Сухане чанд аз ҳунарҳои Анора Қурбонова

Зиндагӣ худ созанда асту ҳар нафаре, ки чашм ба ин олами ҳастӣ мекушояд, бо ҳадафу мақсадҳои худ рӯи ҷодаҳояш устуворона қадам мегузорад. Дар ҷомеаи имрӯза мо нафаронеро вомехӯрем, ки бо шавқу талош тавонистаанд, истеъдодҳои зиёдеро дар худ сайқал дода, дар байни мардум шинохта ва парчамбардори кишвари худ гарданд.

Яке аз ин гуна нафарони муваффақ Анора Қурбонова аст. Ӯ варзишгари хуби риштаи таэквондо (ИТФ) ва акробатика, узви дастаи таэквондои кишвар, устоди варзиши Тоҷикистон, барандаи чандин мусобиқаҳои ҷумҳуриявию ҷаҳонӣ, ҳамзамон дорои истеъдодҳои хуби расмкашӣ, рақс ва ровигӣ, донандаи чор забони хориҷӣ мебошад.

Анора 18 сол дошта, зодаи шаҳри Душанбе аст. Ӯ аз зумраи бонувоне ба шумор меравад, ки тавонистааст, дар ин синни ҷавонии худ ба муваффақиятҳои чашмрас ноил гардида, номи ватан ва парчами парфишони онро дар арсаи байналмилалӣ баланд бардорад. Анора аз хурдсолӣ ба варзиш рӯ оварда, бо дуову дастгирии волидон дар муддати кӯтоҳ дар ин самт дастболо мегардад.

Қаҳрамони мо мегӯяд, ки вақте чор сола буд, филмҳои зиёдеро, ки дар онҳо усулҳои варзиш инкъикос ёфтаанд, тамошо менамуд ва мехост ба монанди персонажҳои филм ин амалҳоро иҷро намояд.

“Рӯз то рӯз шавқи ман меафзуду дар дилам меҳри варзиш ҷо мегирифт. Ҳамин шавқу ҳавас сабаб гардиду волидайнам маро аз панҷсолагиам ба толори варзишии Федератсияи таэквондо ва кикбоксинг раҳнамун карданд ва ман дар он ҷо тамрини варзишии худро зери роҳбарии мураббии варзиш Реана Галимова оғоз намудам. То имрӯз бо устодони зиёд, аз ҷумла Мирсаид Яҳёев, Алӣ Акбаров, Далер Тураев ва Фурқат Ӯрунов машқ намуда, дар зиёда аз 30 мусобиқаи ҷумҳуриявию байналмилалӣ иштирок намудаам”, - гуфт ӯ.

Анора пас аз се соли тамрини варзишӣ дар як мусобиқаи шаҳрӣ иштирок намуда, мағлуб мешавад ва пас аз он дилмонда гардида, муддате варзишро тарк менамояд, аммо як сухани падар “Мағлубият ҳоло анҷоми кор нест, балки яке аз қадамҳои ғолибият аст.”, сабаб гардид, то ӯ дубора бо ҳадафу мақсадҳои нек фаъолияти худро давом диҳад.

“Соли 2016 дар яке аз мусобиқаҳои калонтарини таэквондо ИТФ, ки дар шаҳри Мински Белорусия миёни 30 давлати ҷаҳон баргузор гардид, иштирок намуда, дар якумин чемпионати худ дар сатҳи байналмилалӣ тавонистам, ҷои дуюмро ишғол намоям. Ва пас аз ин ғолибият маро ба дастаи мунтахаби Федератсияи таэквандо қабул намуданд ва аз ҳамон вақт дастовардҳои ман оғоз гардид”, - мегӯяд Анора.

Ӯ дар дастаи яккачин фаъолияти худро аз рӯи чор намуди таэквондо идома дода, дар сатҳи ҷумҳуриявӣ 5 маротиба қаҳрамони Тоҷикистон, 4 маротиба қаҳрамони шаҳрӣ, дар сатҳи байналмилалӣ 2 маротиба чемпиони ҷаҳон, 2 маротиба чемпиони Осиё ва 2 маротиба унвони қаҳрамони Осиёи Миёнаро ба даст меорад.

Соли 2017 дар Кореяи Шимолӣ аз тарафи Президенти байналмилалии таэквандо Ким Сун Ҷон ба беҳтарин варзишгарон камарбанди сиёҳ тақдим мегардад, ки Анора низ дар байни онҳо ҳамчун варзишгари беҳтарин соҳиби камарбанд мегардад.

Инчунин аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба ӯ унвони устоди варзишро пешниҳод менамоянд ва аз соли 2018 Анора “Устоди варзиши Тоҷикистон” мебошад.

Ӯ ҳамзамон ба акробатика машғул гардида, ҳамагӣ дар муддати 3 моҳ тавонистааст, нозукиҳои ин намуди варзишро ҳам омӯзад.

“Акробатика зинаи нахустини ҳамаи варзишҳо мебошад ва нозукиҳои акробатика имкон медиҳад, ба осонӣ аз ӯҳдаи машқҳои варзиши интихобнамуда бароед. Таэквондо низ чанд риштаро дар бар мегирад ва баъзе аз онҳо мушкил аст. Ман хостам ба акробатика ҳам машғул гардам ва тамрини варзишиамро дучанд гардонида, ба муваффақиятҳои боз ҳам зиёдтар ноил гардам”, - мегӯяд Анора.

Ӯ ғайр аз варзиш ба китобхонӣ, шеърхонӣ, расмкашӣ ва рақс шавқ дораду ба онҳо низ дар вақтҳои холӣ машғул мешавад.

Номбурда ҳамакнун донишҷӯи бахши аввали яке аз донишгоҳҳои кишвари Кипр буда, таҳсили худро тариқи онлайнӣ аз рӯи ихтисоси соҳибкорӣ давом дода истодааст. Орзу дорад, дар баробари таҳсил варзишро низ идома дода, дар мусобиқаҳои байналмилалӣ парчами кишварамонро баланд бардорад.
Мо барояш пирӯзиву муваффақиятҳои бештарро хоҳонем.

Исфандиёр АМАКҶОНОВ,
“ҶТ”