Хуршед Маҷидов. Варзишгаре, ки дар чанд навъи гӯштин муваффақ буда, дорандаи чандин ҷоизаҳо аз навъҳои гуногун миёни сангинвазнҳо мебошад. Ӯ бо дурахши пурҷилои худ дар самти варзиши кишвар натиҷаҳои назаррасро нишон додааст. Ҳадаф аз ёдоварии корномаҳои варзишии ин паҳлавони тоҷик дар он аст, ки номбурда дар Қаҳрамонии ҷаҳони кураш, ки аз 23-юм то 28-уми ноябр дар шаҳри Ашқободи Турк-манистон баргузор гардид, иштирок карда, ба гирифтани нишони биринҷӣ даст ёфт.

Хуршед дар ин сабқатҳо дар вазни +100 кг баромад намуда, дар даври аввал намояндаи қирғиз – Бекполот Тогтогоновро шикаст дод. Дар даври дигар ӯ бар намояндаи Доминикан ғолиб омада, роҳи худро ба марҳилаи ниманиҳоӣ ҳамвор сохт. Дар даври ниманиҳоӣ дар як рақобати сахту сангин аз ҳарифи эрониаш Абдулфаз Торобӣ шикаст хӯрда, ба гирифтани нишони биринҷии чемпионат даст ёфт.

АЗ ДИЛГАРМӢ ТО РОҲЁБИИ ХУРШЕД БА ВАРЗИШ

Хуршед Маҷидов соли 1998 дар ноҳияи Фирдавсии шаҳри Душанбе дар оилаи хизматчии давлатӣ таваллуд шудааст. Ӯ аз овони хурдӣ ва наврасӣ аниқтараш аз синни 6-солагӣ ба варзиш майл пайдо кард. Барои дилгармии ӯ ба ҷодаи варзиш нақши падар бориз буд. Зеро амакҳои Хуршед варзишгар буданд ва падар бо дидани онҳо ба варзиш шавқманд гашт. Бинобар ин, хост писарашро ба толори варзишӣ барад, то ӯ низ ба тамрин пардозад.

Худи Хуршед низ ин гуфтаҳоро тасдиқ менамоядва дар яке аз суҳбатҳояш қайд мекунад, ки ба толори варзишӣ рафтани ӯ ҳанӯз пеш аз мактабхониаш ба вуқуъ пайваста буд. Яъне ӯ аз наврасӣ дар толорҳои варзишӣ бузург гаштааст. Дастовардҳои муҳимтарини ӯ шуруъ аз соли 2013 оғоз гашт. Ӯ аввал дар вазни +90 кг миёни навҷавонон баромад мекард. Дар ин сол ба гирифтани мақоми қаҳрамонӣ миёни гӯштингирони сангинвазн аз намуди гӯштини ҷудо сазовор гашт.

Ҳамчунин дар соли 2013 дар Чемпионати Осиё миёни навҷавонон ба гирифтани ҷойи дуюм ва нишони нуқра мушарраф шуд. Ӯ ҳамчунин мақомҳои ифтихориро, ба монанди дар солҳои 2014, 2015, 2016 ва 2020 чемпиони Тоҷикистон оид ба гӯштини ҷудо, дар Чемпионати Осиё соли 2015 ҷойи якум, 2016 ва соли 2017 ҷойи сеюм, соли 2015 дар Чемпионати ҷаҳон оид ба гӯштини самбо ҷойи сеюм, қаҳрамони Осиё дар соли 2014, дорандаи нишони биринҷии Чемпионати ҷаҳон дар соли 2014 ва соли 2015 нишони нуқраро аз гӯштини кураш ба даст овардааст.

Яке аз солҳои бобарору муваффақ дар корномаи варзишии ин паҳлавони хушноми тоҷик ин соли 2015 ба ҳисоб меравад. Дар ин сол Хуршед дар чандин сабқатҳои гуногуни дохиливу хориҷӣ иштирок карда, ба гирифтани чандин ҷоизаҳо даст ёфтааст.

Моҳи майи соли 2015 дар Ҷоми Аврупо, ки дар давлати Руминия баргузор гардид, Хуршед сафарбар гашт. Ӯ дар вазни ҷамъи 90 кг қувваозмоӣ кард. Паҳлавони мо дар даври аввал озод буд. Дар даври дуюм бо намояндаи кишвари Венгрия қувваозмоӣ карда, ба ӯ ғолиб омад. Дар марҳилаи сеюм низ ҳарифи худро шикаст дода, ба қисмати ниҳоӣ роҳ ёфт. Дар қисмати финалӣ низ рақиб аз дасти Хуршед шикаст хурд ва ӯ ба гирифтани нишони тилло мушарраф гашт.

Моҳи июни ҳамин сол дар Чемпионати Осиё миёни навҷавонон дар Узбекистон ширкат кард. Дар ин рақобатҳо низ ба ҳарифони худ ғолиб омада, то ба даври ниҳоӣ расид. Дар финал ӯ бо намояндаи кишвари мизбони мусобиқа - Шоҳрух Тураев вориди рақобат гашт. Дар ин давр низ Хуршед бо гирифтани имтиёзи зарурӣ ғолиби мусобиқа дониста шуд ва ба гирифтани нишони тиллои навбатӣ даст ёфт.

