ВАРЗИШ
Ҷумъа 19 Апрел 2024 02:16
9355
Барои Юсуф зиндагӣ ҳар субҳ аз сари нав оғоз мегардад. Ҳар субҳ гӯё ӯ дигарбора таваллуд мешавад. Ҳар субҳ тамрин мекунад, чун варзиш мағз андар мағзаш ҷой гирифтаву ҳаёти хешро бе он тасаввур карда наметавонад. Анҷоми амалҳои варзишӣ меъёри ҳаррӯзаи зиндагияш гаштааст.

Юсуф Абдусаломов вақте ҳамагӣ 12 сол дошт, аввалин пирӯзиро соҳиб гаштааст. Кашфи Юсуф чун паҳлавони гӯштингир дар деҳаи кӯҳистони Ансалтаи Доғистон, ки ҳар соле дар он ҷо сабқати паҳлавонӣ баргузор мешуд, падид омад. Ӯ дар яке аз чунин қувваозмоиҳо бар ҳамаи ҳарифони ҳамсоли худ пирӯз шуда, ба унвони қаҳрамонӣ даст ёфтааст.

Ба майдонҳои касбӣ роҳ ёфтани Юсуф бошад, ба соли 2002 рост меояд. Ӯ соли 2002 дар як мусобиқаи байналмилалӣ бо ширкати зӯртарин гӯштингирон барои дарёфти ҷоизаи бо номӣ Алӣ Алиев ширкат варзида, соҳиби ҷоиза гардид. Дар ин мусобиқа раҳбарони варзиши тоҷик низ ҳузур доштанд ва ҳунарнамоии Юсуфро дида, писандиданд. Юсуфро барои ширкат дар ҳайати дастаи мунтахаби гӯштини тарзи озоди Тоҷикистон дар мусобиқоти мухталиф даъват карданд. Ва ҳамин тавр, Юсуф Абдусаломов чандин сол Тоҷикистонро дар арсаи ҷаҳон намояндагӣ кардааст.

Ӯ дар ҳайати дастаи мунтахаби гӯштини тарзи озоди Тоҷикистон соли 2002 дар Бозиҳои осиёӣ дар шаҳри Бусани Куриёи Ҷанубӣ дар рақобатҳо дар вазни зери 74 килограмм мақоми дувумро касб карда, барандаи медали нуқра гардидааст. Соли 2003 дар панҷумин давраи Бозиҳои Осиёи Марказӣ дар шаҳри Душанбе ба дарёфти медали тилло ва унвони қаҳрамонӣ даст ёфт.

“Ман Тоҷи-кистонро ватани аввали худ меҳисобам, зеро ки ба он бисёр одат кардаам. Дар ин ҷо дӯстонам бисёранд ва ба ман хеле таваҷҷуҳи зиёд зоҳир мешавад. Ман худро русиягӣ намеҳисобам, маро дар ҳама ҷо ҳамчун тоҷик мешиносанд ва хеле ҳам хушнуду сарфарозам, ки Тоҷикистон ва мардуми тоҷикро намояндагӣ мекунам”, - гуфтааст, Юсуф дар яке аз мусоҳибаҳояш.

Соли 2007 барои Юсуф Абдусаломов соли бобарору хотирмон буд. Чун вай дар мусобиқоти қаҳрамонии ҷаҳон оид ба гӯштини тарзи озод дар шаҳри Боку дар сабқати ниҳоӣ соҳиби медали нуқра ва роҳхат ба Бозиҳои олимпии Пекин шуд.

8 октябри соли 2009 қаҳрамони мо, дорандаи ҷоизаи олимпиадаи Пекин дар мусобиқаи байналмилалӣ оид ба гӯштини тарзи озод дар шаҳри Якутски Федератсияи Русия иштирок карда, соҳиби медали нуқра шуд. Дар мусобиқаи мазкур 93 варзишгар аз 10 мамлакати ҷаҳон иштирок намуданд. Дар мусобиқаи ниҳоӣ барои гирифтани ҷойи аввал дар вазни 84 кг Юсуф Абдусаломов бо варзишгари русиягӣ Сослан Кисоев муҳориба намуда, ба гирифтани ҷои дуюм мушарраф гардид.

МУРАББИИ НАВИ ДАСТАИ МУНТАХАБИ ТОҶИКИСТОН ОИД БА ГӮШТИНИ ТАРЗИ ОЗОД

Ӯ баъд аз анҷоми фаъолияти варзишӣ дар ду давраи олимпӣ - аз соли 2013 то соли 2021 - сармураббии дастаи мунтахаби Лаҳистон оид ба гӯштини тарзи озод буд ва ноябри соли 2021 сармураббии дастаи мунтахаби Маҷористон оид ба гӯштини тарзи озодро бар дӯш дошт.

2 феврали соли равон дар Кумитаи миллии олимпӣ зимни як нишаст бо мақсади омодагии варзишгарони тоҷик ба мусобиқаҳои сатҳи байналмилалӣ дар мувофиқа бо Кумитаи миллии олимпӣ ва Федератсияи гӯштини Тоҷикистон Юсуф Абдусаломов сармураббии дастаи мунтахаби кишвар оид ба гӯштини тарзи озод интихоб гардид.

Дар асоси қарордоди мазкур Юсуф Абдусаломов то моҳи сентябри соли 2024 тими миллии гӯштини тарзи озоди Тоҷикистонро ба Бозиҳои олимпии тобистона омода менамояд.

Даричаи ошноӣ

Юсуф Абдусаломов 8-уми ноябри соли 1977 дар деҳаи Ансалтаи Доғистон таваллуд шудааст. Хатмкардаи факултаи варзиши Донишгоҳи давлатии омӯзгории Доғистон мебошад. Ӯ дар оилаи серфарзанд ба дунё омадааст. Дар оилаашон аз ҳама хурдсол мебошад. Ҳамаи бародаронаш гӯштингиранд, вале ба мисли Юсуф натоиҷи баланд ба даст наовардаанд. Соҳиби 4 фарзанд, се духтару як писар мебошад.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5

Апрел 2024 c.