Дар маҳаллаи Носири Хусрави шарҳи Хоруғ бо иштироки раиси Вилояти Мухтори Кӯҳистони Бадахшон Мирзонабот Алишер Худобердӣ, раиси шаҳри Хоруғ Назарзода Ризо Шодӣ, сардори Раёсати кор бо ҷавонон ва варзиши вилоят Юсуф Асадбеков ва варзишгарону сокинон майдончаи нави варзишӣ мавриди баҳрабардорӣ қарор гирифт.

Нахуст раиси ВМКБ ҷамъомадагонро ба муносибати 25-умин солгарди Рўзи ваҳдати миллӣ табрику шодбош намуда, аз ҷумла иброз дошт, ки майдончаи варзишӣ бо дастуру супоришҳои бевоситаи Асосгузори сулҳу вахдати миллӣ - Пешвои миллат муҳтарам Эмомалӣ Раҳмон баҳри ҷалби ҳарчи бештари наврасону ҷавонони вилоят ба варзиш бунёд гардид.

Таъкид шуд, ки ҳоло дар ҳудуди вилоят зиёда аз 40 майдончаҳои хурду калони замонавӣ аз тарафи Ҳукумати кишвар, Федератсияи футболи Тоҷикистон ва “Дирексияи сохтмони иншооти ҳукуматӣ”-и Дастгоҳи иҷроияи Президенти Ҷумҳурии Тоҷикистон сохта гашта, ҷавонони зиёд ба соҳа рағбату дилбастагӣ доранд.

Дар рӯзи ифтитоҳи майдонча баҳри дарёфти Ҷоми раиси ВМКБ мусобиқаи волейбол доир шуд, ки дар он 10 дастаи бонувону 10 тими ҷавонписарон бо ҳам рақобат карданд. Дар фарҷоми мусобиқа ғолибон бо ҷом, медал, ифтихорнома ва мукофотпулӣ қадрдонӣ шуданд.