Тавре иттилоъ доред, бо дарназардошти саҳми ҷавонон дар рушди ҷомеа ва иштироки фаъолонаи онҳо дар ҳаёти сиёсиву иқтисодии мамлакат аз ҷониби Пешвои муаззами миллат, муҳтарам Эмомалӣ Раҳмон соли 2017 дар Ҷумҳурии Тоҷикистон “Соли ҷавонон” эълон гардида буд. Акнун аз ин соли таърихӣ рӯзҳои башумор боқӣ мондааст. Аз ин рӯ, тавассути як савол аз ситораҳои варзиши соли 2017 таассуроташонро дар робита ба ин соли таърихӣ пурсон гаштем:

Беҳрӯз ХОҶАЗОДА:

- “Соли ҷавонон” дар ҳаёти натанҳо ман, балки дар ҳаёти оилаи ман, мардуми варзишдӯсти тоҷик ва мухлисони самбои кишвар фаромӯшнашуданист. Зеро баъди 42 сол ба ман муяссар гардид, ки дастоварди ҷаҳонпаҳлавони зиндаёди тоҷик Саидмуъмин Раҳимовро такрор намояму медали тиллои самбои чаҳонро ба Ватани азизам биёрам. Ба Пешвои миллат, муҳтарам Эмомалӣ Раҳмон сипосамро мерасонам, ки соли 2017-ро пурра ба ҷавонон бахшиданд. Маҳз чорабиниҳои даҳчанд зиёди варзишии “Соли ҷавонон” буд, ки мо таи як сол ҳатто як рӯз ҳам аз варзиш фориғ намондем. Бахшида ба “Соли ҷавонон” дар сартосари ҷумҳурӣ мусобиқаҳои варзишӣ, ба монанди Фестивали бозиҳои миллии варзишӣ, ки дар даври сеюми он дар Варзишгоҳи марказии шаҳри Душанбе аз намуди гӯштини миллӣ мақоми аввалро ишғол намудам, “Ҷоми Пойтахт-2017”; “Наврӯз-2017”; Инчунин дар ин сол медали тиллои Чемпионати Осиё аз намуди самбо, медали тиллои V-умин Бозиҳои осиёӣ дар шаҳри Ашқободро ба гардан овехтам, ки ин дастовардҳои баланди варзишӣ маҳз дар “Соли ҷавонон” насибам гаштанд. Аввалин бор дар чемпионати ҷаҳон аз намуди гӯштини ҷудо баромад намудам. Баъди қаҳрамони ҷаҳон гардидан дар тамоми чорабиниҳое, ки бахшида ба “Соли ҷавонон” барпо гардид, ба ҳайси қаҳрамон ва меҳмони ифтихорӣ иштирок намудам. Дар баробари дастгириҳои Ҳукумати кишвар, инчунин, соҳибкорони ватанӣ бисёр дастгириҳо карданд. Кумитаи миллии олимпӣ ва Кумитаи кор бо ҷавонон ва варзиш ба ман бовар намуда, бандаро ба рӯйхати варзишгароне, ки то Олимпиадаи Токио-2020 аз ҷониби ин ниҳодҳо стпендия мегиранд, шомил намуданд. Шуруъ аз соли 2018 ман омодагиҳоямро ба мусобиқаҳои байналмилалӣ аз намуди гӯштини ҷудо оғоз мекунам. Мақсад шарафу обрӯи кишвари азизамро боз ҳам болотар бурдан аст. Дар охир ба ҳамаи мухлисону варзишгарони тоҷик гуфтаниям, ки ҳамин эстафетаи соли 2017-ро аз даст надода, Тоҷикистонро доим дар зинаи якум нигоҳ доранд.

Бахтовар ҲАСАНОВ:

- “Соли ҷавонон” барои ман бо комёбиҳо оғоз гардид. Аввалин маротиба миёни калонсолон дар вазни 75 кило аз гӯштини юнонӣ-румӣ қаҳрамони Тоҷикистон шудам. Ин дастовард ба ман имкон дод, ки давоми соли 2017 дар мусобиқаҳои берун аз кишвар Тоҷикистонро муаррифӣ намоям. Бахшида ба “Соли ҷавонон” дар сатҳи ҷумҳурӣ мусобиқаҳои зиёд назар ба солҳои қаблӣ баргузор гардид, ки заминаи хуби омода шуданамон барои мусобиқаҳои сатҳи байналмилалӣ буд. Инчунин, дар чемпионати шаҳри Душанбе, ки бахшида бо эълон гардидани “Соли ҷавонон” баргузор шуд, мақоми аввалро ишғол намудам. Дар Чемпионати Осиё, ки дар пойтахти Ҷумҳурии Ҳиндустон шаҳри Деҳлӣ аз 10 то 14 май баргузор гардид, зинаи сеюмро ишғол намудам, ки ин натиҷаи беҳтарини ман то имрӯз аст.

