиз Абдураҳмонов сабқат мекунад.

Мансур Раҳмон миёни сангинвазнҳо бо имтиёзи иппон Некрӯз Некбахтзодаро дар дақиқаҳои аввали сабқат мағлуб кард ва ба даври чаҳорякниҳоии мусобиқаи байналмилалии Ҷоми Президенти ҶТ оид ба ҷудо роҳ ёфт. Дар ин давр Мансур бо Жамбул Тургиналиев аз Қазоқистон сабқат хоҳад кард.

Ҷудокори дигари тоҷик Кароматулло Ҳакимов зери вазни то 90 кг бо имтиёзи иппон муқобили ҷудокори ӯзбек Озобек Муротов ғалаба кард ва ба даври нимниҳоии мусобиқаи Ҷоми Президенти ҶТ оид ба ҷудо роҳ ёфт. Кароматулло ҳамакнун дар даври ниманиҳоӣ бо ҷудокори дигари ӯзбек Озодбек Назарбекзода барои роҳ ёфтан ба даври ниҳоӣ мубориза мебарад.

Ёдовар мешавем, ки мусобиқаи байналмилалӣ оид ба ҷудо барои дарёфти Ҷоми Президенти Тоҷикистон аз соли 2013 баргузор мешавад. Ғолибони мусобиқа имсол бо 40 000 сомонӣ, барандагони ҷои дуюм бо 20 000 сомонӣ ва ҷои сеюм бо 10 000 сомонӣ қадрдонӣ мешаванд.