ҶАВОНОН
Якшанбе 20 Сентябр 2020 12:00
3647
Дониш чароғи ақл аст. Ин аст, ки инсонҳо доим талош меварзанд, то илму дониш ба даст оранду мушкилиҳои бамиёномадаро тавассути ақлу дониш бартараф намоянд. Чунки ҳаётро монанди кӯчаҳои сарпечи шабҳангом маънидод менамоянд, ки инсон дар ин кӯчаҳо танҳо бо нури чароғи ақл метавонад, ки аз он сарбаландона убур намояду дар зиндагӣ мақсадҳои накӯи хешро амалӣ созад.

Ҷавонону наврасон ояндаи миллату давлатанд. Бисёр хурсандиовар аст, ки имрӯз ин қишри ояндасози ҷомеа бо нерӯву талоши хеш паи илмомӯзианду пайваста ба он ҷаҳд менамоянд, то дар бадали ҳар дақиқаи вақти рафтаашон донишеро аз бар намоянд. Аз ин гуна фидоии роҳи дониш будани онҳо тахмин кардан мумкин аст, ки ҳар яки эшон дар кадом соҳае ки равона нагарданд, ҳатман ба дастовардҳои бузург ноил гардида, ба ин васила баҳри рушди меҳани хеш саҳм хоҳанд гузошт.

Афшин Давлатов, хонандаи синфи 11-и Мактаби байналмилалии президентии шаҳри Душанбе имрӯз ҳамчун ҷавони замони соҳибистиқлолӣ доим дар машғулиятҳо фаъол асту бо иштирок намудану гирифтани мақомҳои ифтихорӣ дар олимпиадаҳои байналмилалӣ маҳорат ва малакаи ҷавонону наврасони тоҷикро муаррифӣ намудааст.

Барои Афшин иштирок дар озмуни сатҳи байналмилалӣ ҳадафи ягонааш ба ҳисоб мерафт. Ин таваҷҷуҳи ӯро устодонаш пай бурда, ба ӯ пешниҳод намуданд, ки дар олимпиадаи миёни хонандагони мактабҳои давлатҳои гуногун иштирок намояд. Зеро ӯ қобилияти хуб дорад. Ӯ бо шунидани ин сухан дарҳол паи омодагии ҷиддӣ мегардад, то рафта ҷойҳои намоёнро ба даст ораду Парчами кишварро баланд бардорад.

- Дар олимпиада аз фанни информатика ду маротиба ширкат варзидаам. Дар соли аввали иштирок бароям мушкил буд. Зеро бори аввал буд, ки дар чунин озмуни сатҳи ҷаҳонӣ иштирок менамудам. Бо вуҷуди он ҳама душвориҳо тавонистам, ки дар озмун баромад намояму яке аз ҷойҳои ифтихориро ба даст биёрам. Дар соли якуми иштирок сазовори ҷои сеюм ва бо медали биринҷӣ қадрдонӣ гардидам, - иброз медорад Афшин Давлатов. - Пас аз баргаштан аз озмун пеши худ мақсад гузоштам, ки хубтару беҳтар омода гардида, дар соли оянда ҳатман боз дар олимпиадаи мазкур ширкат менамояму ҷои намоёнтарро ба даст меорам. Дар воқеъ, вақте пеши худ мақсад мегузоред, ҳатман нерӯе шуморо баҳри расидан ба он таҳрик медиҳад. Ҳамин гуна кӯшишу талошам буд, ки соли равон дар соли дуюми иштирок дар олимпиада ҷои дуюмро ишғол намудам, ки ин бароям ифтихори бузург аст.

Афшин Давлатов дар Олимпиадаи байналмилалии ““INTEX-ASIA-2017”, ки имсол дар шаҳри Алмаатои Ҷумҳурии Қазоқистон доир шуд, бо пешниҳод намудани лоиҳаи илмияш оид ба мавзӯи “Тестҳои ғайриинтернетӣ” фаъолона ширкат варзида, сазовори ҷои 2-юм ва соҳиби медали нуқра гардид.

- Ба Афшин чор сол роҳбари синф будам, – афзуд Шарофат Маманазарова, яке аз муаллимаҳояш. – Ӯ бисёр хонандаи масъулиятшинос аст. Ӯ нисбати устодону ҳамсолонаш эҳтиром гузошта, одоби хуб дорад. Ӯ ҳамеша ҳаракат мекард, ки чизе омӯзад. Падару модараш пайваста бо мактаб ҳамкорӣ доранд ва ҳамеша аз рафти донишомӯзии ӯ хабардор мешаванд. Дар байни хонандагон рафтору гуфтори намунавӣ дорад. Барояш дар роҳи донишандӯзӣ комёбиҳои бештар хоҳонем”.

Афшин имсол хатмкунанда аст. Ӯ мегӯяд, ки барои пешаи ояндааш соҳаи иқтисодшиносиро интихоб намуданист. Зеро соҳаи мазкур барояш писанд асту мехоҳад, ки дар оянда иқтисодчии хуб шавад. Мо барояш дар роҳи илму дониш муваффақиятҳои рӯзафзун таманно дорем.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 1 2 3 4

Сентябр 2020 c.