Соли 2017 бо як лаҳзааш дар хотирам бештар нақш бастааст: вақте дар чемпионати Осиё дасти маро довар боло карду эълон намуд, ки дар вазни 75 кило мақоми сеюм насиби варзишгари Тоҷикистон Бахтовар Ҳасанов гардид. Бо ин нишондод меъёри “Ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои байналмилалии варзишӣ”-ро иҷро намудам. Ин фурсатро истифода намуда, миннатдории худамро ба Пешвои миллат, муҳтарам Эмомалӣ Раҳмон мерасонам, ки варзишгаронро дастгирӣ менамоянд ва мо – варзишгарон кӯшиш мекунем, ки дар соли 2018 аз ин ҳам натиҷаҳои бештарро ноил гардем.

Сомон МАҲМАДБЕКОВ:

- Имсол бароям соли бобарор буд. Дар давоми соли ҷорӣ нахустин мусобиқаи худро аз Ҷоми ҷудои ҷавонони Африқо дар шаҳри Туниси кишвари Тунис оғоз намуда, медали тилло ба даст овардам. Дар Ҷоми Аврупо миёни ҷавонони то синни 21-сола, ки 19 август дар шаҳри Аради Руминия баргузор гардида буд, низ соҳиби мақоми аввал гардидам ва аз он ифтихор дорам, ки дар ин ду мусобиқа ба туфайли қувваозмоии банда Парчами Тоҷикистони азиз боло гашта, Суруди миллӣ садо дод.

Дастоварди дигари хотирмон бароям сазовори ҷои сеюм гаштанам дар мусобиқаи қаҳрамонии Ҷоми ҷаҳон миёни ҷавонон, дар шаҳри Загреби Ҷумҳурии Хорватия мебошад. Ифтихор мекунам, ки ҷавонони тоҷик дар дохил ва хориҷи кишвар тавонистанд, ному шарафи кишварро дар соҳаҳои илм, фарҳанг ва варзиш дар “Соли ҷавонон” баланд бардоранд. Имсол дар соҳаҳои мухталифи варзиш ҷавонони тоҷик ба дастовардҳои бузурге ноил шуданд, ки чанде аз онҳо барои миллати мо таърихӣ буданд. Қаҳрамонии ҷаҳонпаҳлавон Беҳрӯз Хоҷазода дар ришати самбо, ки баъди 42 сол маҳз дар “Соли ҷавонон” амалӣ гашт. Комроншоҳи Устопириён бори дигар дар шаҳри Ҳонг-конг қаҳрамони Осиё шуд. Дар варзиши сабук бошад, аввалин бор дар таърихи Истиқлолият варзишгарони тоҷик Александр Пронженко, Кристина Пронженко ва Одилшоҳ Исматов аз шаҳри Тошканд ва Бишкек медалҳои тилло оварданд. Аз ҳама муҳим ва хотирмон бароям ин истиқболи мухлисонам буд. Аз ин рӯ, бори дигар ба ҳама мақомот ва мухлисонам, ки маро баъди баргаштанам ба Ватан дар фур¬ӯдгоҳ истиқболи гарм ва қадрдонӣ намуданд, аз самими қалб изҳори ташаккур мегӯям.

Шаҳриёр ДАМИНОВ:

- “Соли ҷавонон” бароям пурбарор буд, зеро дар беҳтарин мусобиқаҳои сатҳи байналмилалӣ Ватанамонро муаррифӣ намудам. Дар ин сол дар ду ҷоми ҷаҳон иштирок намуда, ба даври финалии В ва С расидам, ки ин нишондоди хуб аст.

Баъдан, дар чемпионати Осиё дар шаҳри Шанхайи Ҷумҳурии мардумии Чин сазовори зинаи дуюм гардида, меъёри “Ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои байналмилалии варзишӣ”-ро иҷро намудам. “Соли ҷавонон” дар ҳаёти мани варзишгар бо мусобиқаҳою чорабиниҳои хоссааш дар ёд мемонад.

