САЙЁҲӢ
Якшанбе 08 Сентябр 2024 04:26
![10256](/upload/iblock/4af/%D0%A2%D0%B8%D1%84%D0%BB%D0%B8%D1%81.jpg)
27 апрели соли ҷорӣ дар меҳмонхонаи “Ҳайят Реҷансӣ” барои кушодани хатсайри мустақими ҳавопаймоӣ миёни Душанбе - Тифлис аз ҷониби Кумитаи рушди сайёҳии назди Ҳукумати кишвар як чорабинӣ баргузор карда шуд.
Дар чорабинии мазкур намояндагони вазорату идораҳои дахлдор, ширкатҳои сайёҳӣ, ширкатҳои ҳавопаймоӣ, агентҳои фурӯши чиптаҳои ҳавопаймоӣ, ширкатҳои нақлиётӣ ва дигар доираҳои сайёҳии Ҷумҳурии Тоҷикистон ва давлати Гурҷистон иштирок доштанд.
Кори чорабиниро Салимзода Зиёдулло, муовини раиси Кумитаи рушди сайёҳӣ ҳусни оғоз бахшида, гуфт, ки дар замина сиёсати дарҳои кушоди Ҳукумати мамлакат ва дастуру ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамкориҳои гуногунҷониба бо кишварҳои олам дар ҳамаи бахшҳои иқтисодию иҷтимоӣ, хоса соҳаи сайёҳӣ ҳамчун бахши афзалиятноки иқтисоди миллӣ вусъат ёфта истодааст.
- Тибқи Стратегияи рушди сайёҳии Ҷумҳурии Тоҷикистон барои давраи то соли 2030 яке аз чораҳои таъсирбахш дар самти беҳтар гардидани хизматрасонии нақлиёти ҳавоӣ ва ҷалби сайёҳони хориҷӣ ин зиёд намудани хатсайрҳои ҳавоӣ ба манотиқи гуногуни олам арзёбӣ гардидааст, ки ин омили интихоби васеъ барои сафар намудан ба Тоҷикистонро ба сайёҳони хориҷӣ ба вуҷуд меорад. Таҳлил ва амалияи ҷаҳонӣ нишон медиҳад, ки роҳандозӣ намудани хатсайрҳои мустақим барои ҷорӣ намудани сиёсати “Осмони кушод” мусоидат намуда, барои рушди соҳаи сайёҳӣ муҳим арзёбӣ мегардад,- гуфт З. Салимзода.
Таъкид, бояд кард, ки роҳандозии хатсайри мустақими ҳавопаймоии Душанбе-Тифлис ҳамзамон барои ташкили сафарҳои омӯзишӣ ва табодули таҷриба бо давлати Гурҷистон, ҷалби инноватсия дар рушди соҳаи сайёҳӣ, агросайёҳӣ ва иқтисодиёти рақамӣ, ба имзо расонидани санадҳои ҳамкорӣ дар соҳаи сайёҳӣ бо доираҳои сайёҳии Гурҷистон, таклифи ҳайати бонуфузи Гурҷистон ба Тоҷикистон ҷиҳати омӯзиши имкониятҳои сайёҳии ҳудудҳои табии ҳифзшавандаи кишвар ва осоишгоҳҳо омили мусоид арзёбӣ мегардад.
Лозим ба ёдоварист, ки Кумитаи рушди сайёҳӣ барои рушди ҳамкориҳо дар соҳаи сайёҳӣ бо давлати Гурҷистон созишномаи ҳамкорӣ мувофиқа намуда, барои баимзорасонӣ омода мебошад, ки санади мазкур зимни сафарҳои расмӣ ба имзо расонида мешавад.
Эзоҳи худро нависед