Дар натиҷаи ҳамкориҳои мутақобилан судманди Кумита бо вазорату идораҳо, ташкилотҳои ҷамъиятӣ, ҷомеаи шаҳрвандӣ, бахши хусусию соҳибкорони ватанӣ ва ВАО дар самти сиёсати давлатии кор бо ҷавонон 17096 адад чорабинӣ бо фарогирии 4064549 наврасону ҷавонон ва аҳолӣ баргузор гардид.

Аҳтам Абдуллозода, раиси Кумитаи кор бо ҷавонон ва варзиш, 12 феврал, ин нуктаро зимни нишасти хабарӣ баён намуда, иброз дошт, ки “дар самти тарбияи ҷисмонӣ ва варзиш дар соли 2017, 7836 чорабинии варзишӣ бо фарогирии 2745999 нафар шаҳрвандон, аз ҷумла 537130 нафар бонувон, амалӣ карда шуд. Дар маҷмуъ дар “Соли ҷавонон” дар саросари кишвар дар соҳаи кор бо ҷавонон ва варзиш 24872 чорабинӣ бо фарогирии 6 810 548 нафар наврасону ҷавонон ва сокинони ҷумҳурӣ баргузор карда шуд”.

Дар идома гуфта шуд, ки дар доираи “Барномаи миллии рушди иҷтимоии ҷавонон дар Ҷумҳурии Тоҷикистон барои солҳои 2016- 2018” ба 53 нафар ҷавонон дар ҳаҷми 48070 сомонӣ кӯмак расонида шуда, умуман дар ҷумҳурӣ бахшида “Соли ҷавонон” ба 23883 нафар шахсони эҳтиёҷманд аз тамоми сарчашмаҳо дар ҳаҷми 1 392 981 сомонӣ кӯмакҳои моддӣ, молӣ ва маишӣ расонида шудааст.