Ҷаҳонгир: МАҶИДОВ:

- Маҳз бо пайки “Соли ҷавонон” дар соҳаи интихобкардаам ба дастовардҳои бузург ноил гардидам. Аввалин маротиба дар кариераи даҳсолаи варзишиам бо гирифтани холҳои зиёд дар раддабандии Федератсияи байналмилалии ҷудо миёни наврасон садрнишини ҷадвал гаштам. Дидани номи худ дар рӯйхати ҷудочиёни дунё орзуи ҳар як варзишгари наврас аст, ки на ба ҳар кас муяссар мегардад. Аввалин мусобиқаам дар “Соли ҷавонон” бобарор оғоз ёфт, зеро ман маротибаи аввал дар мусобиқаи Ҷоми Аврупо оид ба гӯштини ҷудо то синни 18-сола ширкат намуда, мақоми якумро сазовор гардидам. Пас аз ин моҳи апрели соли ҷорӣ мусобиқаи дуюми байналмилалиам дар шаҳри Тулаи Федератсияи Русия баргузор гардид, ки сазовори медаи тилло шудам. Рӯйдоди таърихии дигар бароям Чемпионати Осиё буд. Ин мусобиқа миёни наврасон 13-14-ум июл дар шаҳри Бишкеки Қирғизистон баргузор гардид. Вақте ки Парчами кишварат дар миёни 70-80 давлати дунё бо садо додани Суруди миллӣ баланд мешавад, ифтихори ватандорист. Имсол маротибаи дуюм аст, ки “Ҷоизаи Президенти Ҷумҳурии Тоҷикистон...”-ро соҳиб мешавам ва ин дастгириҳоро мо - варзишгарон ҳеҷ гоҳ фаромӯш намекунем.

Тибқи нақашаи варзишиам аз соли 2018 омодагиҳоямро ба мусобиқаҳои байналмилалӣ аз намуди гӯштини ҷудо байни ҷавонон оғоз мекунам. Ҳадафи ягона шомил шудан ба рӯихати варзишгарони Олимпиадаи Токио-2020 аст. Ба тамоми дӯстдорони варзиши тоҷик барои дастгириашон изҳори ташаккур намуда гуфтаниям, ки ҳамеша парчамбардори халқу Ватани хеш бошанд!

Акмалиддин КАРИМОВ:

- “Соли ҷавонон” бароям бо он дар хотир мемонад, ки дар се мусобиқаи берун аз кишвар ба хотири ман Суруди миллиамон садо дод. Ин лаҳзаҳои фаромӯшнашуданӣ дар Чемпионати Осиё, ки дар шаҳри Тошканди Ӯзбекистон, дар мусобиқаи Иттиҳоди Давлатҳои Мустақил, ки дар шаҳри Улянски Русия, дар V-умин Бозиҳои осиёӣ дар шаҳри Ашқободи Туркманистон насибам гашт. Дар шаҳри Сочии Русия чемпионати ҷаҳон аз намуди гӯштини самбо баргузор гардид, ки мақоми дуюмро ишғол намудам. Аз миёни ин мусобиқаҳо бароям навгонӣ он буд, ки дар ҳамин сол гӯштини самбо бори нахуст шомили Бозиҳои осиёӣ шуд. Мо интизори ин мусобиқаро надоштем ва тайёриҳоямон низ ба ин мусобиқа чандон хуб набуд. Бо он сабаб ки бахшида ба “Соли ҷавонон” мусобиқаҳои варзишии дохилиҷумҳуриявӣ зиёд баргузор гардид ва мо дар онҳо иштирок намудем, барои мо як заминаи хуби омодашавӣ ба V-умин Бозиҳои осиёӣ гардид. Ин ҳама ғамхориҳо ва иқдомҳои бевоситаи Пешвои миллат, муҳтарам Эмомалӣ Раҳмон нисбати варзиш ва варзишгарон аст. Баъди таъсиси “Ҷоизаи Президенти Ҷумуҳрии Тоҷикистон барои ғолибон ва ҷоизадорони мусобиқаҳои байналмилалии варзишӣ” варзишгарони тоҷик чӣ қадар дастовардҳои навро вориди хазинаи варзиши кишвар намуданд. Ман хурсандам, ки ду маротиба соҳиби ин ҷоиза мегардам ва дар оянда кӯшиш мекунем, ки аз ин ҳам қуллаҳои баланди варзишро фатҳ намуда, беҳтарин дастовардҳоро ба номи Тоҷикистони азизамон муҳр занем.

Саидҷалол САИДОВ:

- “Соли ҷавонон” дар ҳаёти варзишиям як саҳифаи нав боз намуд, зеро дар ҳамин сол яке аз орзуҳои асосиям ҷомаи амал пӯшид. Сар карда аз соли 2013, ки дар Ватанамон “Ҷоми Президенти Ҷумҳурии Тоҷикистон оид ба гӯштини ҷудо” таъсис ёфт, орзуи барандаи ҷоми мазкур шуданро доштам. Хушбахт аз онам, ки соҳиби 5-умин Ҷоми Президенти Ҷумҳурии Тоҷикистон дар соли 2017 гардидам. Дар баробарин ин, дар “Ҷоми Пойтахт-2017”, ки бахшида ба ҷашни Наврӯзи байналмилалӣ аз рӯи намуди гӯштини миллӣ баргузор гардид, мақоми аввалро ба даст овардам. Бахшида ба ҷашни Истиқлолияти давлатӣ ва даври сеюми Фестивали бозиҳои милии варзишӣ дар мусобиқаи ҷумҳуриявӣ аз намуди гӯштини миллӣ, ки дар Варзишгоҳи марказии шаҳри Душанбе доир гардид, зинаи якумро ишғол кардам. Соли 2017 бароям соли пирӯзиҳо буд. Зеро дар тамоми мусобиқаҳои сатҳи ҷумҳурӣ аз рӯи намуди гӯштини миллӣ ва ҷудо ба гирифтани мақоми аввал мушарраф шудам.