Ҳамин тариқ, Хуршед дар соли 2015 дар Чемпионати ҷаҳонӣ оид ба гӯштини ҷудо миёни навҷавонон дар Босния иштирок кард. Ин қаҳрамонии ҷаҳон хеле пуршиддат ва тезу тунд ҷараён гирифт. Ба ин хотир, Хуршед бо тайёрии ҳаматарафа ба мусобиқот сафарбар гардид. Ӯ дар даври аввал варзишгари Монголияро шикаст дода, ба даври дуюм роҳ ёфт. Рақиби белорусии ӯ рақиби даври дуюм ба ҳисоб мерафт, ки Хуршед бо нигоҳ доштани ҳариф дар рӯи замин имтиёзи заруриро гирифта, ӯро шикаст дод. Дар рақобат баҳри ба даст овардани нишони биринҷӣ бошад, пирӯзӣ ба даст овард ва ҳамин тавр дар синни 17-солагӣ ҷоизадори мусобиқаи ҷудои ҷаҳонӣ гардид.

ҶОМИ ПРЕЗИДЕНТ
Мусобиқаи Ҷоми Президенти Ҷумҳурии Тоҷикистон оид ба ҷудо сабқати дигаре буд, ки мухлисону ҳаводорони зиёдеро ба шаҳри Ваҳдат овард. Мусобиқаи мазкур 5-уми октябри соли 2016 дар шаҳри Ваҳдат баргузор гардид. Хуршед дар он нав ба синни 18 қадам гузошта буд ва акнун бояд миёни бузургсолон рақобат мекард. Иваз кардани категория дар чунин як сабқати муҳим ва зарурӣ, ҳамчунин таҷрибаи иштирок надоштан дар ҳунарнамоӣ миёни бузургсолон мушкилоте буд, ки он замон ба Хуршед фишор меовард. Аммо ба ҳамаи ин нигоҳ накарда, ӯ дар мусобиқа иштирок карда, аз худ маҳорати баланди варзишӣ нишон дод. Ҳарифи аввалинаш варзишгар аз ҳамсоякишвари мо - Афғонистон ба ҳисоб мерафт, ки ӯ таҷрибаи иштирок дар Бозиҳои олимпиро низ дошт.

Бо ин ҳама Хуршед тавонист, ин ҳарифи қавии худро шикаст диҳад. Рақиби дуюми ӯ аз Тоҷикистон буд. Хуршед ба ин ҳарифи худ низ ғолиб омад. Дар даври сеюм рақиби ӯ яке аз варзишгарони таҷрибадори эронӣ ба ҳисоб мерафт, ки дар муқобили Хуршед истодагарӣ карда натавонист. Хуршед бо шикаст додани ҳарифи узбеки худ дар тӯли дақиқаҳои аввали нерусанҷӣ ба марҳилаи ниманиҳоӣ роҳ ёфт. Дар ин давр ӯ бо намояндаи Куба вориди майдони рақобат гашт. Ӯ тӯли 10 дақиқа бо ҳарифаш қувваозмоӣ кард. Пасон бо як огоҳии довар Хуршед рақобатро бохт ва барои нишони биринҷӣ талош намуд. Барои ба даст овардани нишони биринҷӣ бо намояндаи дигари Узбекистон вориди майдони рақобат гашт. Аз сабаби таҷрибаи камтар доштан нисбати ҳариф Хуршед дар ин рақобат шикаст хурд ва мақоми панҷумро касб кард.

ЛАТБАРДОРӢ ВА ДУРШАВӢ АЗ ВАРЗИШ

Соли 2017 зимни яке аз машқҳои дастаҷамъӣ дар Федератсияи Русия Хуршед лат бардошт. Ин боис гашт, то ӯ муддати тӯлонӣ аз варзиш дур гардад. Тӯли се сол аз майдонҳои рақобат дур гашт. Бо ин сабаб вазни худро аз даст дод. Ҳамчунин дур шудани ӯ аз майдонҳои рақобат боис гашт, ки холҳои заруриро баҳри иштирок дар Бозиҳои олимпӣ - 2020 ҷамъ карда натавонад ва аз иштирок дар ин чорабинии ҷаҳонӣ бенасиб монд.

Хуршед соли 2020 дигарбора ба тамринҳо баргашт. Бо бозгашт ба толор ӯ тамринҳои зиёд намуд ва барои барқарор намудани сатҳи варзишии худ талош намуд. Дар баробари дигар навъҳои гӯштин ҳамчунин соли 2020 аз навъи гӯштини камарбандӣ низ вориди рақобат гашт. Ӯ дар ин сол ба гирифтани унвони қаҳрамони Тоҷикистон дар риштаи гӯштини камарбандӣ даст ёфт.

Соли 2021 Хуршед бештар ба гӯштини миллӣ рӯ овард. Ӯ дар сабқатҳои гуногуни варзишӣ ва мусобиқоти наврӯзӣ иштирок кард. Танҳо соли мазкур дар мусобиқоти наврӯзӣ ба гирифтани 4 шоҳҷоиҳза даст ёфт.

Хулоса, ӯ талош бар он дорад, ки сафи ҷоизаҳои худро боз ҳам бештар намояду парчами Тоҷикистонро дар мусобиқаҳои ҷаҳонӣ боз ҳам баланд бардорад.

Ҳошим РАҲМАТУЛЛОЕВ, “ҶТ”