Муҳаммадҷон Наимов, варзишгари маъруфи тоҷик дар муҳорибаҳои омехта (ММА), дар мусобиқоти UFC (Ultimate Fighting Championship) бори сеюм пирӯз гардид.

Ба иттилои портали The Sports Daily, барои пирӯзии севумаш дар UFC Наимов ҳамагӣ 28 ҳазор доллар (12 ҳазор барои баромад, 12 ҳазор барои пирӯзӣ, 4 ҳазор аз ҳисоби сарпарастон) кор кард.

Бояд гуфт, ки ин размикори 29-сола дар шаби набардҳои UFC Fight Night 237, ки 25-уми феврал дар пойтахти Мексика – шаҳри Мехико доир гардид, дар вазни нимасабук (66 кг) ба рақибаш Эрик Силваи 36-сола аз Венесуэла дар муддати 44-сония, дар раунди якум, бо нокаути техникӣ ё фаннӣ ғалаба кард.

Муҳаммадҷон Наимов дар муҳорибаҳои омехта (ММА) аз 12 рақобат дар 10-тоаш пирӯз шуда, дутоашро бохтааст. Дар UFC бошад, вай дар ҳарсе рақобати худ дастболо шудааст.

Наимов моҳи майи соли 2023 бо созмони UFC шартнома бастааст. Вай дар аввалин рақобаташ дар UFC 3-юми июни соли 2023 дар шаҳри Лас-Вегаси Иёлоти Муттаҳидаи Амрико бар Ҷейми Малларкии 29-солаи австралиягӣ дар раунди дуюм бо нокаути техникӣ ё фаннӣ пирӯз шудааст.

Баъдан, 21-уми октябри соли гузашта ӯ дар мусобиқоти UFC 294 дар шаҳри Абузабии Имороти Муттаҳидаи Арабӣ бар Натаниэл Вуди 30-сола аз Британияи Кабир бо тасмими якдилонаи доварон ғалаба кардааст.

Топ 10 размандагоне, ки аз UFC-237 маблағҳои аз ҳама зиёдро кор кардаанд:

Брайан Ортега 361,000$
Яир Родригес 261 000$
Брэндон Морено 216,000$
Брэндон Ройвал 206,000$
Раони Барселос 131,000$
Фарес Зиам 106,000$
Даниел Зелхубер 78,500$
Мануэл Торрес 78,500$
Франсиско Прадо 66 000$
Клаудио Пуэллес 66 000$

Яҳё МАҲМАДНАБИЕВ, “ҶТ”