ВАРЗИШ
Якшанбе 11 Апрел 2021 09:12
7442
Солҳои охир соҳаи варзиш дар Тоҷикистон хеле пеш рафта, мусобиқаҳои зиёди сатҳи ҷумҳуриявию байналмилалӣ дар кишвар доир гашта истодаанд. Дар ин баробар иштироки варзишгарони мо дар мусобиқаҳои байналхалқӣ то рафт зиёд мегардад. Дар мусобиқаҳои сатҳи байналмилаливу олимпӣ ҷойҳои намоёнро ишғол карда, бадин васила ватани азизамонро дар арсаи ҷаҳонӣ муаррифӣ кардани варзишгарони тоҷик нишонаи волои ин гуфтаҳост.

Аммо вазъияти ба ҳамагон маълум - пандемияи COVID-19, ки тамоми ҷаҳонро ба ташвиш овард, дар баробари дигар соҳаҳо ба баргузор нагардидани мусобиқаҳои варзишӣ низ сабаб шуд. Тақрибан то ду моҳи охир вазъияти чаҳон хеле бад буд ва тамоми толорҳои варзишӣ аз фаъ-олият бозмонда буданд. Варзишгарон низ наметавонистанд, ба таври бояд дар толорҳои варзишӣ тамрин кунанд. Аммо бо каме беҳ шудани вазъи ҷаҳон ва муътадил гаштани ҳолати пандемия оҳиста - оҳиста мусобиқаҳо аз рӯи баъзе намудҳои варзиш ҷараён гирифта истодаанд.

Суҳроби Акбаршо, сардори шуъбаи кор бо дастаҳои мунтахаби дастгоҳи марказии Кумитаи кор бо ҷавонон ва варзиши назди Ҳукумати кишвар мегӯяд, ки пас аз маҳдудиятҳо барои баргузор гардидани чорабиниҳои варзишӣ варзишгарони тоҷик дубора ба тамрин ҷалб шуданд.

- Дар муддати тақрибан се моҳе, ки варзишгарон аз тамрин дур монданд, онҳо ба ҳолати пандемия нигоҳ накарда, дар хона машқ мекарданд. Бо мақсади дар ҳолати хуби варзишӣ қарор доштанашон саъю кӯшиш менамуданд. Аз нимаи дуюми моҳи август сар карда, тибқи қарори Ситоди ҷумҳуриявӣ оид ба пурзӯр намудани чораҳои зиддиэпидемикӣ барои пешгирии паҳншавии COVID-19 расман баргузор гардидани чорабиниҳои варзишӣ ба доираи муайяни одамон иҷозат дода шуд ва Кумитаи кор бо ҷавонон ва варзиш ҳамчун мақомоти ваколатдори соҳаи тарбияи ҷисмонӣ ва варзиш ин дастурро рӯи кор гирифта, чорабиниҳои варзиширо оғоз намуд. Кумита тибқи тақвими ягонаи чорабиниҳои оммавии варзишӣ чорабиниҳоро баъд аз дуюним моҳи карантин доир намуд,- иброз намуд Суҳроби Акбаршо.

Ҳамзамон ӯ мегӯяд, айни ҳол чорабиниҳои варзишӣ бемамониат роҳандозӣ мешаванд ва дар ҳамкорӣ бо федератсияҳо чорабиниҳои сатҳи ҷумҳуриявӣ доир гашта истодаанд. Айни замон дар як ҳафта 4-5 маротиба мусобиқаҳои сатҳи ҷумҳуриявӣ доир гардида, пас аз карантин ин чиз варзишгаронро болидарӯҳ намуд.

- Ҳоло федератсияҳои байналмилалии варзишӣ, ки чорабиниҳои худро то соли 2021 ба таъхир гузоштаанд, тасмим гирифтаанд, ки дар охири соли 2020 якчанд чорабинии сатҳи байналмилалиро баргузор намоянд ва иштироки варзишгарони Ҷумҳурии Тоҷикистон низ дар назар дошта шудааст. Аз ин хотир, Кумитаи кор бо ҷавонон ва варзиш дар ҳамкорӣ бо федератсияҳо тибқи тақвими ягона чорабиниҳоро доир намуда истодааст. Дар ояндаи наздик нақшаи иловагӣ барои соли 2021 таҳия гардида, тибқи қарори тасдиқгардидаи ҳайати мушовараи Кумитаи кор бо ҷавонон ва варзиш мо шоҳиди он мегардем, ки вобаста ба вазъияти эпидемиологии кишвар чорабиниҳо чӣ гуна доир мегарданд,- қайд кард Суҳроби Акбаршо.

