Фазои беғубору соҳибис-тиқлолии кишвар тайи 30 соли охир насли муваффақу парчамбардори миллатро ба воя расонида истодааст, ки ҳамагӣ мояи ифтихору сарафрозии Тоҷикистони азиз мебошанд. Хушбахтона аз нахустин рӯзҳои ба даст овардани Истиқлолият таваҷҷуҳи роҳбарияти олии кишвар ба варзишгарон зиёд ба чашм расида, баҳри боз ҳам бештар рушд намудани соҳа тамоми имконоту мақсадҳо равона шудааст. Аз ин ҷост, ки ҳамарӯза дар ҳар як риштаи варзиш чеҳраҳои наву муваффақро вохӯрдан мумкин аст.

Фирӯз Мирзораҷабов варзишгари муваффақ, серталош, ҳамагӣ 21 сол дорад. Ӯ зодаи шаҳри Душанбе буда, солҳои зиёд аст, ки аз минбарҳои баланди варзиш парчами нангу номуси миллатро миёни оламиён муаррифгар аст.

Фирӯз мегӯяд, ки барои варзишгар шуданаш ӯро ҳеҷ кас роҳбариву роҳнамоӣ накардааст, балки эҳсоси бузургу шавқи беинтиҳои варзиш ӯро дар ин роҳ раҳбар буду ҳаст. Соли 2012 Фирӯз бо умеди фардои нек ва номбардори Ватан будан, роҳ сӯи мактаби варзишии рақами 37-и ноҳияи Сино пеш гирифт. Аввалин нафаре, ки ӯро ба шогирдӣ қабул намуду нозукиҳои риштаи гӯштини юнону румиро барояш омӯзонд, мураббии шоистаи ҷумҳурӣ Субҳониддин Абдукаримов буд. Пас аз се моҳи тамрин соли 2012 Фирӯз имконият пайдо намуд, то дар мусобиқаи байналмилалии гӯштини юнону румӣ дар байни наврасон, ки дар шаҳри Бишкеки Ҷумҳурии Қирғизистон баргузор шуд, иштирок намуда, дар вазни 27 кг сазовори ҷойи сеюм гардад. Фирӯз ин пирӯзии худро аввалин ҷаҳиш дар ҳаёти варзишии худ медонад, зеро барои амалишавии мақсадҳояш қадами аввалини худро гузошта тавонист. Ҳамин тариқ, дилгармиву шавқмандиаш дар ин ҷода бештар гардиду барои сазовор будан ба номи варзишгар бештар кӯшид.

Заҳматҳо бенатиҷа нахоҳанд монд. Соли 2014 пас аз натиҷаҳои бадастовардаи ҷумҳурӣ роҳхати иштирок дар мусобиқаи байналмилалии гӯштини юнону румиро дар шаҳри Маскав пайдо намуд ва дар вазни 38 кг барандаи медали тилло ва мақоми аввали мусобиқа шуд. Соли 2015 дар шаҳри Алмаатои Қазоқистон дар мусобиқаи мазкур бори дуввум дар вазни 38 кг ҷойи якумро шарафёб гардид.

Маврид ба зикр аст, ки Фирӯз дар ин айём садрнишини ҷадвали мусобиқаҳои гӯштини юнону румӣ дар сатҳи ҷумҳурӣ низ буд ва талошҳояш ба ӯ имкон дод, то 2 маротиба (солҳои 2016 ва 2017) дар чемпионати Ҷоми Ҷаҳон аз намуди гуштини юнону румӣ дар Ҷумҳурии Исломии Эрон дар вазнҳои 48-52 кг миёни 16 давлати ҷаҳон ба мақоми дуввум расад. Ҳамзамон соли 2018 дар мусобиқаи интихобии чемпионати Осиё, ки дар шаҳри Тошканди Ҷумҳурии Ӯзбекистон баргузор гардида буд, дар вазни 51 кг миёни 21 кишвари ҷаҳон барандаи ҷойи дуюм гардид.

Аз соли 2019 Фирӯз тамринҳояшро назди устодаш Субҳониддин Абдукаримов идома дода, бо варзишгарони шинохтаву муваффақи ҷумҳурӣ бештар машқҳои дастаҷамъонаи худро доир мекунад. Ҳамин буд, ки бо тайёрии ҷиддиву бовариноки худ дар мусобиқаи интихобии чемпионати Осиё, ки дар шаҳри Нурсултони Ҷумҳурии Қазоқистон доир гардид, дар вазни 55 кг сазовори медали тилло ва мақоми аввал гардид. Ҳамчунин, дар ин соли бобарор дар Чемпионати ҷаҳон дар Ҷумҳурии Булғористон дар вазни мазкур ба мақоми сеюм даст ёфт.

Соли 2020 бинобар сабаби вазъи ногувори ҷомеаи башарӣ ва лағв гардидани бештари аз мусобиқаҳои сатҳи байналмилалӣ Фирӯз натавонист, дар хориҷ аз кишвар ҳунарнамоӣ кунад ва ҳамин тариқ соли сипаригардидаро пурра бо тамрин пушти сар намуд.

Соли 2021 барояш соли бобарору муваффақият гашт. Фирӯз дар нахустин сабқати имсолааш, ки мусобиқаи интихобии Чемпионати Осиё буд, барои роҳхат гирифтан ба Бозиҳои олимпӣ дар шаҳри Алмаатои Қазоқистон иштирок намуд ва дар вазни 60 кг сазовори ҷойи сеюм гардид.

Айни замон ӯ барои иштирок дар мусобиқаи интихобии Ҷоми ҷаҳон, ки ҳафтаи аввали моҳи майи соли ҷорӣ дар Булғористон доир мегардад, омодагӣ дида, мақсад дорад, то аз ин мусобиқаи бонуфузи сатҳи байналмилалӣ роҳхати Бозиҳои тобистонаи олимпии Токио - 2021-ро ба даст биёрад. Ягона мақсадаш низ иштирок дар Бозиҳои олимпӣ ва касб кардани мақоми ифтихории он мебошад.

Қиёмиддин МАҲМАДҶОНОВ, “ҶТ”