ВАРЗИШ
Якшанбе 23 Июн 2024 04:49
8812
Кам варзишгаронеро вохӯрдан мумкин аст, ки дар наврасӣ ё ҷавонӣ дар мактаби гӯштини тарзи озод ё юнону румӣ тамрин накарда бошанд. Наздик ба 90 фисади кӯдакону наврасон ва ҷавонони варзишгар пироҳани ин намудҳои гӯштинро ба тан кардаанд, ҳатто агар варзишгари ҳирфаӣ нашуда бошанд ҳам, болои майдони диловарӣ зиёд қувваозмоӣ кардаанд. Ҷавонони зиёд майл ба ин риштаи варзиш доранд. Аз ҷумла Ҳусейн Ҳасанов ҳамин риштаи варзишро дӯстдор аст.

Расо 17 сол муқаддам дар шаҳри Душанбе, дар оилаи коргар тифле чашм ба олами ҳастӣ кушод. Падару модар бо умеду орзуҳои зиёд исмашро гузоштанд Ҳусейн. Аз замони кӯдакӣ ин писарбача чолоку беқарор буд. Даву тозу футболбозиҳо дар саҳни ҳавлӣ бо ҷамъи писарони ҳамсоя басандагӣ намекард, ки дар хона низ Ҳусейн зиёд беқарорӣ менамуд. Волидайн хостанд ӯро ба толори варзишӣ баранд, то неруи худро дар тамринҳо сарф кунаду дар хона каме оромтабиат гардад. Ҳусейн ҳанӯз 9 сол дошт, ки ба толори гӯштингирӣ рафт. Ҳарчанд ҷисман кӯчак буд, дар дил орзуҳои бузург мепарварид. Мехост варзишгари номдору асил гардаду парчамбардори меҳан.

- Шӯру шавқ ва ангезае, ки дар худ нисбат ба варзиш доштам, ҳеҷ оромам намегузошт. Ин беқарориҳои маро волидонам дида, ба толори варзишӣ бурда, зери мураббиёни ботаҷриба барои таълими гӯштини юнону румӣ гузоштанд. Аз замоне, ки худро мешиносам, то инҷониб ҳамеша қадамам ҷониби толори варзишист, - мегӯяд Ҳусейн.

Рӯзу солу моҳҳо бо гузашташон аз Ҳусейни хурди нотавону оҷиз як ҷавони паҳлавонсурат месохтанд. Чун бародараш ба машқу тамрин машғул буд, ба ӯ пайравӣ карда паҳлу ба паҳлуи бародар тамрини гӯштин мекард ва оҳиста-оҳиста ин макону ин толорҳои варзишӣ барои Ҳусейн азизтарин ҷой гардид.

-Вақте ки хурдсол будам, ҳамеша дар паҳлуи бародарам будам. Ӯ ҳар ҷое мерафт, ҳар машқу тамрине, ки мекард, ман ҳам баробараш амалҳои ӯро такрор мекардам. Маҳз ана ҳамин завқам буд, ки тавонистам ба майдони бузурги гӯштин роҳ ёбам. Ба волидонам қавл дода будам, ки вақте бузург шудам, номбардоратон мешаваму ифтихоратон”.

МУВАФФАҚИЯТИ АВВАЛИН

Акнун вақти он расида буд, ки Ҳусейн ба қавли додааш вафо кунад. Ифтихори волидайн бошад. Барои омода шуданаш ба мусобиқаҳои дохиливу берунӣ шабу рӯз тамрин мекард. Ва мехост дар майдони рақобат сархаму ноком нагардад. Натиҷаи ҷаҳду талошаш бе натиҷа намонду дар мусобиқоти Осиё оид ба гӯштин миёни наврасон (U-17) дар равияи юнонӣ-римӣ, ки моҳи июни соли равон дар шаҳри Бишкеки Қирғизистон доир гашт, дар вазни 60кг иштирок намуда, соҳиби медали биринҷӣ гардид.

- Муваффақияти аввалин ҳеҷ гоҳ аз хотири инсон зудуда намегардад ва нахоҳад гашт. Ин медали аввалинам буд, ки дар мусобиқаи Осиё соҳиб гаштам. Бисёр як эҳсосоти хуб доштам, ки наметавон он эҳсосро бо сухан иброз кард. Вақте ғолиб мебароӣ, ҳамон афтодану хестанҳоят, ҳамон зарбаҳои хурдаат, ҳамон шебу фарозе, ки дар роҳи интихобнамудаат тай мекуниву имрӯз самарашро мебинӣ, худ ба худ мегиристаӣ. Ман низ ашк рехтам, албатта ашки хурсандӣ. Ин аввалин комёбии ман дар майдони бузурги гӯштин аст. Ин муваффақиятамро барои оилаи ғамхору дӯстдоштаниям мебахшам. Барои он ки ҳамеша ва дар ҳама ҳолат бо ман буданд, - бо хушнудӣ афзуд ӯ.

Ӯ мусобиқаро аз даври чорякфинал оғоз карда, аз намояндаи Эрон Абулфазл Миршакар мағлуб шуд. Бо сабаби он ки варзишгари эронӣ ба финал баромад, Ҳусейн имкон пайдо кард, мусобиқаро идома диҳад. Ӯ дар қувваозмоии тасаллобахш бар варзишгари Кореяи ҷанубӣ Ҳйук Сеомун ва дар қувваозмоӣ барои ҷои сеюм бар намояндаи Туркманистон Шатлик Юнусов пирӯз гардид. Ин аввалин медали биринҷии Ҳусейн дар мусобиқаи Осиё ба шумор меравад.

Ӯ ба варзишгарони ҷавон мегӯяд, ки ҳеҷ гоҳ руҳафтода нагарданд. Ҳар гоҳе ба замин хурданд, дубора хезанду талош кунанд. Вақте мебинанд, ки заҳматҳояшон самар оварду номашон ҳамчун варзишгари муваффақ дар расонаҳо давр мезанад, он вақт эҳсоси хушбахтияшон гул мекунад.

Эзоҳи худро нависед



Рамзҳо дар расм