Раҳмон МАҲМАДБЕКОВ:

- “Соли ҷавонон”-ро бо дастовардҳое ҷамъбаст намудам, ки орзуяшонро дер боз дар дил мепарваридам. Аз ин рӯ, метавон гуфт, ки соли хотирмон дар ҳаёти варзишиям буд. Аз аввали сол барои варзишгарони тоҷик шароит фароҳам оварда шуд. Мо-варзишгарон аз ин иқдом ва имкониятҳо давоми сол истифода намуда, дар мусобиқаҳои берун аз кишвар миллату давлатамонро муаррифӣ намудем. Дар мусобиқаи ҷумҳуриявӣ миёни ҷавонон қаҳрамон шуда, ҳуқуқи дар мусобиқаҳои байналмилалӣ иштирок намуданро пайдо намудам. Баъдан дар чандин мусобиқаҳои дохилӣ, ки бахшида ба “Соли ҷавонон” гузаронида шуд, иштирок намудам, ки ин таҷриба ва заминаи хуби омодагиҳоям ба Чемпионати Осиё шуд. Чепионати Осиё 3-4-уми июл дар шаҳри Бангкоки давлати Тайланд баргузор гардид ва дар он парчами ватани азизамро дар зинаи сеюм парафшон намуда, аввалин маротиба меъёри “Ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои байналмилалии варзишӣ”-ро иҷро намудам, ки аз ин сарфарозам. Баъдан дар шаҳри Хуҷанд бахшида ба “Соли ҷавонон” мусобиқаи байналмилалӣ доир гардид, ки беҳтарин варзишгарон аз кишварҳои гуногун иштирок доштанд. Дар он дар вазни 86 кило мақоми дуюмро ишғол намудам. Ин дастовард маро қаноатманд намекунад, зеро дар ватани худам имкони хуби қаҳрамон шуданро доштам. Вале ноумед нестам. Шуруъ аз соли 2018 тамринҳоямро дар ду баст ба роҳ монда кӯшиш мекунам, ки дар чемпионати ҷаҳон парчами кишварро дар зинаҳои ифтихорӣ парафшон намоям”.

Темур РАҲИМОВ:

- Соли 2017 назар ба дигар солҳо бароям пурбарор ва хотирмон хотима ёфт. Бобарории сол аз оғози он шурӯъ гардид, зеро бевосита Пешвои миллат соли мазкурро танҳо ба ҷавонон бахшиданд. Ин қарори Роҳбари давлат бе асос намонд ва Ҳукумати кишвар дар ин сол дастгирии ҷавононро дучанд гардонид. Мо сарфароз аз онем, ки дар чунин Ватани соҳиб истиқлол умр ба сар мебарем ва ин ифтихори мост, ки Пешвои миллат, муҳтарам Эмомалӣ Раҳмон ба соҳаи варзиш бисёр таваҷҷуҳи хоса доранд. Ҳар як шахс вақте, ки ба варзиш ҳаёти худро мебахшад, ӯ уҳдадор аст, ки дар мусобиқаҳои байналмилалӣ ширкат намуда, парчами ватани азизи худро дар арсаи ҷаҳонӣ муаррифӣ намояд. Ин талошҳои ӯ аз тарафи Ҳукумат бе ҷавоб намемонад. Зеро маҳз бо дастгирии Пешвои миллат соли 2015 “Ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои байналмилалии варзишӣ” таъсис ёфт. Имсол аввалин маротиба бо ҷоизаи мазкур сарфароз гардидам, ки ин хотирмонтарин лаҳзаҳои варзишиам мебошад. Дар соли -2017 чор ҷоизаи байналмилаиро соҳиб гардидам, ки ин нишондод тавонист дар раддабандии умумиҷаҳонии ҷудо миёни ҷавонон мавқеамро дар зинаи 3-юм қарор диҳад.

Нақша дорам, ки аз намуди ҷудо қаҳрамони ҷаҳон гардам.

