Давоми нимсолаи якуми соли 2022 дар шаҳру ноҳияҳои ҷумҳурӣ 44 иншооти варзишӣ, аз ҷумла 28 майдончаи варзишӣ, 13 толори варзишӣ ва 3 маҷмааи варзишӣ бо харҷи зиёда аз 86 миллиону 56 ҳазору 884 сомонӣ сохта ба истифода дода шудааст, ки аз ин 9 миллиону 438 ҳазору 884 сомонӣ аз ҳисоби маблағҳои буҷавӣ ва 76 миллиону 618 ҳазор сомонӣ аз ҳисоби сарпарастон мебошад.

Дар ин бора 7 июл дар Ҷаласаи ҳайати мушовараи Кумитаи кор бо ҷавонон ва варзиши назди Ҳукумати кишвар оид ба ҷамъбасти фаъолияти соҳаи кор бо ҷавонон ва варзиш дар нимсолаи якуми соли 2022 иттилоъ дода шуд.

Дар робита ба дастовардҳои варзишгарон дар нимсолаи аввали соли ҷорӣ гуфта шуд, ки дар натиҷаи дастгириҳои бевоситаи Ҳукумати Ҷумҳурии Тоҷикистон, Кумита дар якҷоягӣ бо Кумитаи миллии олимпии Тоҷикистон, федератсияҳои варзишӣ ва сарпарастон варзишгарони мамлакат аз чемпионати ҷаҳон 1 медали тилло, 5 медали нуқра, 12 медали биринҷӣ, аз чемпионатҳои Осиё 13 медали тилло, 26 медали нуқра, 31 медали биринҷӣ, аз Ҷоми ҷаҳон 10 медали тилло, 8 медали нуқра, 10 медали биринҷӣ, аз Гранд-Слам 2 медали биринҷӣ ва аз дигар мусобиқаҳои байналмилалӣ 39 медали тилло, 37 медали нуқра ва 62 медали биринҷӣ ба хазинаи варзишии мамлакат ворид намуданд. Дар давраи ҳисоботӣ 295 нафар ба мусобиқаҳои сатҳи байналмилалӣ ва ҷамъомадҳои таълимию варзишӣ берун аз кишвар сафарбар гардида, 46 нафари онҳо пурра аз ҳисоби Кумита дар ҳаҷми 609 851 сомонӣ маблағгузорӣ гардиданд.

Таъкид гардид, ки дар нимсолаи аввал 269 маротиба Парчами давлатии Ҷумҳурии Тоҷикистон дар мусобиқаҳои сатҳи байналмилалии варзишӣ баланд бардошта шуда, 64 маротиба Суруди миллӣ дар мусобиқаҳои ҷаҳонӣ садо додааст.

“ҶТ”