Зери ин унвон нимаи дуюми рӯзи 19 март дар Муассисаи давлатии таълимии барои ҷавонони болаёқат дар шаҳри Бӯстони вилояти Суғд ҳамоиши гирандагони Стипендияи президентӣ доир гардид.

Абдулло Раҳмонзода, раиси Кумитаи кор бо ҷавонон ва варзиши назди Ҳукумати кишвар ҳамоиши мазкурро ифтитоҳ бахшида, зимни баромади хеш иброз доштанд:

-Шумо сарвати асосии миллат ҳастед. Имрӯз шароите, ки барои шумо муҳайё шудааст, баробар ба донишгоҳҳои пешрафтаи дунёст. Ин ҳама заҳматҳои беназири Пешвои муаззами миллат мебошад, ки дар шароити мураккаби замони аввали соҳибистиқлолӣ таваҷҷуҳи асосиро ба соҳаи маориф равона карда буданд. Имрӯз ҳам мо шоҳидем, ки барои хондану соҳибкасб шудани насли наврасу ҷавон роҳбарияти олии мамлакат чи иқдомҳои наҷибе мегиранд, ки намунаи олии онҳо эълони озмунҳои “Фурӯғи субҳи доноӣ китоб аст”, “Тоҷикистон ватани азизи ман” ва “Илм-фурӯғи субҳи маърифат” мебошанд.

Дар идома таъкид гардид, ки бояд насли наврасу ҷавон аз имкониятҳои мавҷуда самаранок истифода намоянду бо соҳибкасбу соҳибихтисос гардидан, саҳми хешро дар пешрафти давлату миллат гузоранд.

Дар охири ҳамоиш гирандагони Стипендияи президентӣ миннатдории худро ба Пешвои миллат ҷиҳати фароҳам овардани шароити созгор барои илму дониш омӯхтан, баён намуданд.
“ҶТ”