Заминаҳои аввалини рушди соҳаи варзиш баъди ба даст омадани Истиқ-лолияти давлатӣ гузошта шуда бошад ҳам, аммо таъсису барқарорсозии муассисаҳои варзишӣ, ҷалби ҷавонону наврасон ба тарзи ҳаёти солим ва баргузории чорабиниҳои оммавии варзишӣ, пас аз расидан ба Ваҳдати миллӣ оғоз дардид.

Дар ин давра зери таваҷҷуҳи Пешвои миллат соҳаи варзиш бесобиқа густариш ёфта, тайи се даҳсола варзишгарони кишвар ба дастовардҳои бузурге ноил гардиданд, ки мислаш дар тамоми паҳнои таърих беназир аст.

Қобили зикр аст, ки солҳои аввали соҳибистиқлолӣ мушкили асосии варзишгарони кишвар пеш аз ҳама набудани толорҳои варзишӣ, ангуштшумор будани сафи мутахассисони соҳа ва иштироки ками онҳо дар мусобиқаҳои байналмилалӣ ба шумор мерафт. Хушбахтона бо ба даст овардани ваҳдату якдилии мардум зери сиёсати хирадмандонаву варзишпарварони Пешвои миллат муҳтарам Эмомалӣ Раҳмон дар кӯтоҳтарин фурсат ин мушкилиҳо ҳалли худ-ро пайдо намуданд.

Маҳз натиҷаи ҳамин муттаҳидии миллат аст, ки имрӯз дар сартосари мамлакат шумораи умумии толорҳои варзишӣ ба 10 218 адад расидаву бо шарофати варзишгарони қаҳрамони кишвар беш 1800 маротиба Суруди миллии Ҷумҳурии Тоҷикистон аз минбарҳои баланди варзишӣ сатҳи ҷаҳонӣ садо додааст.

Марҳилаи оғози рушди инфрасохтори соҳаи тарбияи ҷисмонӣ ва варзишро коршиносони соҳа ба давраи соли 2010 рабт медиҳанд. Зеро Пешвои муаззами миллат дар ҳамин сол зимни мулоқот бо варзишгарони кишвар дар ҳошияи суханронии хеш ба масъулин дастур доданд, ки ҷиҳати устуворгардонии базаи моддию техникӣ, оммавигардонии варзиш ва омода намудани варзишгарони касбии сатҳи байналмилалӣ мусоидат намоянд. Ҳамин тавр, давоми солҳои 2011 – 2020 дар кишвар 2908 адад иншооти асосии варзишӣ сохта шуда, зиёда аз 2000 адад иншооти дигар таъмиру таҷдид гардиданд.

Маврид ба зикр аст, ки дар ин давра барои рушду инкишоф ва оммавияти варзиш дар кишвар ниҳодҳое аз қабили Кумитаи кор бо ҷавонон ва варзиш, Кумитаи миллии олимпӣ ва федератсияҳои миллии варзишӣ нақши созгор ва арзандае дош-танд. Чи гунае ки Абдулло Маҳмадализода, сардори Раёсати тарбияи ҷисмонӣ ва инкишофи варзиши Кумитаи кор бо ҷавонон ва варзиш зимни суҳбат бо мо гуфт, нақши ин ниҳод ҳамчун мақомоти ваколатдори соҳа дар даврони соҳибистиқлолӣ ҷиҳати пешбурди фаъолияти варзишии варзишгарони мамлакат ва натиҷаҳои ба дастовардаи онҳо бесобиқа аст.

- Кумитаи кор бо ҷавонон ва варзиш ҳамчун мақомоти ваколатдори соҳа аз нахустин рӯзҳои соҳибистиқлолӣ бо таҳия ва ба роҳ мондани як қатор нақшаю стратегияҳо баҳри беҳтарсозии соҳаи тарбияи ҷисмонӣ ва варзиш дар мамлакат корҳои зиёдеро ба сомон расонидааст. Дави миллӣ, Ниммарафони байналмилалӣ, Ҷоми Президент оид ба теннис, Ҷоми Президент оид ба ҷудо, Ҷоми Президент оид ба шоҳмот, Ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои байналмилалӣ ва дигар иқдомҳои бузургу шоистае, ки бо ташаббуси Пешвои миллат давоми ин муддат қабул ва ба роҳ монда шудаанд, яке аз беҳтарин василаи дӯстиву иттифоқӣ ва таҳкиму таъмини оммавияти варзиш миёни ҷомеа мебошанд,- меафзояд А. Маҳмадализода.

Ҳамзамон дар ин баробар таъсиси Кумитаи миллии олимпӣ низ барои рушд ва иштирок дар сабқатҳои байналмилалии варзишгарон нақши бориз гузоштааст. Дар воқеъ, таъсиси ин ниҳод дар соли 1992 барои мардуми кишвар бисёр дастоварди бузург ва як ҳодисаи таърихӣ буд. Умаралӣ Сафаралӣ, сухангӯи Кумитаи миллии олимпӣ низ дар ин маврид чунин мегӯяд:

“Истиқлолият ва Ваҳдати миллӣ имкони муаррифии бештари Ҷумҳурии ҷавони Тоҷикистон ва миллати тоҷикро дар сатҳи ҷаҳон ба миён овард. Имрӯз тамоми мардуми Тоҷикистон аз пирӯзиву комёбиҳои варзишгарону паҳлавонони ҷасури кишвар ифтихор мекунанд.

Аз ҷумла, медали тиллои Дилшод Назаров дар 31-ум Бозиҳои Олимпиада дар Рио – Де – Жанейро соли 2016 дастоварди беназири соҳаи варзиши кишвар дар даврони соҳибистиқлолӣ аст. Дар ин радиф медалҳои олимпии Юсуф Абдусаломов, Расул Боқиев, Мавзуна Чориева барои миллати тоҷик ифтихорофар буданд.
Ҳамаи ин дастовардҳо натиҷаи ваҳдати комилу сулҳу салоҳ аст, ки бо заҳматҳои пайвастаи Пешвои миллат, Президенти Ҷумҳурии Тоҷикистон, Президенти Кумитаи миллии олимпии Тоҷикистон, муҳтарам Эмомалӣ Раҳмон таъмин гардидааст.

Дар кишвари мо роҳбарияти олии мамлакат ва ҳам мардум ба варзиш таваҷҷуҳ доранд ва ҳайати олимпии Тоҷикистон аз соли 1996 дар ҳамаи Бозиҳои олимпӣ иштирок кардааст. Ҳамчунин, нигоҳ накарда ба мушкилоти пас аз ҷанги дохилӣ, соли 2003 Душанбе мизбони 5-ум Бозиҳои Осиёи Марказӣ буд, ки дар сатҳи баланд доир шуд. Акнун, ки кишвари мо ба ваҳдати комил расидааст, сохт-мони иншооти гуногуни варзишӣ дар саросари ҷумҳурӣ идома дорад ва сафи варзишгарон ва дӯстдорони варзиш меафзояд, ки боиси қаноатмандист”.
Бо боварии комил метавон гуфт, ки зери сиёсати варзишпарваронаи Пешвои муаззами миллат ва пойдории Ваҳдати миллӣ минбаъд низ варзишгарони кишвар ба дастовардҳои сатҳи ҷаҳонӣ ноил гардида, исми кишварро дар арсаи байналмилалӣ боз ҳам бештар муаррифӣ мекунанд.

Қиёмиддин
МАҲМАДҶОНОВ,
“ҶТ”