Мактаби бузурги ҷаҳонпаҳлавон Саидмумин Раҳимов даҳҳо номварони гӯштин, ҳамсони Носир Бозоров, Хайрулло Назриев, Муъминҷон Ғиёсовро парвардаву дар ихтиёри майдонҳои бузурги дохиливу байналмилалӣ гузоштааст.

Яке аз ин дастпарварони содиқу номовар, Муъминҷон Ғиёсов мебошад, ки дар гузашта ҳеҷ як гӯштинҳои миллии ҷашну маросимҳо бидуни ӯ намегузашт. Ғиёсов дар қатори саромадони дигари гӯштини миллии тоҷикӣ, ба мисли Мирзоавлиё Олимов, Искандаршо Раҳматуллоев, Замонашо Хайбаров ва дигарон барои рушду пешрафти гӯштини миллии тоҷикӣ хизматҳои сазовору арзандае анҷом додааст, ки то кунун гӯштини миллӣ ба номаш ифтихор дорад.

ТАВЛИДИ МЕРОСБАРИ ҲАҚИҚӢ

Дар таърихи 28-уми августи соли 1990 дар хонадони Муъминҷон Ғиёсов меросбари ҳақиқии оила таваллуд шуд, ки ӯро ном ниҳоданд Муҳаммад. Гузораи солу моҳ аз Муҳаммади кӯчаку нотавон як навраси тануманди паҳлавонсурат меофарид. Чун падари Муҳаммад худ аз олами варзиш буд, баробари бо пойи худ ҳаракат намудани фарзандаш ӯро ба толори варзишӣ бурд.

Дар аввал Муҳаммад пешаи падар, яъне аз гӯштини миллии тоҷикӣ корро оғоз кард. Ӯ тамринҳоро ниҳоят ҷиддӣ мегирифт ва пайваста мекӯшид, маҳораташро сайқал диҳад. Ҳамин талошу такопу буд, ки дар кӯтоҳтарин фурсат бачаҳои ҳамсолаш, ҳатто бачаҳои калони толору маҳалла ёрои бо ӯ дастбагиребон шуданро надоштанд.

МУВАФФАҚИЯТ ДАР ЧАНД НАВЪИ ВАРЗИШ

Пас аз чанд соле тамрин дар гӯштини миллӣ ва соҳиби чандин унвону ҷоизаҳо гардидан, Муҳаммад ба риштаи гӯштини ҷудо гузариш намуд. Дар самти гӯштини ҷудо мисле ки бахт ба рӯяш нахандид. Ба ҳамин хотир соли 2008 ба гӯштини тарзи озод гузашт ва худи ҳамон мавсим зинаи дуюмро дар Чемпионати Тоҷикистон оид ба ин навъи варзиш соҳиб гардид. Сар аз соли 2010 бошад, пайваст ба самбои муҳорибавӣ.

Моҳи апрели соли 2010 мураббигии Маҳаммадро устоди кордони муҳорибаҳои омехта Аҳтам Хокиров, ки он замон дар толори варзишии “Тоҷ-варз” зимоми мураббигӣ дошт, ба дӯш гирифт. Ба мисле, ки қаҳрамони мо тоза варзиши дӯстдоштаи хешро пайдо намуд. Чун худи ҳамон мавсим, аниқтараш моҳи феврал дар шаҳри Женеваи Швейтсария дар чемпионати ҷаҳон аз варзиши самбои муҳорибавӣ мақоми дуввумро ишғол намуда, медали нуқраро ба гардан овехт. Чоруми апрели соли 2010 бошад, Муҳаммад ҳамроҳ бо мураббии хеш Аҳтам Хокиров ба штати Ню-Ҷерсии ИМА сафар намуданд, ки дар ин сафар ӯ яку якбора аз ду навъи варзиш, яъне гӯштини самбо ва самбои муҳорибавӣ баромад намуда, ба гирифтани мақоми дуввуми ҳар ду ин навъи варзиш сазовор гардид. Инчунин, худи ҳамон мавсим зинаи дуввумро дар мусобиқаи самбои муҳорибавӣ дар шаҳри Санкт-Петербурги Федератсияи Русия ишғол намуд.

Дигар ба гунае, ки роҳи Муҳаммад ба майдонҳои бурунмарзӣ кушода гардид. Пас аз сафари моҳи апрели соли 2010 варзишгар дигар тамринҳояшро дар Амрико давом дод. Гарчанде қаҳрамони мо дар Амрико тамрин менамуд, аммо баромадҳояш мунтазам зери парчами Тоҷикистон сурат мегирифт.

Соли 2012 Муҳаммад дар чемпионати ҷаҳон аз самбои муҳорибавӣ Тоҷикистонро бо вазни 91 кг дигарбора муаррифӣ намуда, муваффақ ба гирифтани медали тиллои мусобиқа гардид. Тамринҳои ӯ дар Амрико дар толори бонуфузи муҳорибаҳои омехтаи “Ке-до-ҷо” зери мураббигии Мурат Кештов сипарӣ мегардиданд.
Шуруъ аз соли 2013 Муҳаммад дар олами гӯштини грепплинг чи ҳангомаҳое ба по накард, заро мавсуф моҳи нояб-ри соли 2013 дар штати Ню-Ҷерси аз навъи “NAGA грепплинг” баромад намуда, созовори мақоми аввал гардид ва ин натиҷаро давоми 3 соли баъдӣ, яъне солҳои 2014, 2015 ва 2016 пайи ҳам такрор намуда, дар корномаи хеш рекорд гузошт.

Баҳори соли 2017 бошад, дар мусобиқаи ЮФС оид ба грепплинг дар Лас-Вегаси ИМА Муҳаммад боз ҳам мақоми дуввумро ба номаш сикка зад. Соли 2018 қаҳрамони мо муваффақ шуд, то дар мусобиқаи “NAGA грепплинг” дар Лас-Вегаси ИМА нишони зарринро ба гардан овезад.

Натиҷаи шоёни дигари ин варзишгари муваффақ соҳиби ҷойи аввал гардиданаш дар сабқатҳои муҳорибаҳои омехтаи панкратион мебошад, ки соли 2022 дар қалби кишвар, шаҳри Душанбе ба даст оварда буд.

Ёдовар бояд шуд, ки сар аз соли 2016 Муҳаммад Муминҷонзода Тоҷикистонро аз навъи варзиши ҷуи-читсу низ намояндагӣ мекунад, ки намоёнтарин дас-товардаш аз ин навъи варзиш дар вазни 77 кг сазовори медали нуқра гардиданаш дар таърихи 10-уми феврали соли равон дар шаҳри Абу-дабии АМА мебошад.
Дар ҳоли ҳозир Муҳаммад дар шаҳри Канкуни Мексика барои чемпионати ҷаҳонии ҷуи-читсу “Канкун Мексика-2023”, ки 16-уми июл баргузор мегардад, омодагӣ дида истодааст ва бар он бовар аст, ки аз ин мусобиқа ҳам бо дас-ти тиҳӣ ба ватан барнамегардад.

ОХИРСУХАН

Муҳаммад Муминҷонзода пас аз мусобиқаи “Канкун Мексика-2023” ният дорад, 23-юми июл дар чемпионати ҷумҳуриявии ҷуи-ҷитсу, ки дар шаҳри Душанбе баргузор мегардад, иштирок намояду натиҷаи назаррас нишон диҳад.

Яҳё МАҲМАДНАБИЕВ, “ҶТ”