Ҷамоллиддин АБДУЛЛОЕВ:

- Дар “Соли ҷавонон” ба дастовардҳои назаррас ноил гаштам. Нахустин ғалабаам аз Ҷоми Осиё оид ба гӯштини ҷудо миёни наврасон оғоз гардид. Дар ин мусобиқа бо ҳамаи ҳарифонам зафар ёфта, сазоврори медали тилло гаштам. Пас аз ин пирӯзӣ роҳхати Ҷоми Аврупо оид ба гӯштини ҷудо миёни наврасонро ба даст овардам. Ин мусобиқа дар шаҳри Анталияи давлати Туркия баргузор гардид. Ҳарчанд мусобиқа бароям нобарор анҷом ёфта бошад ҳам, садди роҳи ғалабаҳои минбаъдаам шуда натавонист. Баъди чанде дар мусобиқаи навбатии Ҷоми Аврупо оид ба гӯштини ҷудо ширкат намуда, зинаи 5-умро касб намудам. Ин чорабини дар шаҳри Тулаи Федератсияи Русия ҷараён гирифт. Дастоварди таърихиам дар ин сол мусобиқаи қаҳрамони ҷаҳон оид ба ҷудо миёни наврасони то 18-сола буд. Мусобиқа аз 9 то 13-уми августи соли ҷорӣ дар пойтахти Чилӣ шаҳри Сантяго доир гардид. Дар ин мусобиқаи ҷаҳонӣ 428 варзишгар (230 писару 198 духтар) аз 64 кишвари ҷаҳон иштирок дошт. Дастаи мунтахаби Тоҷикистонро панҷ нафар варзишгар муаррифӣ намудем, ки аз байни онҳо ба ман муяссар гардид, ки медали биринҷии ин чорабиниро ба даст орам. Тими мунтахаби паҳлавонони Тоҷикистон бо як медали биринҷӣ ва як мақоми панҷум дар байни 64 кишвар ҷои 24-умро соҳиб шуд, ки ин лаҳзаҳои фаромӯшнашаванда дар фаъолияти варзишиам аст.

Ҷаҳон ҚУРБОНОВ:

- Мо - варзишгарон бисёр хурсанд шудем, ки соли 2017 аз тарафи Пешвои миллат, муҳтарам Эмамалӣ Раҳмон “Соли ҷавонон” эълон гардид. Зеро варзишгарони Тоҷикистон аслан ҷавононанд. “Соли ҷавонон”-ро ман бо дастовардҳои зерин сипарӣ намудам: Моҳи майи соли 2017 дар Чемпионати Осиё, ки дар шаҳри Тошканди Ҷумҳурии Ӯзбекистон баргузор гашт, сазовори медали биринҷӣ ва соҳиби роҳхат ба чемпионати Ҷаҳон гаштам. Моҳи августи соли 2017 дар давлати Белорусия дар мусобиқаи байналмилалӣ, ки дар он варзишгарон аз 20 давлат иштирок намуданд, мақоми сеюмро касб намудам.

Соли 2017 нисбат ба дигар солҳо бартарии зиёд дошт. Бо шарофати ин сол дар ҳамаи шаҳру ноҳияҳои ҷумҳурӣ бисёр толорҳои варзишӣ, майдончаҳои варзишии нав сохта шуданд, ки ин саҳми хеле балнд барои пешрафти варзиши тоҷик аст.

Дар соли 2017 дар ҳама паҳлӯҳои ҳаёт такя ба ҷавонон карданд. Чизи дигари хотирмон дар ин сол бароям сарвари Мактаби варзишӣ таъин шуданам буд. Албатта, дар оянда дар паҳлуи Пешвои миллат рост истода, баҳри муаррифии миллату давлатамон кӯшиш ба харҷ медиҳем.

Зафар ОЛИМШОЕВ:

- Имсол ба он хотир бароям хотирмон аст, ки аввалин бор дар Чемпионати ҷаҳонии самбо ҷоизадор шудам. Нисбати солҳои қаблӣ соли 2017 дар мусобиқаҳои байналмилалӣ зиёд иштирок намудем ва натиҷаҳои хуб низ ба даст овардем. Ин ҳама дастовардҳо ба туфайли “Соли ҷавонон” эълон гардидани соли 2017 аз ҷониби Пешвои миллат, муҳтарам Эмомалӣ Раҳмон буд. Зеро дар ин сол мусобиқаҳои варзишӣ нистаб ба солҳои қаблӣ чандин маротиба зиёдтар баргузор гардид ва мо тавонистем таҷрибаи худро барои мусобиқаҳои берун аз кишвар зиёд намоем. Муваффақиятҳоям дар ин сол аз мусобиқаи ҷумҳуриявӣ оғоз гардид, ки дар вазни 82 кило қаҳрамони Ҷумҳурии Тоҷикистон гардидам. Ин дастовард сабаб гардид, ки давоми сол дар вазни 82 кило дар берун аз кишвар муаррифгари Тоҷикистони азиз бошам. Дар чемпионати Осиё бошад, зинаи сеюмро касб намудам. Дар V-умин Бозиҳои осиёӣ, ки дар шаҳри Ашқобод баргузор гардид, дар даври ниҳоӣ вохӯриро бохтам ва медали нуқраро ба гардан овехтам.

