16-умин Бозиҳои байналмилалии Делфии ҷавонони кишварҳои узви ИДМ дар шаҳри Душанбе шоми 17 октябр анҷом меёбад ва маросими бошукӯҳи пӯшидашавии он соати 19:00 дар Театри давлатии академии опера ва балети Тоҷикистон ба номи С. Айнӣ баргузор хоҳад шуд.

Дар ин бора сомонаи расмии Вазорати фарҳанги Ҷумҳурии Тоҷикистон иттилоъ медиҳад.

Бино ба таъкиди манбаъ маросими бошукӯҳи кушодашавии он рӯзи 15 октябри соли ҷорӣ сурат гирифта, дар 16-умин Бозиҳои байналмилалии Делфии ҷавонони кишварҳои узви ИДМ зиёда аз 500 нафар истеъдодҳои ҷавони аз 10 то 25-сола аз тамоми кишварҳои ИДМ аз рӯи номинаҳои фортепиано, скрипка, санъати тасвирӣ, сарояндаи академӣ, сарояндаи халқӣ, сарояндаи эстрада, рақси халқӣ, созҳои нафасӣ, созҳои халқӣ ва ҳунарҳои мардумӣ ҳунарнамоӣ намуданд.

Ёдовар мешавем, ки таърихи расмӣ ва ҷойи баргузории Бозиҳои Делфӣ соли 582 то милод дар Юнон маҳсуб меёбад. Ин бозиҳо солҳои 70 –уми асри XX дар Иттиҳоди Шӯравӣ дар доираи чорабиниҳои эҷодии ҷавонон баргузор мегардид. Таҷрибаҳои андӯхта баҳри таъсиси Шӯрои миллии Делфӣ ва коркарди шакли муосири бозиҳо дар Федератсияи Русия соли 1999 оғоз шуда, марҳилаи нави Бозиҳои Делфӣ, падидаи ҷаҳонӣ гашт ва соли 2000 дар шаҳри Москва бо иштироки 27 кишвар аз ҷониби Шӯрои миллии Делфии Русия нахустин Бозиҳои умумиҷаҳонии Делфӣ баргузор гардида буд.