ВАРЗИШ
Ҷумъа 14 Август 2020 06:07
7106
Бинобар паҳн гаштани пандемияи коронавирус дар ҳама давлатҳои ҷаҳон вазъи фавқуллода эълон гардид ва мамлакатҳои ҷаҳон сарҳадҳои хешро бастанд. Мавриди зикр аст, ки вобаста ба ҳолати мазкур Бозиҳои олимпӣ ва ҳама навъи мусобиқаҳои варзиширо манъ намуданд. Чунки гузаронидани бозиҳои варзишӣ имкони бештари сироят ва паҳни бемории коронавирус мегардид. Бояд гуфт, ки варзишгарони мо низ бинобар ҳолати мазкур иштирокашон дар бозиҳои варзишӣ ба таъхир афтод. Дар шумораи навбатӣ хостем аз варзишгарони кишвар пурсем, ки давраи пандемияи коронавирусро чӣ гуна паси сар менамоянд ва дар ин давра машғули чӣ корҳоянд.

Беҳрӯз Хоҷазода, самбочӣ, дорандаи унвони чемпиони ҷаҳон оид ба самбо:

- Шукри Худованд ману наздиконам мубталои каронавирус нашудаем. Вале ҳанӯз аз моҳи ноябри соли 2019 зимни иштирок дар мусобиқа ман ҷароҳати қабурға гирифтам ва то ҳол тамрин намекунам. Ба истиснои мусобиқаҳое, ки бо ҷароҳати доштаам, ба майдон баромада будам.

Инчунин, барои дастгирии табибон дар давраи пандемия як маротиба тамринҳои руҳбаландкунандаи табибонро гузаронидам, ки миннатдориамро ба онҳо баён кардам. Ҳоло бе тамрин ба муолиҷаи ҷароҳати бардоштаам машғулам. Ман дар давраи пандемия ба деҳа рафтам. Чун деҳа бо фарқ аз шаҳр боду ҳавои тоза ва муҳити ором дорад.

Мутаассифона, бо сабаби таъсири бемории коронавирус барои муолиҷа ба хориҷи кишвар рафта натавонистам. Умедворам вазъ беҳтар мешавад ва ман муолиҷаи хешро берун аз кишвар давом медиҳам ва дубора ба майдони варзиш бармегардам.

Мавзуна Чориева, муштзан, дорандаи медали биринҷии Бозиҳои тобистонаи олимпии Лондон (2012):

- Дар давраи пандемия, ман дар хона нишастам. Новобаста ба ҳолати мазкур дар ҳаёти ман воқеаи бисёр ҳам муҳим ва фаромушнашаванда ба амал омад. Ман 3 майи соли равон соҳиби писарча гаштам, ки дунёи маро дубора рангин намуд.

Ба ҳамаи ин нигоҳ накарда ман шогирдонамро дар хона чӣ тавр тамрин карданашонро мефаҳмонам, ба онҳо нозукиҳои муштзаниро меомӯзонам.

Саидҷалол Саидов, ҷудочӣ, устоди дараҷаи байналмилалӣ, узви мунтахаби ҷудои ҶТ:

- Дар замони пандемия тамринҳои худро дар хона анҷом дода, саломатиамро эҳтиёт мекардам.

Як қатор мусобиқаҳое буданд, ки бояд ширкат мекардем, вале бо пайдо шудани бемории коронавирус онҳо ба таъхир афтиданд. Вақте дар Олмон будем, бояд 1-уми март ба шаҳри Марокка сафар мекардем, барои бозиҳои олимпӣ хол медоданд. Вале аз федератсияи ҷаҳонӣ мактуб омад, ки мусобиқаҳоро барҳам мезананд ва ҳама ба хонаҳои худ раванд. Мо вобаста ба вазъи баамаломада ғамгин шудем, ки шояд дар иштироки олимпиада дигар имкон пайдо накунем. Аммо федератсияи байналмилалии ҷаҳонӣ қонуни худро дорад, ки ҳар нафаре, ки имсол роҳхат доштанд, соли оянда дубора сафар мекунанд. Аз моҳи март то майи соли 2021 дар Марокка мусобиқа оғоз мешавад ва мо умедворем, ки то он вақт вазъ беҳ мешавад ва мо дар он ширкат ва номи Тоҷикистонро баланд мебардорем.

Ин вазъ то ҷое барои мо хуб буд, ки мо барои ширкат дар мусобиқаҳои сатҳи байналмилалӣ боз ҳам хубтар тайёрӣ мебинем.

Шаҳриёр Даминов, қаиқрон, дорандаи медали нуқраи чемпионати Осиё:

- Дар замони пандемия ҳеҷ ҷой нарафтам, дар хона нишаста, саломатии худ ва наздиконамро ҳифз намудам. Коронавирус на танҳо нақшаҳои ман, балки нақшаҳои тамоми ҷаҳонро тағйир дод. Мо тайёрии хуб барои иштирок дар чемпионати Осиё дида будем, вале бо паҳн гаштани пандемияи коронавирус сафарҳои мо ба муҳлати номаълум мавқуф гузошта шуд.

Айни ҳол дар хона тамрин дорам ва умедворам, ки вазъи баамаломада беҳ шавад ва мо боз дар мусобиқаҳо ширкат варзем ва парчами Тоҷикистонро баланд бардорем.

Хушқадам Хусравов, қаҳрамони ҷаҳон дар риштаи самбо:

- Дар давраи пандемияи коронавирус ман як моҳи аввалро дар хона дар шаҳри Душанбе дар самоизолятсия сипарӣ намудам. Баъди ин ба Ванҷ омадам ва ин ҷо дар иҳотаи кӯҳистон машғули тамринам. Агар варзишгар тамрин накунад, шакли бадани худро гум хоҳад кард. Барои нигоҳ доштани баданам дар ҳавои кушод дар як рӯз ду маротиба тамрин мекунам.

Пандемияи коронавирус ба нақшаҳои ман, ки 17 апрели соли равон бояд барои ширкат дар як мусобиқа ба Федератсияи Русия сафар мекардам, монеъ шуд. Новобаста ба ҳолати мазкур ман тамрин дорам, омодагӣ дида истодаам то дар мусобиқаҳои сатҳи байналмилалӣ парчамбардори миллати хеш бошам.

Таҳияи Садбарг СУЯРОВА “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

Август 2020 c.