Ман ин ҳама дастовардҳоро дар самти варзиши тоҷик аз таваҷҷуҳи бевоситаи Пешвои миллат, муҳтарам Эмомалӣ Раҳмон мебинам. Он ғамхорию иқдоме, ки нисбати мо варзишгарон мекунанд, дар ҷавоб мо кӯшиш мекунем, ки аз ин ҳам бештар баҳри обрӯи миллати худ талош намоем.

Сорбон ЛАТИФОВ:

- Ман пеш аз ҳама миннатдории худро ба Пешвои миллат, муҳтарам Эмомалӣ Раҳмон мерасонам, ки соли 2017-ро “Соли ҷавонон” эълон карданд. Бо шарофати ин сол дар мусобиқоти Ҷоми Ҷахон, ки дар шаҳри Астанаи Ҷумҳурии Қазоқистон аз намуди самбои муҳорибавӣ иштирок намуда, сазовори ҷои 2-юм ва медали нуқра гаштам. Бароям фаромӯшнашуданист, ки бори аввал дар ҳамин сол дар Чемпионати Ҷахон, ки дар шаҳри Сочии Федератсияи Русия баргузор гардид, иштирок карда, соҳиби медали биринҷӣ шудам. Аз ин рӯ, соли 2017 барои ман хело соли бобарор аст.

Ҳамчунин аввалин маротиба аст, ки қатори варзигарони дигари муваффақ номам шомили гирандагони “Ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои байналмилалии варзишӣ” гардид. Ин барои мани варзишгар боиси ифтихори аст, ки Роҳбари давлат ба мо таваҷҷуҳи махсус зоҳир мекунад ва мо ваъда медиҳем, ки бо дастовардҳои худ сазовори ин бовариҳо мегардем.


Ҳоҷимашраб РАҲМОНОВ:

- Мо фарзандони даврони истиқлол ифтихор аз он дорем, ки дар чунин ватани орому осоишта умр ба сар мебарем. Барои мо варзишгарон Ҳукумати кишвар ва Пешвои миллат тамоми шароитро фароҳам овардааст. Имрӯз мо - варзишгаронро мебояд, барои баланд бардоштани парчами давлату миллати хеш ва муаррифии он дар арсаи ҷаҳонӣ шабу рӯз заҳмат кашида, қарзи фарзандии худро адо намоем. Боиси ифтихор аст, ки баҳри руҳбаланд намудани варзишгароне, ки бо дастовардҳои байналмилалӣ мушараф гардидаанд, “Ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои байналмилалии варзишӣ” таъсис ёфтааст.

Соли 2017 ба дастовардҳои таърихӣ ноил гардидам. Аз ҷумла моҳи май дар Ҷоми кушоди Осиё миёни ҷавонон оид ба гӯштини ҷудо ширкат намуда, бо медали биринҷии ин мусобиқа ба Ватан баргаштам. Баъди чанде унвони чемпиони Тоҷикистон оид ба гӯштини ҷудо миёни ҷавононро ба даст овардам. Чемпионати Осиё байни ҷавонон дар фаъолияти варзишиам нишондоди таърихист. Мусобиқа 15-16-уми июл дар шаҳри Бишкеки давлати Қирғизистон баргузор гардид, ки бо медали биринҷӣ мушарраф гардидам ва “Соли ҷавонон” бо ин дастовардам дар хотири ман нақш мебандад.

Эраҷ АБДУЛЛОЕВ:

- Аз диди як варзишгар ва шояд тамоми одамон ифтихори миллӣ замоне боло мегирад, ки Парчами маҳбуби Ватан дар дигар кишвар барафрохта мешавад, ин лаҳзаҳо ифтихори миллии моро ҳадду канор нест. Аз рӯзҳои аввали тамринам дар ниҳодам маҳз ҳамин орзуро мепарваридам, ки ман бояд давлату миллатмаро берун аз кишвар муаррифӣ намоям. Бо вуҷуди он ки дар соли ҷорӣ, чемпионати кишвар байни калонсолон ҷойи дуюм, чемпионати кишвар байни ҷавонон то 23-сола ҷойи якумро гирифтам, аммо ин маро қаноатманд нагардонид. Як даъфа дар чемпионати чаҳон миёни ҷавонон дар Хорватия шикаст хурдам, аммо дар чемпионати Осиё байни ҷавонон оид ба гӯштини ҷудо ҷойи сеюмро ишғол кардам. Ин ҳама бурдро барои худ хеле кам медонам. Ва дақиқан ҳам дар борабри ин ҳама дастгириҳо ҳадяи кӯчак аст. “Соли ҷавонон” дар баробари дигар дастгириҳо бесобиқа аст. Орзуҳое, ки мехостам дар ин сол бароварда созам, мекӯшам ба номи ҳамин сол дар дигар солҳо онҳоро амалӣ намоям. Мегӯянд, “Ҳар сарбоз орзуи генерал шуданро дорад”. Ман ҳам нақшаи асосиам ин аст, ки дар оянда дар кишвар миёни калонсолон қаҳрамон шуда, медали олимпиро ба даст оварам.