Варзишгарони тоҷик мегӯянд, дар даврони пандемия низ ба варзиш машғул мешуданд ва айни замон низ пайваста ба варзиш машғуланд. Саидҷалол Саидов, варзишгари шинохтаи тоҷик зимни суҳбат гуфт: “Ягон вақт аз тамрин даст накашидем, ҳатто дар замони карантин дар макони зистамон, дар ҷойҳои камодам ба варзиш машғул мешудем ва ҳоло бошад, дар толорҳо тамрин мекунем. Ҳамчунин ҳар пагоҳирӯзӣ бо шумораи 5-6 нафар ва бегоҳирӯзиҳо бо шумораи 10-12 нафар ба толори ҷудо, ки онро Пешвои муаззами миллат муҳтарам Эмомалӣ Раҳмон ба тозагӣ кушоданд, меравем”.

Ба гуфтаи ӯ, имсол 3 мусобиқа ба нақша гирифта шудааст, ки дар Япония, Венгрия ва Чемпионати Осиё дар Муғулистон бояд сурат гирад.

- Мусобиқа дар шаҳри Будапешти Венгрия дар рӯзҳои 23-25 октябр ба назар гирифта шудааст, аммо аниқ нест, ки чӣ мешавад. Чемпионати Осиё бошад, рӯзи 29 ноябр дар шаҳри Улан-батори Муғулистон баргузор мегардад, ки айни замон барои ҳамин чемпионат тайёрӣ дида истодаем,-илова намуд, ҳамсуҳбати мо.

Табиб Фирдавс Рауфов, барои варзишгарон тавсия медиҳад, ки дар даврони коронавирусӣ низ бояд ба обутоби бадан ҳамарӯза машғул шаванд.

“Ба шахсоне, ки варзишгар ҳастанд ва онҳое, ки умуман ба варзиш машғул намешаванд, тавсия медиҳам, ки ҳар пагоҳирӯзӣ муддати 20-30 дақиқа ба обу тоби бадан машғул шаванд. Дар ҳолати пандемияи коронавирус машғул шудан ба варзиш дучанд тавсия дода мешавад. Чун дар ин ҳолат масунияти одам баланд шуда, ҳар гуна вирусҳо ва бактерияҳоро аз худ эмин нигоҳ медорад”,-гуфт табиб.

Ӯ мегӯяд, бештари варзишгарон чунин мешуморанд, ки ҳангоми ба варзиш машғул шуданашон эҳтимолияти ба ин беморӣ гирифтор шудан вуҷуд дорад, вале ин нодуруст аст.

- Варзишгарон метавонанд, дар дилхоҳ майдончаҳои варзишӣ, ки дар саҳни ҳавлӣ, назди бинои худ, дохили хона ва боғу боғчаҳо ҳастанд, машқ кунанд. Ва инчунин саволе ба миён меояд, варзишгаре, ки ба бемории коронавирус гирифтор шудааст пас аз сиҳат шуданаш метавонад ба варзиш дубора машғул шавад? Албатта ин тавсияҳо низ аз ҷониби табибон дода мешаванд, яъне варзишгар метавонад, оҳиста-оҳиста ҳамон ҳолатҳои машқиеро, ки дар вақти солим буданаш анҷом медод, давом диҳад. Аммо ба онҳо яку якбора ба варзиш машғул шудан, тавсия дода намешавад,- илова намуд, Фирдавс Рауфов.

Аз ин ҳама бармеояд, ки имрӯзҳо варзиши тоҷик ба ҳолати муътадили худ бармегардад ва варзишгарон низ дар баробари оғоз шудани мусобиқоти байналмилалӣ дигарбора парчами кишварро дар арсаи ҷаҳон боло хоҳанд бардошт.

Бодом БАХТИЁРОВА, коромӯзи “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

Апрел 2021 c.