Дар 9 моҳи соли 2024 ба Ҷумҳурии Тоҷикистон беш аз 1 миллион шаҳрванди хориҷӣ ворид гардидааст, ки аз ин шумора 941,3 ҳазор нафар сайёҳ мебошанд.

Дар ин бора Кумитаи рушди сайёҳии назди Ҳукумати Ҷумҳурии Тоҷикистон бо истинод ба Агентии омори назди Президенти Ҷумҳурии Тоҷикистон иттилоъ медиҳад.

Ба гуфтаи масъулини Кумитаи рушди сайёҳӣ ин шумора нисбати ҳамин давраи соли 2023 17,3 фоиз зиёд буда, дар ин давра шумораи шарвандони хориҷӣ аз кишварҳои Иттиҳоди давлатҳои мустақил 1 миллиону 118,5 ҳазор нафарро ташкил додааст, ки 852,2 ҳазор нафари онҳоро сайёҳон ташкил медиҳанд.

Ҳамин гуна, шаҳрвандони хориҷие, ки аз кишварҳои хориҷи дур ба ҷумҳурии мо омадаанд, 104,7 ҳазор нафар буда, 89,1 ҳазор нафари онҳо ба ҳайси сайёҳ омадаанд.

Гуфта мешавад, ки ба Тоҷикистон бештар шаҳрвандони Ҷумҳурии Узбекистон ворид гардидаанд, ки шумораи онҳо беш аз 746,1 ҳазор нафарро ташкил медиҳад.

Ҳамзамон, аз Федератсияи Русия беш аз 329,0 ҳазор, аз Қазоқистон - 28,9 ҳазор, Қирғизистон - 4,4 ҳазор, Туркманистон - 4,1 ҳазор, Ҷумҳурии Мардумии Чин- 21,6 ҳазор, Афғонистон- 10,4 ҳазор, Иёлоти Муттаҳидаи Амрико- 9,2 ҳазор, Эрон- 6,8 ҳазор, Туркия - 6,1 ҳазор, Олмон- 5,2 ҳазор, Ҳиндустон - 3,7 ҳазор, Бангладеш - 3,3 ҳазор, Британияи Кабир ва Ҷумҳурии Корея - 2,2 ҳазор, Фаронса, Ҷопон, Италия, Покистон ва Полша - 2,1 ҳазор, Австралия - 1,9 ҳазор ва аз Канада 1,8 ҳазор нафар ба Тоҷикистон омадаанд.

Фарзонаи УМАРАЛӢ, “ҶТ”