Фарҳод Раҳматуллобеков:

- Имсол бароям соли пурфайзу бобарор ва хотирмон буд. Зеро дар “Соли ҷавонон” ба се ҷоизае ноил гардидам, ки орзуяшонро ҳамеша дар дил мепарваридам. Эълон гардидани соли 2017 ҳамчун “Соли ҷавонон” аз тарафи Пешвои миллат, Президенти кишвар, муҳтарам Эмомалӣ Раҳмон дар ҳаёти ҷавонони кишвар як саҳифаи нав боз шуд. Саҳми ҷавонон дар рушди ҷомеа ва иштироки фаъолонаи онҳо дар мусобиқаҳои варзишии байналмилалӣ бештар гардид. Аз ҷумла баъди ғолибият дар чемпионати кишвар оид ба гӯштини ҷудо байни ҷавонон роҳхати мусобиқаи Ҷоми Осиёро ба даст овардам. Ин мусобиқа дар ҳаёти варзишиам аввалин маҳсуб меёфт ва аз лиҳози камтаҷрибагӣ дар он сазовори ҷои сеюм гардидам. Пас аз ин рақобатҳо маро дар пеш Чемпионати Осиё байни ҷавонон интизор буд ва хушбахтона, дар мусобиқаи мазкур бар ҳамаи ҳарифон пирӯз шудам. Ин аввалин медалли тиллои ман аз мусобиқаи байналмилалӣ буд, ки ба гардан овехтани он дар “Соли ҷавонон” бароям муяссар гардид. Ин лаҳзаро ҳеҷ гоҳ фаромӯш намекунам. Боиси ифтихор аст, ки ғолибони мусобиқаҳои байналмилалӣ дар риштаи варзиш бо Ҷоизаи Президенти кишвар сарфароз мегарданд ва барои ман имсол бори аввал ин ҷоиза насиб гардид. Ин дастгирии Роҳбарияти кишвар барои варзишгарони ҷавон як ҷаҳон эҳсосоти баланди миллӣ мебахшад, ки ҳамеша талош барои муаррифии халқу миллати хеш мекунанд.

Ибодулло ИБОДОВ:

- “Соли ҷавонон” барои он хотирмон аст, ки ман барои аввал дар мусобиқаҳои берун аз кишвар Тоҷикистонро муаррифӣ намудам. Солҳои пеш намуди гӯштини Ҷиу-Ҷитсу дар кишварамон маъмул набуд ва мо наметавонистем дар мусобиқаҳои сатҳи байналмилалӣ иштирок намоем. Дар солҳои қаблӣ низ дар сатҳи ҷумҳурӣ натиҷаҳоям бад набуд, вале муаррифии миллат дар арсаи байналмилалӣ бароям дар соли 2017 даст дод. Бахшида ба “Соли ҷавонон” зиёда аз панҷ мусобиқаи сати ҷумҳуриявӣ баргузор гардид, ки дар ҳамаи онҳо фаъололна иштирок намудам. Моҳи феврали 2017 мусобиқаи ҷумҳуриявӣ доир гардид, ки дар вазни 34 килло қаҳрамони Тоҷикистон гаштам. Ин дастовард ба ман имкон дод, ки дар мусобиқаҳои берун аз кишвар Тоҷикистонро муаррифӣ намоям. Чемпионати ҷаҳон миёни ҷавонон дар шаҳри Абудабии Аморати Мутаҳидаи Араб 16-18 апрел баргузор гардид, ки парчами кишварро дар зинаи аввал парафшон намуда, медали тиллоро ба гардан овехтам. Ин шарафи бузург – аввалин мусобиқаи берун аз кишвар ва аввалин медали тиллои Чемпионати Ҷаҳон бароям дар “Соли ҷавонон” даст дод. Аввалин мусобиқаи байналмилалӣ ва соҳиби зинаи аввал гардидан ба муваффақиятҳои баъдӣ роҳи моро боз намуд. Дар мусобиқаи байналмилалӣ, ки дар Қазоқистон баргузор гардид, миёни зиёда аз 12 давлат боз зинаи аввалро ишғол намуда, ба Чемпионати ҷаҳони соли 2018 роҳхат гирифтам. Ин ҳама натиҷаҳо, албатта, аз “Соли ҷавонон” бароям хотирмонанд.

