Дар Филармонияи давлатии Тоҷикистон, 20 феврал, бахшида ба 26 солагии таъсисёбии Артиши миллӣ Фестивали ҷумҳуриявии “Таронаи сарбоз” баргузор гардид.

Фестивали мазкур бо ташаббуси Кумитаи кор бо ҷавонон ва варзиш таҳти сарпарастии Федератсияи футболи кишвар доир шуда, дар он намояндагони КҶВ, намояндагони баландпояи вазорату идораҳои қудратии кишвар, афсарону сарбозони қисмҳои низомӣ ва ҷавонони фаъоли пойтахт ширкат намуданд.

Зимни ифтитоҳи чорабинӣ Аҳтам Абдуллозода, раиси Кумитаи кор бо ҷавонон ва варзиш афсарону сарбозонро ба 26-умин солгарди таъсисёбии Артиши миллӣ табрик намуда, изҳор дошт:

- Ҳарчанд, ки Артиши миллии мо дар вазъияти бисёр вазнини сиёсии кишвар таъсис ёфт, вале дар натиҷаи тадбирҳои мунтазам андешидаи Ҳукумати мамлакат, бахусус Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ муҳтарам Эмомалӣ Раҳмон марҳила ба марҳила устувору пурқувват гардида, имрӯз бо мутахассисони дорои донишу малакаи баланд, техникаву таҷҳизоти муосир таъмин мебошад. 26 соли таъсисёбии Артиши миллӣ ин 26 соли мубориза барои таҳким бахшидани сулҳу субот ва истиқлолу Ваҳдати миллӣ мебошад.

Дар фестивал афсарону сарбозони қисмҳои низомӣ ва ҳунармандони ҷавон дар васфи Ватан, Тоҷикистон, марзу бум, ҷавонӣ, ишқ ва ҳаёти зебои давраҳои хизмат таронаҳо ва саҳнаҳои театрӣ пешниҳод намуданд.

Ба таъкиди масъулин мақсад аз баргузории чорабинӣ баланд бардоштани ҳисси ватандӯстию меҳанпарастӣ, маърифати сиёсӣ ва ҳуқуқии ҷавонон, эмин нигоҳ доштани онҳо аз ҳар гуна хатарҳои замон, ҳидояти онҳо ба бунёдкорӣ ва созандагии кишвар, дар дилашон бедор кардани ҳисси миллӣ ва дӯст доштани арзишҳои фарҳангӣ мебошад.

Лозим ба ёдоварист, ки фестивали мазкур ҳамасола бо иштироки васеи афсарону сарбозони вазорату идораҳои қудратии кишвар аз ҷониби Кумитаи кор бо ҷавонон ва варзиш баргузор мешавад.

Дар фарҷоми фестивал ба як зумра ҳунармандон барои иҷрои суруду таронаҳои беҳтарин сипоснома ва туҳфаҳои хотиравӣ дода шуд.