Дар давоми нуҳ моҳи соли равон варзишгарони Вилояти Мухтори Кӯҳистони Бадахшон дар 13 мусобиқаву 11 чемпионати ҷумҳуриявӣ иштирок намуда, 109 медалро ба даст оварданд, ки аз онҳо 16 медали тилло, 40 нуқра ва 53 медали биринҷӣ мебошанд.

Дар ин бора имрӯз, 20 октябр, муовини сардори Раёсати кор бо ҷавонон ва варзиши вилоят Юсуф Асадбеков дар ҷаласаи назоратии назди раиси ВМКБ Ёдгор Файзов иттилоъ дода гуфт, ки варзишгарони вилоят инчунин дар ду мусобиқаи байналмилалӣ иштирок карда, натиҷаҳои назаррасро соҳиб шуданд.

“Мояи шарафу сарфарозист, ки дар давраи соҳибистиқлолии кишвар соҳаи варзиш ҳамчун муаррифгари миллат, тарғибгари тарзи ҳаёти солим бесобиқа рушд карда, таваҷҷӯҳу ғамхории рӯзафзуни Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Ҳукумати мамлакат ба ин самт бештар гардидааст. Феълан бо мақсади рушди соҳаи варзиш дар вилоят Маркази омодагии олимпӣ, мактабҳои махсуси гуштинҳои вилояту бозиҳои варзишии шаҳри Хоруғ ва ҳафт мактаби варзишӣ дар ноҳияҳои ВМКБ фаъолияти босамар доранд”, - афзуд номбурда.

Мавриди қайд аст, ки бо мақсади рушду оммавияти варзиш ҳоло дар вилоят иловатан намояндагии панҷ федератсияҳои клубҳои варзишии кишвар фаъолият менамоянд.