Шамсиддин АБДУРАҲМОНОВ:

- “Соли ҷавонон” барои ман ва Федератсияи гӯштини Ҷиу-Ҷитсу хотирмон буд. Баъди эълон гардидани “Соли ҷавонон” варзиш дар ватани мо даҳчанд оммавӣ гардид. Ин фурсатҳоро истифода бурда, мо намуди гӯштини ҷиу-ҷитсуро ба ҷавонон муаррифӣ намуда, аввалин маротиба дар Чемпионати Ҷаҳон Тоҷикистонро аз ин намуди гӯштин намояндагӣ намудем. Дар аввалин ҳунарнамоии худ тавонистам мақоми дуюмро касб намудам. “Соли ҷавонон” соли муаррифии миллати тоҷик дар намуди Ҷиу-Ҷитсу буд. Дар Чемпионати ҷаҳон миёни ҷавонон, ки мо аввалин маротиба ширкат намудем, давлати моро намешинохтанд. Баъдан чанд нафар варзишгарони мо зинаи аввалро ишғол намуданду суруди миллии мо садо дод ва парчами Тоҷикистони азиз парафшон шуд, онҳо омада моро табрик мекарданд. “Соли ҷавонон” бо ҳамин лаҳзаҳояш дар хотирам нақш бастааст. Хурсанд аз он ҳастам, ки бори аввал сазовори Ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаи байналмилалии варзишӣ шудам. Дар соли 2018 Бозиҳои олимпии Осиё, ки дар шаҳри Ҷакартаи Индонезия баргузор мегардад, гӯштини Ҷиу-Ҷитсу аввалин маротиба шомили ин бозиҳо гардид. Кӯшиш мекунем, ки дар мусобиқаи мазкур парчами ватанамонро дар зинаи аввал муаррифӣ намоем.

Фатҳулло ФАТҲУЛЛОЕВ:

- Дар “Соли ҷавонон” бисёр хотироти ҷолиб ва дастовардҳои хубе бароям боқӣ монд. Бо дастгирии Пешвои миллат ва роҳбарияти Федератсияи футболи Тоҷикистон имсол дар соҳаи футболи кишвар навигариҳои зиёд ба миён омад. Тими мунтахаби футболи кишвар барои роҳхат гирифтан ба бозиҳои Ҷоми Осиё-2019 вохӯриҳои тақдирсозро гузаронид. Бо дастаи “Истиқлол” то финалӣ бозиҳои Ҷоми КФО-2017 баромадем. Ҳарчанд гирифтани ин ҷом бароямон муяссар нагашт, вале як таҷрибаи хубе шуд. Бо ҳайати тими “Истиқлол” чор маротиба ба бозиҳои финалӣ –Ҷоми ФФТ, Суперҷоми Тоҷикистон, Ҷоми КФО, ва Ҷоми Тоҷикистон баромада, Қаҳрамонии кишвар ва Ҷоми ФФТ-ро ба даст овардем, ки ин худ як дастоварди бузург аст. Ба кулли мардум тоҷик барору комёбиҳо ва ба варзишгаронашон пирӯзиҳои пай дар пайро таманно дорам.

Муҳаммадраҳим САРАХОНОВ:

- Соли 2017 пур аз комёбиҳову дастовардҳо буд. Зеро ин солро Пешвои миллат, муҳтарам Эмомалӣ Раҳмон ба ҷавонон бахшиданд ва ҷавонону варзишгарон бошанд, тамоми имкониятҳоро истифода намуданд. Мо – варзишгарон ба хотири адо намудани қарзи фарзандии худ дар назди Ватан бо ҷону дил талош намудем.

Аввалин дастовардам дар ин сол аз чемпионати кишвар оид ба гӯштини ҷудо миёни калонсолон оғоз гардид. Дар мусобиқаи мазкур сазовори ҷойи сеюм гардида, роҳамро барои мусобиқаҳои ҷаҳонӣ боз намудам. Аз ҷумла роҳхат ба Чемпионати Осиё оид ба гӯштини ҷудо миёни ҷавононро ба даст овардам, ки 16 июли соли ҷорӣ дар шаҳри Бишкеки давлати Қирғизистони баргузор гардид. Дар ин мусобиқа мақоми сеюмро касб намуда, роҳхат ба Чемпионати ҷаҳон байни ҷавононро соҳиб гардидам. Дар он мусобиқа пас аз ду ғалаба ба шикаст рӯ ба рӯ шудам. Ҳарчанд мағлуб гардида бошам ҳам, роҳи маро барои идомаи мусобиқаҳо набастааст. Нақша дорам дар соли 2018 дар мусобиқаи ҷаҳонӣ оид ба гӯштини ҷудо миёни ҷавонон ширкат варзам.