Санаи 8 июл, дар Кохи фарҳанги  шаҳри Хуҷанд таҳти раёсати раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода ҷаласаи сайёри ҳайати мушовараи Кумитаи кор бо ҷавонон ва варзиш вобаста ба натиҷагирии фаъолияти соҳаи кор бо ҷавонон ва варзиш дар нимсолаи аввали соли 2019 баргузор гардид. 

Дар кори ҷаласаи ҳайати мушовараи Кумита натиҷаи фаъолияти Кумита дар нимсолаи аввали соли 2019 ҷамъбаст гардида,  зикр гардид, ки Кумитаи кор бо ҷавонон ва варзиш дар ҳамкорӣ бо вазорату идораҳо, ташкилоту муассисаҳо ва  ВАО-и кишвар дар нимсолаи аввали соли ҷорӣ беш аз 17 ҳазор чорабиниҳои гуногунро  доир намудааст. 

Аз ҷониби Кумита дар ин давра силсила чорабиниҳои маърифатию фарҳангӣ, оммавию варзишӣ ва солимгардонӣ дар тамоми қаламрави кишвар бо иштироки беш аз 2 миллион  нафар наврасону ҷавонон ташкилу гузаронида шудааст. 

Дар доираи ҷаласаи сайёри Кумита ба як қатор кормандони Кумита, ки дар вазифаҳои хизматӣ натиҷаҳои назаррас нишон дода буданд, бо рутбаҳои хизмати давлатӣ сарфароз гардонида шуданд. 

Инчунин дар доираи кори ҷаласаи ҳайати мушовараи Кумита масъалаҳои татбиқи барномаҳои давлатӣ “Барномаи миллии рушди иҷтимоии ҷавонон барои солҳои 2019 -2021”, “Барномаи давлатии ватандӯстӣ ва таҳкими ҳуввияти миллии ҷавонони Тоҷикистон барои солҳои 2018 - 2022”, “Барномаи рушди тарбияи ҷисмонӣ барои солҳои 2017-2021”, “Барномаи рушди футбол барои солҳои 2017-2021” мавриди баррасӣ қарор гирифт.