ё дурахши бемисли ҷудокорони тоҷик дар Гранд Слами Қазоқистон

Дар шаҳри Остонаи Қазоқистон 16-18 июн дар доираи сайри ҷаҳонии ҷудо мусобиқаи “Qazaqstan Barysy Grand Slam 2023” баргузор гардид, ки дар он 334 варзишгар (190 мард, 144 зан) аз 42 давлати ҷаҳон байни ҳам неру санҷиданд.

Ҷумҳурии Тоҷикистонро дар ин мусобиқа 10 варзишгар миёни мардон намояндагӣ карданд.

Гранд Слами Қазоқистон 16 июн бо қувваозмоиҳо дар вазнҳои -60кг, -66кг миёни мардон, -48кг, -52кг, -57кг миёни бонувон оғоз гардид. 17 июн мардон дар вазнҳои -73кг, -81кг, бонувон дар вазнҳои -63кг, -70кг, 18 июн мардон дар вазнҳои -90кг, -100кг, +100кг, бонувон дар вазнҳои -78кг, +78кг сабқат намуданд.

Дар рӯзи якуми мусобиқа 4 варзишгари тоҷик, дар вазни -60кг Муҳаммадсолеҳ Қувватов, Меҳрзод Суфиев, дар вазни -66кг Эмомалӣ Нуралӣ ва Обид Ҷебов кишварро намояндагӣ карданд. Дар рӯзи дуюм бошад, дар вазни -81кг Сомон Маҳмадбеков ва Шодмон Ризоев майдондорӣ намуда, рӯзи сеюм Умедҷон Раҷабов дар вазни -90кг, Исроил Раҳимов дар вазни -100, Темур Раҳимов ва Шакармамад Мирмамадов дар вазни +100кг барои ба даст овардани ҷойҳои ифтихорӣ талош намуданд.

Рӯзи аввали мусобиқа варзишгари мо Меҳрзод Суфиев дар вазни -60кг ба гирифтани мақоми панҷум мушарраф шуд. Ӯ, ки дар даври аввал озод буд, дар даври дуюм бар варзишгари Австралия Ҷошуа Катз, дар чорякфинал бар варзишгари бетараф Ғамзат Заирбеков ғалаба карда, дар нимфинал аз варзишгари тими мизбон Магжан Шамшаддин ва дар қувваозмоӣ барои ҷои сеюм аз Достон Рӯзиеви узбекистонӣ мағлуб шуд.

Дар вазни -60кг варзишгари дигари кишвар Муҳаммадсолеҳ Қувватов пас аз пирӯзӣ бар Артём Коласау дар даври аввал, дар даври дуюм аз Достон Рӯзиеви узбекистонӣ шикаст хурд.

Дар вазни -66кг ду варзишгари тоҷик – Эмомалӣ Нуралӣ ва Обид Ҷебов ҳунарнамоӣ намуданд. Онҳо, ки дар даври аввал озод буданд, дар даври дуюм аз варзишгарони Озарбойҷон мағлуб гардиданд - Эмомалӣ аз Каромат Ҳусейнов, Обид аз Комрон Сулеймонов.

17-уми май, ки дар рӯзи дувуми мусобиқа ҷумҳурии моро миёни мардон дар вазни -81кг Сомон Маҳмадбеков ва Шодмон Ризоев намояндагӣ карданд. Дар қувваозмоиҳои вазни мазкур варзишгари маъруфи кишвар Сомон Маҳмадбеков ба гирифтани медали тилло мушарраф шуд.

Сомон, ки дар даври аввал озод буд, дар даври дуюм бар варзишгари бетараф Ҳасан Холмирзоев, дар чорякфинал бар варзишгари Озарбойҷон Зелим Тскаев, дар нимфинал бар намояндаи Гурҷистон Дмитрий Гошилаидзе ва дар финал варзишгари Бразил Гуилҳерме Шмидтро мағлуб намуда, аввалин медали тиллоро аз мусобиқаҳои Гранд Слам ба гардан овехт. Ӯ қаблан дар Гранд Сламҳо ду медали биринҷӣ дошт.

Варзишгари дигар Шодмон Ризоев пас аз пирӯзӣ бар Мусо Собирови узбекистонӣ дар даври аввал, дар даври дуюм аз Нугзалӣ Таталашвилӣ аз Амороти Муттаҳидаи Араб шикаст хурд.

18-уми май дар рӯзи ҷамъбастии Гранд Слами Қазоқистон ҷумҳурии моро 4 варзишгар намояндагӣ карданд ва танҳо ба Темур Раҳимов имкон даст дод, ки соҳиби нишони нуқраи мусобиқа гардад.

Темур Раҳимов дар вазни +100кг рақобатро аз даври дуюм шуруъ карда, бар варзишгари фаронсавӣ Ҷозеф Тереч, дар чорякфинал бар варзишгари бетараф Валерий Ендовитский, дар нимфинал бар намояндаи Гурҷистон Саба Инанеишвилӣ пирӯз шуд, вале дар финал аз варзишгари дигари бетараф Тамерлан Башаев мағлуб гардида, дуюмин медали нуқра ва ҳафтумин медалро аз мусобиқаҳои Гранд Слам ба даст овард. Ӯ қаблан дар Гранд Сламҳо як медали тилло, як медали нуқра ва чор медали биринҷӣ дошт.

Варзишгарони дигарамон Умедҷон Раҷабов (-90кг) ва Исроил Раҳимов (-100кг) дар даври аввал аз ҳарифони худ мағлуб гардиданд. Шакармамад Мирмамадов (+100кг) пас аз пирӯзӣ бар Азамат Чотчаев аз Баҳрайн дар даври аввал, дар даври дуюм аз Гурам Тушишвилии гурҷистонӣ шикаст хурд.

Пас аз анҷоми мусобиқа ва раддабандии кишварҳои иштирокчӣ тими ҷудои Тоҷикистон бо як медали тилло ва як нуқра дар ҳисоби даставӣ миёни 42 кишвар дар ҷои 5-ум мавқеъ гирифт.

Яҳё МАҲМАДНАБИЕВ, “ҶТ”